Сыл бастыҥ учуутала ааттанна
Главное
-
8 сентября в 02:458 сентября. День в истории - даты, события
-
8 сентября в 00:30Прогноз погоды в Якутии на 8 сентября
-
7 сентября в 11:48В Якутске обсудили улучшение городской среды и качества жизни людей на форуме "Якутск 4.0.0"
-
7 сентября в 11:16Айсен Николаев встретился с командиром добровольческого батальона "Боотур"
Быйыл "Сыл бастын учуутала" күрэх 32-с төгүлүн ыытылынна. Күрэх Учуутал уонна уһуйааччы сылыгар анаммыт буолан уратылаах, үрдүк ирдэбиллээх буолла. Куонкуруска саҥа хайысхалар, уларыйыылар киирдилэр, онон бүтэһик түһүмэххэ бастыҥтан бастыҥ учуутал тиийдэ.
Галина Алексеева, С.Н. Донской-II аатынан үөрэх сайдыытын уонна идэ таһымын үрдэтэр институт дириэктэрин солбуйааччыта: "Иккис түһүмэххэ 15 чулуу учуутал киирэр. Онтон быйыл 17 киһи киирдэ. Онон күрэх олус тыҥааһыннаах буолла. Иккис түһүмэх балаһыанньатыгар уларыйыы киирдэ. Ол курдук учууталга ким баҕарар ыйытыы биэрэр кыахтанна. Төрөппүттэр, оҕолор, устудьуоннар дьүүллүүр сүбэлэрэ баар. Балартан уонна улахан дьүүллүүр сүбэттэн ыйытыылар киирэллэр".
Нэдиэлэ устата өрөспүүбүлүкэ араас улууһуттан 17 учуутал "Сыл бастыҥ учуутала" ааты ылар иһин күрэхтэстэ. Хаҥалас улууһуттан сылдьар эдэр учуутал Василий Марков, үөрэх эйгэтигэр үлэлээбитэ төрдүс сыла. Маннык улахан таһымнаах куонкуруска аан бастакытын кыттар. Кыттааччылар бары күүстээхтэр, уопуттаахтар. Куонкурус кэмигэр элбэҕи, саҥаны биллим диэн этэр.
Василий Марков, Покровскайдааҕы 1№- дээх орто оскуола математика учуутала: “Бу күрэх улахан уопуту биэрэр. Күүстээх учууталлары кытары билистим, доҕордостум. Инникитин салгыы билсэн, бииргэ үлэлэһэн өссө күүстээх буолуохпут дии саныыбын. Кыттааччы учууталлар бары олус күүстээхтэр. Ол эрэн Гоголев Павелга ыалдьабын”.
Бүтэһик түһүмэххэ биэс бастыҥ учуутал талыллынна. Таатта лицейын история уонна обществознание учуутала Вера Михайлова күрэххэ кыттар улахан ирдэбиллээх, ол эрээри кыаҕы арыйар диэн этэр. Кыттааччыларга күрэх уопут атастаһар, билиини-көрүүнү үллэстэр дьоһун түһүлгэ буолла.
Вера Михайлова, А.Е. Мординов аатынан Таатта лицейын история уонна обществознания учуутала: “Тус бэйэбэр бу күрэх сүрдээх элбэҕи биэрдэ. Манна кэлэн бэйэм уопуппун тарҕаттым уонна ону кытары бэйэм уопут бөҕөтүн ыллым. Ону барытын оҕолорбун үөрэтэрбэр туһаныам”.
Муҥутуур кыайыылааҕынан Дьокуускайдааҕы классическай гимназия история уонна обществознание учуутала Павел Гоголев ааттанна. Бүтүн куорат аатыттан кыттар улахан чиэс, бочуот уонна икки бук эппиэтинэстээх. Учуутал оҕолорго билии биэрэр уонна инники олохторун хайысхатын ыйар аҕа сүбэһит буолар, онон сатабылын, маастарыстыбатын өрүү үрдэтэргэ дьулуһуохтаах.
Павел Гоголев, Дьокуускайдааҕы классическай гимназия история уонна обществознания учуутала: “Учуутал быһыытынан сайдарбар сүрдээх улахан үктэл буолла. Мин үгүс күрэххэ кыттан турабын, бу сэттис сырыым буолар. Олортон дойду үрдүнэн “Сыл бастыҥ учуутала” күрэх саамай үрдүктүк тутуллаллара. Онон бу күрэххэ кыайар сүрдээх улахан чиэс уонна эппиэтинэс”.
Кыттааччыларга, лауреаттарга араас бириистэри, харчынан бириэмийэлэри туттардылар. Оттон кыайыылаах өрөспүүбүлүкэ чиэһин көмүскүү эһиил “Россия бастыҥ учуутала” күрэххэ Саха сирин аатыттан барарга бэлэмнэнэр.