Учууталлар иҥэмтиэлээх, түргэнник астанар ас бэстибээлигэр күрэхтэстилэр

Саха сиригэр Учуутал уонна уһуйааччы сыла киэн далааһыннаахтык, үрдүк таһымнаахтык бара турар. Сыл устата учууталларга үөрэтии, саҥа бырагыраамалары киллэрии, уһулуччулаах учууталлары уонна бэтэрээннэри чиэстээһин салҕанар. Учуутал үрдүк аатыгар сүгүрүйэр, кини үлэтигэр болҕомтону тардар инниттэн араас хабааннаах тэрээһиннэр, күрэхтэр ыытыллаллар. Быйыл аан бастакытын "Чэгиэн-чэбдик буол күндү учууталым" диэн бэстибээл ыытыллынна.

Светлана Васильева, "Бэс чагда" оҕону чэбдигирдэр киин  чөл аһылыкка салаатын  салайааччыта: “Бэстибээл оҕо уонна үөрэх эйгэтин үлэһиттэрэ аһылык култууратын сөптөөхтүк туһаналларыгар ананар. Бэстибээл иһинэн үссэнэр аска анаан күрэх буолла, онно 200 тахса үлэ киирдэ. Уруоктар икки ардыларыгар хайдах иҥэмтиэлээхтик аһыыр ньымалары көрдөрдүлэр”.

Доруобуйа олох төрдө. Оҕо уонна учуутал чел аһылыктарыгар болҕомтону түмэр бэстибээлгэ үөрэх эйгэтин бэтэрээннэрэ, эдэр учууталлар, оҕо аһылыгын тэрийэр, чинчийэр институттар, диетологтар кыттыыны ыллылар. Итиэннэ биллэр, уопуттаах асчыттар  үөрэтэр маастар-кылаас ыыттылар.

Дьулустан Решетников “Бэс чагда” оҕону чэбдигирдэр киинигэр эбии үөрэхтээһин педагога. Бэстибээлгэ элбэх кыттааччыттан сүүмэрдээһини ааһан, маастар кылаас биэрэр чиэскэ тиксибит. Кини бэйэтэ чөл олоҕу тутуһар, спордунан дьарыктанар, сөптөөх аһы аһыыр буолан, бу күрэх киниэхэ чугас. Оттон үөрэх эйгэтигэр үлэлиирин быһыытынан учуутал уонна үөрэнээччи сөптөөх, иҥэмтэлээх аһы аһаатаҕына, үлэтэ уонна үөрэҕэ таһаарыылаах буолар диэн этэр.

Дьулустан Решетников, бэстэбээл кыттааччыта: «Күрэххэ балыктаах бутерброд астаатым. Бу бэйэм олус сөбүлээн сиир аһым. Манна кэлбит хас биирдии киһи бэйэтигэр сөптөөх, туһалаах аһы булан көрүө дии саныыбын».

Бэстибээл Дьокуускайдааҕы национальнай гимназияҕа ыытыллынна. Оскуола саха төрүт аһын тарҕатыыга сүрүн болҕомтону уурар. Үөрэх кыһата быйыл өрөспүүбүлүкэ үрдүнэн ыытыллыбыт күрэххэ, бэйэтин концепциятын, хайдах хайысхалаах үлэлиирин көрдөрөн,  бастыҥ остолобуой аатын сүкпүтэ.

Валентина Пермякова, А.Г. уонна Н.К. Чиряевтар ааттарынан Дьокуускайдааҕы национальнай гимназия дириэктэрэ: «Күрэххэ оҕо төрүт аһы билиэхтээх  диэн концепцияны киллэрбиппит. Онон сиэттэрэн менюбутугар төрүт астары киллэрбиппит».

Бэстибээл киэҥ далааһыннаахтык ыытыллынна. Инникитин тэрийээччилэр түһүмэхтэрин, хайысхаларын элбэтэн, өссө элбэх кыттааччыны хабар былааннаахтар.