Норуот депутаттара саҥа салалтаны бигэргэттилэр
Саха өрөспүүбүлүкэтин төрүт сокуонугар олоҕуран Ил Дархан бырабыыталыстыба бэрэссэдээтэлин, кини солбуйааччыларын уонна сүрүн миниистирдэри Ил Түмэнинэн бигэргэтэр. Онон сэттис ыҥырыылаах Ил Түмэн уочараттаах иккис мунньаҕа өрөспүүбүлүкэ саҥа салалтатын бигэргэтиигэ туһуланна. Бырабыылалыстыба бэрэссэдээлин дуоһунаһыгар Кирилл Бычков кандидатуратын кистэлэҥ куоластааһыҥҥа 64 депутат өйөөтө, 2 утарда. Кини ноурот депутаттарын иннигэр инники биэс сылга өрөспүүбүлүкэ сүрүн соруктарын билиһиннэрдэ.
Кирилл Бычков, СӨ Бырабыыталыстыбатын бэрэссэдээтэлэ: «2029 сылга диэри дьадаҥы ахсаанын икки төгүл аччатыахтаахпыт. Ол эбэтэр 70 тыһыынча кэриҥэ киһини тииммэт-түгэммэт балаһыанньаттан таһаарыахтаахпыт. Билигин бу кыһалҕа Бырабыыталыстыба үлэлит сүрүн сыала буолла. Онон атын да соруктар, бырагыраамалар этиллибит сыалы ситиһэр соруктаах үэлиэхтэрэ”.
Маны сэргэ саҥа анаммыт Бырабыыталыстыба бэрэссэдээтэлэ тыа хаһаайыстыбатын сайыннарыыга улахан болҕомто ууруллуоҕун эттэ. Дьоҕус оҥорон таһаарааччыларга, хаһаайыстыбаларга өйөбүл баар буолуо уонна бу салааҕа бөдөҥ инвестициялары көҕүлүүр сорук турарын иһитиннэрдэ. Тыа хаһаайыстыбатын исписэлиистэрин бэлэмнээһиҥҥэ күүстээх сорук турарын бэлиэтээтэ. Өрөспүүбүлүкэ экономикатын, бырамыысыланнаһы сайыннарыы тэтимнээхтик барыа.
Ил Түмэн иккис уочараттаах мунньаҕын бэбиэскэтинэн салгыы Россия Федерациятын Сэбиэтигэр Саха сириттэн бэрэссэдээтэли бигэргэттилэр. Манна Сахамин Афанасьев туһугар кистэлэҥ куоластааһыҥҥа 61 депутат сөбүлэҥин биэрэн, Халыма-Ингигир уокуругун депутата сенаторынан ананна.
Сахамин Афанасьев, Россия Федерациятын Сэбиэтигэр Саха сириттэн сенатора: “Бу миэхэ саҥа хайысха, үлэ буолар. Билигин ханнык кэмитиэккэ киирэн үлэлиэхтээхпин билсэ сылдьабын. Кэлэр нэдиэлэҕэ Москваҕа көтөбүн, онно чопчулуохтаахпын. Сахам сирин дьонугар ханнык хайысхаҕа сыстан үлэбин саҕалыырбын биллэриэҕим”.
Сахамин Афанасьев Саха өрөспүүбүлүкэтин сайдыытын туһунан ураах олоххо киириитигэр үлэлэһиэм уонна дойду барыбыыталыстыбатын, федеральнай министиэристибэлэри кытта үлэлииргэ бэлэммин, өрөспүүбүлүкэ, Ил Түмэн туруорсар боппуруостарын ситимнииргэ сүрүннээн үлэлиэм диэн депутаттар иннилэригэр мэктиэлээтэ.
Салгыы Норуот депуттара Бырабыыталыстыба бэрэссэдээтэлин солбуйааччыларын бигэргэттилэр. Саҥа састаапка бастакы солбуйааччынан Дмитрий Садовников уонна Дьулустаан Борисов ананнылар. Онтон солбуйааччы дуоһунаһыгар Георгий Степанов, Анатолий Семенов, Ольга Балабкина, Сергей Местников бигэргэннилэр. Онтон салгыы сүрүн миниистирдэри норуот депутаттара ылыннылар. Ол курдук Петр Попов экономика миниистиринэн ананна.
Петр Попов, СӨ экономика миниистирэ: «Экономика министиэристибэтин сүрүн сыала-соруга экономика бэлиитикэтин оҥорооһун, инвестиция бэлиитикэтин сүрүннээһин буолар. Ол чэрчитинэн үлэ барыаҕа».
Онтон Павел Багынанов хамсаабат баай-дуол уонна сир сыһыаннаһыыларын министиэристибэтин салайаллара билиннэ. Депутаттар Гаврил Кириллины тас сибээс уонна норуоттар дьыалаларын миниистиринэн ананарыгар сөбүлэҥнэрин биллэрдилэр. Итиэннэ тыа хаһаайыстыбатын миниистиринэн Артем Александров бигэргэннэ.
