АГАТУ устудьуоннара урбаан үөрэҕэр уһуйуллаллар

Лапсаны уонна сыстар лиэнтэни туһанан башнята тутан таһаар диэн сорудаҕы хамаандалар толороллор. Сүрүн ирдэбил - оҥоһук тирэхтээх буолуохтаах. Бу урбаан эйгэтигэр быһаччы сибээстээх тренинг. Судургу холобурга устудьуоннар бизнес хайдах тутуллан тахсыахтааҕын өйдүүллэр. Элбэх үп-харчы кутуллубут хара маҥнайгыттан олус улахан бизнес бу  көстөр  үрдүк тупсаҕай көрүҥнээх ол эрэн уйуга суох суулла турар оҥоһук курдук буолуон сөп, тренинг уһуйааччылара этэллэр. Икки күн устата барыахтаах үөрэххэ оҕолор бордуукта маҕаһыынын арыйыы бастакы хардыыларын холобуругар үөрэнэллэр. 

Святослав Павлов, АГАТУ устудьуона: "Лапсанан башнята тутан көрүҥ диэн сорудахтаабыттар. Бастаан аөары улахан гына оҥорбуппут. Онтубут сууллар хаалла. Бастаан кыраны да туттахха сөп буолуо этэ. Бастаан саҕалыырга. Онтон улаатыннарыахха сөп диэбитэ. Олус өйдөнөрдүк үөрэтэллэр".  

Өрөспүүбүлүкэ сүрүн аграрнай үөрэҕин кыһата урбаан хайысхатыгар улахан болҕомтону уурар. Бизнес сүрүн тутула бырайыак. Онон бырайыагы сөптөөхтүк оҥоруу үөрэх былааныгар киирэн үөрэтиллэр. Маны сэргэ үгүстүк бу курдук хабааннаах үөрэхтэр ыытыллаллар. Бу сырыыга Тихокеанскай государственнай университеттан кэлбит исписэлиистэргэ икки күн устата араас факультеттартан талыллыбыт оҕолор урбаан ымпыгын-чымпыгын билиэхтэрэ.

Антон Ван-Чу-Лин, АГАТУ экономика кафедратын уһуйааччыта: "Үөрэх былааныгар бырайыак модулларын хас биирдии салааҕа киллэрдибит. Онон хас биирдии устудьуон урбаан эйгэтигэр сыһыаннаах бырайыагы түмүктүүр үлэтигэр эбэтэр куурустааҕы үлэтигэр оҥорор".

Маныаха ааспыт сылтан "Университекка технологическай урбаан" диэн федеральнай бырайыак үлэлиир. Бу чэрчитинэн устудьуоннары үөрэтии, бырайыактары оҥоруу босхо барар итиэннэ олоххо киллэрии үбүлэнэр. АГАТУ бу бырагыраамаҕа киирсэн үэлэһэн саҕалаата. Бастакы улахан тэрээһин - бу урбаан эйгэтигэр билиини эрчийии диэн тренинг буолла. Манна устудьуоннар бэйэ дьыалатын саҕалааһыҥҥа бастакы хардыылартан саҕалаан ситиһиилээх бизнес кистэлэҥнэрин урбаанньыттартан билиэхтэрэ. Полимернай матырыйааллары оҥорор тэрилтэни салайар Петр Лукачевскай бэйэтин уопутун үллэстэр. 

Петр Лукачевскай, урбаанньыт: "Улахан сыыһалары оҥорботуннар диэн үөрэтэбит. Сүрүннээн ону үөрэтэбит. Барыстаах суолу тобулан бэйэ дьыалатын саҕалыылларын гына үөрэтэбит".

Үөрэх икки күн устата салҕанан барыаҕа. Урбаан сайдыытын өрө тутар үөрэх кыһатыгар мантан инньэ бу курдук хабааннаах тэрээһиннэр элбиэхтэрэ диэн иһитиннэрдилэр. Ол аата бу эйгэҕэ саҥа бырайыактар, саҥалыы көрүү үксүүрэ күүтүллэр.