Хоту таһаҕаһы тиэрдии түмүктэнэн эрэр

106

Хоту дойду дьонун сүрүн дьарыга балыктааһын. Олохтоохтор илим иитэн, күннээҕи астарын булуналлар. Походскай бөһүөлэгин олохтоохторо Халыма өрүскэ уонна кини тардыыларыгар балыктаан эбии үп киллэринэн, сыллата Сахабыт сирин араас балыктарынан хааччыйаллар.

 

Балыксыттар бултарын түргэнник тоҥорор анал контейнерга аҕалаллар, ол эбэтэр "шоковай заморозка" дэнэр. Бу ньыма туһата диэн балык амтанын, битэмиинин сүтэрбэт, харайыыны тулуйумтуо уонна тиэйиигэ табыгастаах буолар.

 

Биллэн турар, хоту дойду балыгын барытын кыра контейнер иһигэр тоҥорор, харайар кыаллыбат. Походскай бөһүөлэгэр сири хаһан уһук сытар Арктика ирбэт тоҥун табыгастаахтык туһанан анал балыгы харайар сирдээхтэр.

 

Өскөтүн анал тоҥорор контейнер иһигэр 6 чаас иһигэр балык тоҥор эбит буоллаҕына, бу манна 2 күн буолар. Өрүс суола баар эрдэҕинэ балыктарын ууннан ыыталлар, онтон кыһыннары сөмөлүөтүнэн көтүтэллэр. Онон хоту дойду мааныылаах аһын таһыы ыарахаттардаах уонна ороскуоттаах. Аҥаардас Походскай бөһүөлэгиттэн балыгы таһыыга былырыын 6 мөлүйөүн солкуобай бараммыт.

 

Дмитрий Саввин, "Походск" балыгы тутар кээпэрэтиип үлэһитэ: "Бу кэмҥэ күҥҥэ балтараа туоннаттан саҕалаан биэс туоннаҕа диэри тутабыт. Ыам ыйын бүтэһигиттэн саҕалаан балаҕан ыйын бүтүөр диэри олохтоохтор туттараллар".

 

Сүрүннээн балыгы хоту улуустартан "Якутоптторг" тэрилтэ таһар. Быйыл навигация бастакы түһүмэҕэр киин куоракка 640 туоннаны аҕалбыттара. Билигин иккис түһүмэххэ эмиэ олохтоох оҥорон таһаарааччылартан балыгы тутуу салҕанар.

 

Черскэйгэ тыын суолтаалаах аһы-табаары тарҕатар киин арыллан үлэлээбитэ сыл аҥара буолла. Мантан олохтоохтор сүрүн астарын удамыр сыанаҕа атыылаһар кыахтаммыттара.

 

Наталья Маркова, "ЯКУТОПТТОРГ"  Черскэйдээҕи атыы-эргиэн логистическэй киинин дириэктэрэ: "Саҥа киин арыллыаҕыттан бородуукта сыаната түстэ. Кэлэр табаар арааһа уонна саппааһа элбээтэ".

 

Онтон бу Дьокуускай куоракка хоту улуустарга таһаҕаһы тиэйиигэ бэлэмнэнэллэр. Олохтоох үүннэрэн таһаараччылартан оҕуруот аһын тутан Арктика уһугар сытар улуустары бэйэ аһынан хааччыйаллар.

 

Галина Румянцева, "ЯКУТОПТТОРГ" тэрилтэ оҕуруот аһын ыскылаадын сэбиэдиссэйэ: "Сайын уунан, сөмөлүөтүнэн уонна кыһыҥҥы суолунан оҕуруот аһын ыытыыга былааммыт 1100 туонна курдук. Мантан 86% олохтоох хаһаайыстыбалартан тутан олоробут".

 

Оҕуруот аһын тутуу сэтинньи ыйыгар диэри ыытыллыаҕа. Улуустар кииннэригэр таһаҕас барыта тиэллибитин кэннэ, кыһыҥҥы суол турдаҕына нэһилиэктэргэ массыынанан тиэрдии саҕаланыаҕа.

 

Егор Ефимов, "ЯКУТОПТТОРГ" тэрилтэ генеральнай дириэктэрин солбуйааччыта: "Билигин уунан барар таһаҕаһы тиэйиини түмүктээн эрэбит. Манна былааммыт 1776 туонна этэ, ону 45% аһары толорон 2573 туоннаны тириэртибит".

 

Хоту улуустар кыһыны туоруур астара толору тиэллэн, аны өссө биир дьылы туоруулларыгар сөптөөх усулуобуйа олохтонно. Аны кыһын нэһилиэктэргэ массыынан тиэрдии ыытыллыаҕа.