Сайылыктан кыстыкка көһүү саҕаланна
300-чэ ыанар ынах сайылыктарыттан кыстыкка көстүлэр. 4 аттаах бостуук тула күөйэн, суолу туоратан хороҕор муостаахтары арыаллаатылар. Нөмүгү бөдөҥ хаһаайыстыба 2 хотонунан кыстаан олорор. Сыл бүтүүтэ 520 төбөнү хаалларан кыстаталлар. Олортон ыанар ынаҕа 300 миэстэлээх хотоҥҥо, оттон субай сүөһү уонна ньирэйдэр туспа хотоҥҥо кыстыыллар.
Людмила Реева, Нөмүгүтээҕи "Туймаада" экоферма агронома: “Быйаҥнаах сайын ааста диэххэ наада. Бэриллибит былааммытын барытын куоһардыбыт. Ол курдук оппут былаанын 117% гынныбыт. Ону тэҥэ 2700 туонна сиилэс уктубут уонна 700-чэкэ туонна сенаж. Сүөһү аһын бэлэмнээһин бырагырааматынан билигин сирдэрбитин оҥорууга киирдибит”.
Сайын устата үүккэ, от үлэтигэр былааннарын куоһаран кыстыкка киирэргэ толору бэлэмнэр. Маны таһынан быраҕыллыбыт бааһыналары сөргүтэргэ үлэ эмиэ бара турар. Сылтан сыл ас таһаарар бааһыналара кэҥээн, тиэхэньикэлэрэ эбиллэн хаһаайыстыбалара кэҥээн иһэрин үллэстэллэр.
Дмитрий Захаров, Нөмүгүтээҕи "Туймаада" экоферма сэбиэдиссэйэ: "Эһиил хотоммутун саҥардар уонна үлэһиттэргэ анаан уопсай дьиэ тутарга былаанныыбыт. Агрохолдинг өйөөтөҕүнэ бу баҕа санаабытын толоруо этибит. Оччоҕо субай сүөһү, ыанар ынах ахсаанын элбэтэр соруктаахпыт".
Күҥҥэ биир туонна 650 лиитирэ үүт ыаныллар. Ыаныллыбыт үүт барыта Дьокуускайдааҕы үүт собуотугар туттарыллар. Онон бастыҥ хаачыстыбалаах үүт оҥоһуллан тахсарыгар "Туймаада" экоферма Нөмүгүтээҕи салаатын 40-чэ үлэһитэ кыһаллар. Олортон биир саамай уопуттаах бастыҥ үлэһиттэрэ зоотехник Евдокия Устинова буолар.
Евдокия Устинова, Нөмүгүтээҕи "Туймаада" экоферма зоотехнига: "Быйыл саҥа дьылтан төрүөхпүт үчүгэй. 195 төбө ньирэйи ыллыбыт. 8 ый түмүгүнэн үүппүт былаанын 117% толордубут. Онон үлэ күргүөмнээхтик бара турар. Аспыт-үөлбүт бэлэм".
Мантан кыһын үлэ таһаарыылахтык барарыгар бары усулуобуйа тэрилиннэ. Хотоннорун өрөмүөннээн, сууйан-тараан хороҕор муостаахтары көрһөргө бэлэмнэр. Кырыа кыһыны этэҥҥэ кыстаан аны кэлэр сыл күөххэ үктэнэн саҥа хотон тутуутугар киириэхтэрэ. Оччоҕо өрөспүүбүлүкэни бастыҥ аһынан хааччыйан олорор хаһаайыстыба өссө кэҥиирэ күүтүллэр. Оттон үлэһиттэргэ уопсай дьиэ тутулуннаҕына, баҕалаах дьоҥҥо үлэ миэстэтин таһаарыахтара.
