Аллараа Халыма Походскай бөһүөлэгэр 30 сыл буолан баран оҕолору сүрэхтээтилэр

Походскай бөһүөлэгин култууратын дьиэтигэр 30 сыл буолан баран нэһилиэк кырачаан олохтоохторо христианскай итэҕэли ылыналлар.Тихон Сибэтиэй манаах уопсайа 8 оҕону сүрэхтээтэ. Манна бастакы нуучча хаһаактара олохсуйбут сирдэрэ буолан нэһилиэнньэ барыта православнай итэҕэллээх дьон, онон таҥара үлэһиттэрэ кэлбиттэрин мүччү туппакка оҕолорун аҕалбыттар.

Марина Третьякова, Походскай нэһилиэгин олохтооҕо: "Бэйэм уонна кэргэним сүрэхтэммэтэхпит. Ол иһин саатар оҕолорбутун сүрэхтиир баҕа санаалаах этибит".

Сүрэхтэнии кэннэ үөрүүлээх литургия сиэрэ-туома толорулунна. Манна аан бастаан баҕалаах дьон кэлэн аньыыларын-хараларын ыраастатан аҕабыыты кытары кэпсэттилэр.

Бырааһынньыктааҕы литургия кэннэ  аҕабыыты батыһан олохтоох кылабыыһаҕа турар часовняҕа тиийдилэр. Манна  Тихон аҕабыыт тэттик мэлиибэни аахта, нэһилиэккэ Сибэтиэй Троица мөссүөнүн туттарда.

Иеромонах Тихон (Воробьев): “Походскай нэһилиэгин дьонун-сэргэтин таҥара араҥаччылыы, арчылыы сырыттын диэн эрэнэн уонна үҥэн туран Сибэтиэй Троица мөссүөнүн бэлэхтээтибит”.

Нэһилиэк историятыгар киирэр бэлиэ түгэҥҥэ кыттыспыт олохтоохтор үөрэн-көтөн таҥара үлэһиттэрин атаардылар. 30 сыл тухары улахан сулууспа ыытыллыбатах сиригэр "Арктикатааҕы десант" бырайыак ыалдьыттаан кыра нэһилиэк олохтоохторун сэргэхситтилэр.

Салҕыы десант үлэтин Черскэй бөһүөлэгэр ыытта. Манна таҥара дьиэтигэр биир нэдиэлэ устата үлэлээтилэр. Бэргэһэлэнии, таҥара итэҕэлин ылыныы, араас лекциялары, экскурциялары ыыттылар.

Аҕабыыт литургия саҕаланарын колоколлары тыаһатан биллэрэр. Черскэйгэ аҕабыыттара суох. Онон манна таҥара үлэһиттэрэ кэллэхтэринэ өрүүтүн итэҕэллээх дьон кэлэн тоҕуоруһа мустан мэлииппэ ааҕан, үрдүк айыылартан көрдөһөллөр.

Сидор Нестеров, Черскэй бөһүөлэгин олохтооҕо: "Таҥараҕа үгүс дьон улахан кыһалҕаттан кэлэллэр. Холобура, ыалдьаннар. Эмтэнэ сатаан баран таҥараттан көрдөһөөрү".

Олохтоохтор ис сүрэхтэриттэн туран таҥара алгыһын ылыналлар. Мэлииппэни эттэринэн-сииннэринэн аһардан, литургия бүтүүтэ дууһалыын-санаалыын чэпчээбиттии буолаллар.

Александр Дмитриев, Черскэй бөһүөлэгин олохтооҕо: "Киин куораттан таҥара үлэһиттэрэ кэлэннэр биһигини түмтүлэр. Манна олохтоох аҕабыыт суох. Ол иһин куораттан дэҥҥэ кэллэхтэринэ дьон үчүгэйдик мустар".  

Киристиэс араас дьайыылара үтүөрдүү уонна тилиннэрии, олох сирдээҕи дьолун билии, көнө суолга үктэнии, бу манна барытыгар итэҕэллээх дьон таҥара үлэһиттэрин кытары алтыһан, кинилэр мэлииппэлэрин истэн, таҥараҕа тиксиһиннэрбиттэригэр махтаналлар.