"Сылаас күһүн" аахсыйа салҕанар

Виктор Павлов волонтердар хамсааһыннарыгар киирбитэ сэттис сыла. Өрөспүүбүлүкэтээҕи уопсастыбаннай хамсааһын киинигэр куруук кэлэн көмөлөһөр. Бу сырыыга табаарыстарын кытта чүмэчи оҥорорго көмөлөһө кэлбиттэр.

Виктор Павлов, волонтёр: "Бу оҥорор сүмэчилэр анал байыаннай дьайыыга сылдьар уолаттарбыт  тимир оһох иһигэр уганнар окуопаларын ититэллэригэр итиэннэ тимир бааҥка үрдүгэр чэйдэрин сылытталларыгар анаан оҥоһуллаллар".

Ыстаапка ким баҕалаах кэлэн көмөлөһөр. Аҕам да саастаахтар, эдэр ыччаттар бары биир санаанан сомоҕолоһон күүс - көмө буолаллар. Үөрэх кыһалара, устудьуоннар анаммыт бириэмэнэн кэлэн үлэлииллэр. Дьокуускайдааҕы речной училище устудьуоннара, бу нэдиэлэ устата ыстаапка көмөлөһүөхтэрэ.

Алина Антонова, Дьокуускайдааҕы өрүс училищетын 2 кууруһун устудьуона: "Училищеттан уонча буолан кэллибит. Биһигини сиэккэ баайарга үөрэттилэр. Уустук соҕус эбит, онтон илиибит баран син үөрэннибит".

Аҕам саастаах Людмила Андросова Уус Алдан улууһун түмсүүтүн салайааччыта. Тэрилтэлэртэн, улуустартан, түмсүүлэртэн уонна биирдилээн дьонтон көмө тохтообокко киирэ турар диэн этэр. Саҥа көмөлөһө кэлбит дьоҥҥо хайдах сиэккэ өрөрү, таҥас тигэри барытын үөрэтэн, көрдөрөн биэрэбит диэн кэпсиир.

Людмила Андросова, волонтёр: "Күн аайы устудьуоннар кэлэн көмөлөһөллөр. Тыа хаһаайыстыбатын техникума кэлиэхтээх, медицинэ колледжа нэдиэлэ көмөлөспүтэ. Оҕолору сиэккэ баайыытыгар сыһыарабыт. Билигин күһүҥҥү кэм буолан саһархай өҥнөрү туттабыт".

Кииҥҥэ киирбит көмөнү суулаан, сааһылаан наардыыллар. Ааспыт нэдиэлэҕэ 2 туонна көмөнү номнуо ыыппыттар. Бу күннэргэ туоннаттан тахса таһаҕас ыытыллаары турар. Балаҕан ыйыттан алтынньы 10 күнүгэр диэри "Сылаас күһүн" диэн аахсыйа биллэриллибитэ, онон көмө киириитэ элбээбит. 

Анна Фомина, "Якутия с тобой" уопсастыбаннай хамсааһын бэрэссэдээтэлин солбуйааччы: "Эмп-томп уонна сиэккэлэр бардылар. Ону таһынан бородуукта ыыттыбыт. Өрөспүүбүлүкэ салалтата таһаҕас ыытарбытыгар олус көмөлөһөр, онон барыта босхо тириэрдиллэр".

Өрөспүүбүлүкэтээҕи уопсастыбаннай хамсааһын киинэ тэриллэн үлэлээбитэ биир сыл буолла. Биир сыл иһигэр 80 туонна таһаҕас, 3 мөлүйүөнтэн тахса харчы көмө хомуллан ыытыллынна. Онон Саха сирин дьоно-сэргэтэ түмсүүлээхтэрин, биир сомоҕо буолалларын бигэргэтэллэр.