Ленскэй булчуттарын туһунан кинигэ таҕыста

139

Быйыл өрөспүүбүлүкэҕэ булт хаһаайыстыбатын 100 сылын бэлиэтииллэр. Ол чэрчитинэн элбэх ааҕааччы биһирэбилин ылбыт саҥа кинигэ Ленскэй оройуонун олохтоохторун үйэтитэр. Кинигэ тахсыбыт сүрүн сыалынан ыччакка дойдунааттыы хорсун санааны иитии, удьуор ситимин уонна үтүө үгүстэри үйэтитии уонна утумнааһын буолар. Манна 106 булчут ахтыыта, 600-тэн тахса булт хаартыската киирдэ.

 

Людмила Зорина,  кинигэ сүрүн эрэдээктэрэ: «Биһиги нэһилиэкпит учууталлара, бибилитиэкэрдэрэ, пенсиялаахтар, энтузиаст дьоннор мустаммыт улууска тахсаммыт, эклогтары, кыраайы үөрэтээччилэри, түмэллэри кэпсэтэммит бу улахан үлэни саҕалаабыппыт. Онуоха олус элбэх киһи өйөөн кинигэ таҕыста».

 

Маны таһынан икки көрүҥ халандаары таһаардылар. Бастакы халандаарга булт аһыттан-үөлүттэн оҥоһуллубут астар рецептэрэ. Бу рецептэри барытын кинигэҕэ киирбит булчуттар кэргэттэрэ киллэрдилэр. Иккис халандаар “Байанай” оройуоннааҕы күрэх 10 сылыгар ананар, манна араас сыллар кыайыылаахтарын хаартыскаларын тистилэр.

 

Николай Додохов, СӨ экология миниистирин солбуйааччыта: «Булт урут экономика өттүнэн олус суолталаах этэ. Харчыны киллэрээччи күндү көмүс түүлээх диэн буолааччы. Билигин ол суолта намтаата. Ол эрэн булт хаһан баҕар баар буолуоҕа. Кэлэр көлүөнэ ыччаппытыгар хаалыахтаах».

 

Кинигэ үөрүүлээх сүрэхтэниитигэр Ленскэй оройуон аҕа удьуор булчуттара кэлэн ыалдьыттаатылар. Олортон биирдэстэрэ 79 саастаах кырдьаҕас булчут Сергей Ощепков буолар.

 

Сергей Ощепков,  булчут: «26 сыл уоппускам аайы бултаабытым. Түүлээхпин судаарыстыбаҕа туттарар этим. Ленскэйгэ хайа баҕар булт баар».

 

Үөрүүлээх тэрээһиҥҥэ национальнай библиотека архыыбыттан булт кинигэлэрин, байанай сурунаал көмүс таһаарыыларын быыстапката буолла. Уонна саха булдун хартыынаҕа тилиннэрбит худуоһунньук Христофор Степанов үлэлэрэ көрдөрүүгэ турдулар.

 

Николай Пахомов, булчут: «Мин бултуурга кыра сааспыттан аҕабын батыһа сылдьан үөрэммитим. Бастаан куска холоммутум, онтон ыла тирэҕирэн бачча сааспар диэри бултуу сылдьабын».

 

 Кинигэ уопсайа 1000 таһаарыылаах. Араас норуоту бэйэтин тула түмпүт Ленскэй оройуон кэрэ айылҕата, киэн туттар дьоно-сэргэтэ, баай устуоруйата барыта бу кинигэҕэ үйэтитилиннэ. Норуот илдьэ кэлбит төрүт үгэһэ, булка, хара тыа иччитигэр сыһыана инникитин даҕаны саха ыччатыгар үтүө холобур быһыытынан тарҕаныаҕа.