Саахалга түбэспиттэри быыһыыр медициинэ балтараа тыһыынча көтүүнү оҥордо

Күн-дьыл уларыйыытын кытары ыалдьар дьон ахсаана, саахалга түбэһии көрдөрүүтэ биллэ үрдүүр. Ону кытары эмчиттэр үлэлэрэ күүһүрэр. Саха өрөспүүбүлүкэтин саахалга түбэспиттэргэ көмөлөһөр киинин үлэһиттэрэ бу кэмҥэ үлэлэрэ элбиир. Холобура, күн бүгүн тустаах сулууспа үлэһиттэригэр сыл саҕаланыаҕыттан 1646 суһал иһитиннэрии киирэн, 1587 көтүү ааһан, 2300-тан тахса ыарыһах киин куоракка тириэрдиллиннэ.

Туйаара Никандрова, СӨ саахалга түбэспиттэргэ көмөлөһөр киинин суһал анал көмө уонна эвакуация салаатын сэбиэдиссэйэ: «Биһиги АН-24, АН-26 сөмөлүөттэринэн уонна МТВ-МИ-8 бөртөлүөтүнэн көтөбүт. Биһиэхэ хирургтар, анестезиологтар, педиатрия, нейрохирургия, гинегологическай уонна травматология  биригээдэлэрэ бааллар».

Холобура, устар белех үлэлиир кэмигэр Булуҥ улууһун кинигэр уонна Кэбээйи Сэбээн-Күөлүгэр суһал иһитиннэрии киирэн, биригээдэлэр сып-сап оҥостон, онно көттүлэр. Манна даҕатан эттэххэ, исписэлиистэр иһитиннэрэллэринэн үгүс көтөн кэлээччилэр тымыр-сүрэх ыарыһахтара, онтон ис-үөс уонна биллэн туран саахалга эчэйээччилэр.

Егор Сукулов, СӨ саахалга түбэспиттэргэ көмөлөһөр киинин гражданскай оборонаҕа уонна ыксаллаах быһыы-майгы салаатыгар кылаабынай бырааһы солбуйааччы: «Суһал көмө биригээдэлэрэ диэн сорудахтаах олоробут. Күн бүгүн 250-чэ биригээдэ баар, маны сэргэ сиэстэрэлээх быраас биригээдэлэрэ эмиэ 300 – чэкэ баар».

Тустаах тэрилтэ анал туспа эбийиэккэ Дьокуускай куоракка түөлбэлээн олорор. Кэллэктиип улахан. Хас да салаанан үлэлииллэр.

Күннэтэ санитарнай көтүүлэри тэҥэ, эмчиттэр үөрэхтэри ааһаллар. Атын тэрилтэлэри кытары үлэлэһэллэр, маныаха  билигин өссө анал байыаннай дьайыыга барар дьоҥҥо үөрэх ыыталлар.

Халлаанынан дайан, ыраах сытар улуустарбыт ыарыһахтарын күннэтэ быыһыыр үрүҥ халааттаах аанньаллар бу курдук үлэ үөһүгэр сылдьан, сорудахтарын толороллор.