Доруобуйатынан хааччахтаах дьону үлэ миэстэтинэн хааччыйыы

Саҥа арыллыбыт мастарыскыайга тупсаҕай көрүҥнэээх утуйар таҥас тигиллэр. Манна 3 кыыс күннэтэ түбүгүрэллэр. Кинилэр ааттара Маша, Нина уонна Настя. Бу иллэрээ сыллаахха арыллыбыт Ситим бырайыак суоҕа буоллар  кинилэр үлэтэ суох буолуохтарын сөп этэ. Тоҕо диэтэр  доруобуйаларын туругунан тэрилтэҕэ үлэлиир кыахтара суох. Онтон билигин кыргыттар ый аайы хамнас аахсаллар, коллективтаахтар. Нина Ситим тэрилтэ нөҥүө Санкт - Петербург куоракка дизайнер куурсугар баран үөрэнэн кэлбит.

Нина Иванова, "АртСитим" мастарыскыай үлэһитэ: "Олус үчүгэйдик ситиһиилшээхтик үөрэнэн кэлбитим. Мин манна сыттык хаҕа, бырастыына тигэбин. Уопсайа барыта 32 кэмпилиэги тикпитибит. Бу сайыҥҥатттан саҕалаан үлэлээбиппит".

Бастаан иистэнэр массыынаны билсиһииттэн саҕалааннар билигин утуйар таҥаһы холкутук тигэргэ үөрэммиттэр. Атыылаһааччы интэриэһин тартын, бэлэххэ ыллыннар диэн бу курдук тупсаҕай хаалаабыттар. Маны барытын кыргыттар бэйэлэрэ толкудаабыттар. Кинилэри маастар Ирина Уарова  иилиир – саҕалыыр.

Ирина Уварова, "АртСитим" мастарыскыай маастара: «Машам олус үчүгэйдик тигэр. Ол иһин кини суорҕан тигиитигэр олорор. Суорҕан киирэр дьөлөҕөһүн оҥоруу уустук, ону кини бэркэ сатаата. Онтон Нинам сыттык хаҕа уонна бырастыына тигэр, биһиги Настялыын быһабыт. Настя эмиэ кыралаан массыынаҕа олорор. Бу кэмпилиэктэрбит барыта атыыланнахтарына, өссө таҥас ылан салгыы сакаастары ылан үлэлиир былааннаахпыт».

Онтон мастарыскыай иккис хоһугар туойтан сувенир оҥоһуллар. Манна Доруобуйаларынан хааччахтаах эдэр дьон үлэ миэстэтинэн хааччыллалларын таһынан куоракка бэйэлэрэ сылдьарга, коллективка үлэлииргэ үөрэнэллэр. Ону тэҥэ илиилэрин сайыннараллар, толкуйдуур дьоҕурдарын эрчийэллэр. 

Валентина Оконешникова, "Ситим" тэрилтэ психолога: "Манна биэс оҕо үлэлиир. Кинилэр дьиэ кэргэҥҥэ олорор доруобуйаларынан хааччахтаах эдэр дьоннор. Ол иһин үлэ аһаҕас ырыынагар кыайан үлэлээбэттэр. Кинилэргэ анаан бу мастарыскыайы арыйдыбыт".

Оҕолор оҥоһуктарын атыылаан, инникитин өссө сакаас ылар былааннаахтар. Билигин бэйэлэрэ тугу кыайалларын, дьон ордук тугу атыылаһыа дии санаабыттарын оҥороллор.

Андрей Тихонов, "АртСитим" мастарыскыай үлэһитэ: "Чыычаах уонна тэриэлкэ оҥордум. Манна сылдьарбын олус сөбүлүүбүн".

"Арт Ситим" мастарыскыай "Ситим" тэрилтэ иһинэн арылынна. Иллэрээ сыллаахтан саҥа үлэлиир бырайыак 37 киһини арыаллыыр. Нерюнгри оройуонуттан кэлбит тулаайах оҕолору, туһунан олордон, күннээҕи олоххо-дьаһахха үөрэттилэр. Кинилэр билигин  этэҥҥэ үлэлии сылдьаллар. Онтон атыттарга бу мастарыскыайга миэстэ таһаардылар.

Лена Денисова, "Ситим" тэрилтэ салайааччыта: "Уопсайа 16 киһи биһиэхэ үлэҕэ киириэхтэрэ. Ол курдук 10 киһи туойунан оҥоһукка, 3 киһи иискэ уонна 3 киһи фруктаттан, Саха сирин отонноруттан пастила оҥоруутугар үлэлиэхтэрэ".

Мастарыскыай арыллар үөрүүлээх күнүнэн туһааннаах министиэристибэ, норуот дупутаттара эҕэрдэлээтилэр, төрөппүттэр махтал тыллары эттилэр