Тулагы быйаҥнаах сиригэр үүнүү үчүгэй

Быйаҥнаах сирдээх Тулагы нэһилиэгэр оҕуруот аһын үүннэриинэн дьарыктаммыттара быйыл 8-с сыла.  Сыл аайы кыра-кыралаан  көрүҥнэрин, суортарын  элбэтэн иһэллэр. Быйыл 12 гектарга хортуоппуй олордуллубутуттан суорт-суорт араас үүнүүнү биэрдэ. Екатерина Котрус сиэмэтиттэн 1 гектартан 20-22 туоннаны, оттон Якутяночка суортан 10 туоннаны ыллылар. Хортуоппуйу көрүҥнэринэн,   көрүү- истии эмиэ араастаһар, холобур Якутяночка  суорта ууга олох наадыйбат, Ред карлик төттөрүтүн ууга быдан наадыйарын Маргарита Капитонова бэйэтин уопуттуттан үллэстэр. Оттон ууну таптыыр хаппыыстаны Өлүөнэ өрүс кытыытыгар 2019 сылтан олордоллор.

Маргарита Капитонова, бааһынай хаһаайыстыба салайааччыта: "Хаппыыстаны кулун тутар бүтэһигиттэн олордон саҕалыыбыт. Рассадаларбытын бааһынаҕа бэс ыйын саҥата таһаартыыбыт. Онтон сайыны быһа бүөбэйдиибит. Ууну ыһан кутар ньыманы быйыл туһанныбыт, эрдэ таммаҕынан кутары боруобалыы сылдьыбыппыт да сөбүлээбэтэхпит".

Ринда, Коля, Мегатон - хаппыыста хас да көрүҥүн олордон быйылгы дьылга 120 туоннаны хомуйары былаанныыллар. Сайын Тулагы орто оскуолатын оҕолоро кэлэн сыыс оту үргээн көмөлөһөн бараллар, оттон күһүн быйылгы хомуурга Егор Алексеев өйөбүлүнэн АГАТУ устудьуоннара кэлэн күүс-көмө буолбуттарын хаһаайыстыба салайааччыта бэлиэтиир.

Хомуллубут хаппыыстаны куорат ыскылаадын кытта дуогабардаһан онно туттараллар, уонна нэһилиэктэри кэрийэн минньигэс бэйэ үүннэрии аһын атыылыыллар. Оҕуруот аһа атыыга куруук барар, бэйэ аһын дьон ордук астынан ылар.

Хаппыыстаны улахан сытыы быһаҕынан быһан ылан куулга хаалыыллар. Биир куулга 30-ча хаппыыста киирэр.

Элбэх үүннэриини харайар сирдэрэ суох буолан - улахан кыһалҕаны үөскэтэр. Оҕуруот аһын харайар сир көрүллэрэ буоллар, хаһаайыстыба өссө дэлэйэн, үүннэриитин элбэтиэ этэ. Билигин Маргарита үүннэрэр хаппыысталара түргэнник буорту буолбат суортар, сааскыга диэри харайыытын таптахха төһө баҕарар турар кыахтаахтар.

Биир гектартан ордук сиргэ ыам ыйын ортотуттан саҕалаан моркуоп ыспыттара. Сиэмэтэ бытархай буолан, үүнэн истэҕин аайы сыста үүммүтүн сайыны быһа араартыыллар. Оннук араардахха эрэ бөдөҥ аһы ылаҕын.

Маргарита Капитонова, бааһынай хаһаайыстыба салайааччыта: "Билигин Витаминный диэн суорду хостуу сылдьабыт. Атырдьах ыйыгар олус үчүгэйдик бөдөҥөөтө. Быйыл моркуобу бастакытын олортубут. Былырыын дьиҥэ ыспыппыт эрээри үлэһит илии тиийбэккэ куоттаран кээспиппит. Онтон быйыл дьаныһан туран бүөбэйдээн-бүөбэйдээн олус үчүгэй үүнүүнү ыллыбыт".

Сааһын аайы оҕуруот сирин уу ылар буолан, эһиилги дьылга теплицэлэрин атын сиргэ көһөрөр былааннаахтар. Оччоҕо теплицэҕэ үүнэр оҕуруот аһын дэлэтиэхтэрэ. Холобур, быйыл клубниканы боруобаҕа олордубут буоллахтарына, эһиил элбэтэр соруктаахтар.