"Арктикатааҕы десант" Аллараа Халыма оҕолоругар араас тэрээһиннэри ыытта

Эмсэҕэлээбиккэ бастакы көмөнү оҥоруу, ыксаллаах түгэҥҥэ сөптөөх быһаарыны ылыныы. Ханнык баҕарар түгэҥҥэ киһи олоҕун быыһыан сөп. "Кыһыл кириэс" саха сиринээҕи салаатын волонтера Александр Громов Саха сиринээҕи Епархия "Арктикатааҕы десант" бырайыагынан Аллараа Халыма улууһун оскуолаларын кэрийэ сылдьан ыксаллаах быһыы-майгы түгэнигэр киһи олоҕун хайдах быыһыахха сөбүн үөрэтэр.

Александр Громов, "Кыһыл кириэс" Саха сиринээҕи салаатын ыксаллаах быһыыны  сүрүннүүр хайысхатын салайааччыта: «Оҕолорго бастакы көмөнү оҥорууну үөрэттибит. Манна бастатан туран, эмсэҕэлээбит киһини көрөн баран тута тугу гыналларын кэпсээтибит, көрдөрдүбүт. Ордук өйдөнүмтүө буоллун диэн хас да түбэлтэни ырытан көрдүбүт. Ол курдук ууга түспүт, тыына хаайдарбыт киһиэхэ тыын киллэри үөрэттибит».

Бастакы көмөнү оҥорууга Черскэй эрэ оҕолоро буолбакка Походскай бөһүөлэгин үөрэнээччилэрэ эмиэ үөрэннилэр. Уу таһыгар олорор буоланнар бастатан туран, ууга түспүт киһини быыһааһыҥҥа сүрүн болҕомтону уурдулар.

Онтон Оҕо айымньытын дьиэтигэр уруһуй күрэҕин ыыттылар. Манна таҥас суумкаҕа "Мин Арктикам" диэн темаҕа уруһуйдаатылар. Оҕолор төрөөбүт дойдуларын ким хайдах көрөрүнэн айан таһаардылар. Күрэх түмүгэр кыайыылааҕы быһаардылар

Нина Барашкова, Саха сирин бэтэрээннэрин, пионерскай уонна оҕо хамсааһынын холбоһуктарын бэрэссэдээтэлэ: «Ордук туһалаах уонна үйэлээх буоллун диэн таҥас суумкаҕа уруһуйдаттыбыт. Оҕолор олус сэҥээрэн таҥас кырааскатынан араас ойуулары түһэрдилэр».

Оҕолор араастаан төрөөбүт дойдуларыгар тапталларын, бэриниилээхтэрин ойуулаатылар. Кимнээх эрэ араас дьикти оһуордарынан, кимнээх эрэ суругунан тистилэр. 9 кылаас үөрэнээччитэ Дария Габайдулина төрөөбүт дойдутун бу курдук хоһуйбут.

Дария Габайдулина, Черскэй орто оскуолатын 9-с кылааһын үөрэнээччитэ: «Мин дойдубар тапталы уруһуйдаатым. Сахабыт сирэ төһө да тыйыс тымныы буоллар биһиги олус таптыыбыт, ханна да буолларбыт өрүү ахтабыт уонна төннө турабыт».

Күрэх кыттыыллаахтарыгар, бастыҥ уруһуйдаахтарга тэрийээччилэр өйдөбүнньүк суруктары, араас бириистэри туттардылар. Онтон кинилэр уруһуйдара атын эмиэ хоту уһук сытар улуус оҕолоругар бэлэх буолан барыаҕа.