Бартыһаан айар куттаах ыала

Уйбаныаптар кэтэх хаһаайыстыбаны туталлар. Күһүҥҥү кэмҥэ үлэ түбүктээх диэн хаһаайын кэпсиир. Оттон сайын от үлэтэ. Кыстыгы тахсар отторун булунан уһун кыһыны көрсөргө бэлэмнэр.

Николай Иванов, Бартыһаан нэһилиэгин олохтооҕо: "Быйыл от үүнүүтэ үчүгэй, кыстыгы туорууру буллубут".

Хаһаайын  ынахтарын күҥҥэ иккитэ ыырын кэпсиир. Кэргэнинээн үлэ буоллун, сынньалаҥ буоллун барытыгар бииргэ сылдьалларын бэлиэтиир.  Дьиэҕэ  кырачаан сиэн кыыс сэргэх  кэпсээннээх тоһуйар.

Уйбаныаптар дьиэ кэргэнинэн бары хомусчуттар, биир ыалга 4 импровизатор хомусчут баар. Дьиэ хаһаайката, аҕа баһылык уонна кыыстара "Дьүрүл  ансаамбыл тутаах хомусчуттара. Билигин оҕолору сиэннэри ааҕан дьиэ кэргэҥҥэ хас да көлүөнэ хомусчут түмсэр.

Лидия Иванова, Бартыһаан нэһилиэгин олохтооҕо: "Дьиэ кэргэммит нүөмэрин дьиэбитигэр бэлэмнэнэнбит. Аҕабыт хомус саҕаланыаҕыттан, Дмитрий иванович саҕалыаҕыттан сылдьар. Онно наар дьиэтигэр бэлэмнэнэр этэ. Ол иһин оҕолор бары аҕаларын көрөн үөрэммиттэрэ".

Уйбаныаптар өрөспүүбүлүкэ араас тэрээһиннэригэр дьиэ кэргэнинэн кыттан кыайыылаах буолбуттарын, кылаан бириистэри ылбыттарын уллэстэллэр. Утум-ситим салҕанар. Дьиэ кэргэн  биир дьарыктааҕа сомоҕолуур диэн санаалаахтар. Оҕолор аҕаларыттан оттон сиэннэр эһээлэриттэн көрөн хомустуурга үөрэнэллэр.

Николай Иванов, Бартыһаан нэһилиэгин олохтооҕо: “Солист буоламмын дьиэбэр наар сиэркилэ иннигэр туран бэлэмнэнэр этим. Онтон үлэбэр барабын, ол кэмҥэ тыыппыт буолллар этэ хомуспун. Ол сылдьан үөрэммиттэрэ”.

Ыалдьытымсах ыал минньигэс аһын амсайыахпытыгар, төгүрүк остуол тула олорон арааһы сэһэргэһиэхпитигэр диэри күн киэһэрдэ. Онон ыалларбытын кытары кэһээҥҥи ыамҥа таҕыстыбыт. Хомус дьүрүскэн тыаһын сүөһүлэр кытары билэллэр.

Ынахтар хомус тыаһынан арыаллатан хотонноругар киирэллэр. Лидиялаах Николай үөрүйэхтик туттан ынахтарын миэстэлэригэр киллэрэн ыамҥа бэлэмнииллэр. Ньирэйдэр ийэлэрин эмээри ыксыыллар, сорохтор бурдук сиэри күүтэллэр. Тимир биэдэрэҕэ билэр тыаспыт ынах ыанньыйбытын бэлиэтэ.

Айар куттаах тыа ыалын күһүҥҥү түбүгүн, дьиэ кэргэни түмэр дьарык ситиһиилэрин, хотон көрүүтүн сэдэх түгэнин мүччү туппакка уһуллубут. Сүөһү хотоҥҥо хоно хаалла. Сарсын эмиэ саҥа күн үүнүөҕэ. Кэскиллээх олох салҕаныаҕа.