Аллараа Халыма улууһун үөрэҕин кыһалара

Походскайдааҕы оҕо уһуйаана оҕону иитиигэ кыра дэриэбинэ тутаах тэрилтэтэ.  Ол эрэн усулуобуйа манна быстар мөлтөх.  1988 сыллаах тутуу, уһуйааҥҥа анала суох элбэх кыбартыыралаах дьиэҕэ көһөн олороллор. Манна уопсайа 20-чэ оҕо икки бөлөҕүнэн арахсан сылдьар. Уһуйаан өр сыллар тухары баҕа санаата бэйэ теплицатын оҥостуу, ол эрэн теплицалара кэлбит эрээри аны атын кыһалҕа тирээбит.

Александр Борисов, Походскай уһуйаанын сэбиэдиссэйэ: «Биһиэхэ модульнай теплица кэлэн сытар, ол эрэн ону туруорарбытыгар аналлаах хаптаһыннар, тутуу матырыйааллара суохтар»

Олоххо эриэккэстик көстөр дьикти түгэн - уһуйаан сэбиэдиссэйэ - эр киһи. Александр Петрович тэрилтэтин кыһалҕатын төһө кыахтааҕынан быһаарар, оҕолорго табыгастаах усулуобуйаны олохтуур.

Арктика уһугар сытар кыракый нэһилиэккэ бэйэ үөрэх кыһалара бааллара улахан төһүү күүс буолар. Төһө да оҕолорун ахсаана аҕыйаҕын иһин оскуолалара толору 11 кылааһы үөрэтэр. Кылаастарга үстүү, түөртүү оҕо үөрэннэр оскуола күннээҕи олоҕо тэтимнээхтик ааһар

Лена Кононова, Походскай орто оскуолатын иитэр үлэни тэрийээччитэ: «Биһиги оскуолабыт иһинэн тыйаатыр тэриммиппит уонна саҥа түмэл оҥоро сылдьабыт. Онно араас быыстапкалары туруорар уонна оскуола историятын көрдөрөр санаалаахпыт»

Оскуола оҕолоро икки дьиэннэн сылдьан үөрэнэллэр, Походскай оскуолата Аллараа Халымаҕа биир саамай кырдьаҕас үөрэх кыһата буолар.

Улуус киинигэр Черскэйгэ хас да үөрэх кыһата баар. Биир саамай суолталаах тэрилтэ коррекционнай оскуола буолар. Манна уопсайа 20 оҕо сылдьар. Олортон аҕыһа интернатка олорор. Оҕолору үөрэтиигэ-иитиигэ 6 учуутал үлэлиир.

Сергей Мельман, Черскэйдээҕи коррекционнай оскуола-интернат дириэктэрэ: «Биһиги үөрэхпит сүрүн бырагырааммата өйдөрүн сайдыылара мөлөтөх оҕолорго аналлаах. Кылаастарбытыгар оҕо ахсаана аҕыйах буолан, хас биирдии оҕону кытары тус-туспа дьарыктанабыт»

Онтон оҕону сайыннарыы  киинигэр хас биирдии оҕо куруһуоктарга суруттаран, иллэҥ кэмин туһалаахтык атаарар. Уопсайа оҕолору сэттэ араас куруһуокка дьарыктыыллар. Сүрүннээн ойуулугу оҥоруунан умсугуйаллар.

Анатолий Третьяков, Черскэйдээҕи оҕо сайдар киинин иитиллээччитэ: «Биһиги манна лего онньуурунан араас дьоруойдары оҥорон «Лего Сити» оонньуур ис хоһоонугар олоҕуран ойулуктары устабыт»

Манна быйылгы үөрэх дьылын көрсө кыра-кыралаан өрөмүөн, тупсарыы үлэтин ыыппыттар.

Аллараа Халымаҕа элбэх аҕыйах ахсааннаах хотугу норуоттар олорор буоланнар дьүкээгир, эбээн, эбэҥки уонна чукча тылын үөрэтэллэр. Ол эрэн хомойуох иһин оскуола национальнай буолбатах ол иьин  чаас көрүллүбэт, оҕолор бэйэлэрин баҕаларынан үөрэх таһынан дьарыкка суруттаран сылдьаллар.

Алёна Филиппова, Черскэй орто оскуолатын дьүкээгир тылын учуутала: «Уруоктарга төрөөбүт төрүт тылларын үөрэтиэн баҕалаах оҕолор сылдьаллар. Биһиги тылбыт сүтэн эрэр буолан оҕолору туох да хааччахтааһына суох ылан үөрэтэбит» 

Уопсайа нэдиэлэҕэ 3 чаас көрүллэр. Уруок кэмигэр оҕолор аҕыйах ахсааннаах норуоттар суруйааччыларын айымньыларын билсэллэр, өйтөн ааҕарга үөрэнэллэр, бэйэлэрэ аныгы халыыптаан рэп ааҕаллар.

Уһук хоту сытар Аллараа Халыма улууһа оҕолору сайыннарыыга, үөрэтиигэ  болҕомтону түмэр. Төһө да кыһалҕа баарын үрдүнэн иннилэрин хоту сайдыы суолун туталлар.