Онкологтар ыарыыны эрдэ сэрэтии тула кэмпириэнсийэҕэ түмүстүлэр

Сыллата өрөспүүбүлүкэҕэ икки аҥар тыһыынча искэҥ ыарыылаах дьон булуллар. Мантан аҥардара, хомойуох иһин, номнуо 3,4 стадияҕа тиийбиттэрин кэннэ. Рак курдук ыарахан ыарыыны утары охсуһа сылдьар үрүҥ халааттаахтар кэмпириэнсийэлэригэр ити хобдох көрдөрүүнү тупсарар, ыарыы саҥа үөскээн эрдэҕинэ булар ньымалары тула барда. Тэрээһиҥҥэ этиллибитинэн онкология бүтэһик сылларга үрдүк таһымҥа таҕыста. Ол курдук күүстээх оборудованиелар, үрдүкү кылаастаах исписэлиистэр баар буоллулар. Маныаха  учуонай, медицинскэй наука дуоктара Петр Иванов өҥөтө улахан. Кини өр сылларга каадыры бэлэмнээһиҥҥэ итиэннэ бу хайысхаҕа хирургия сайдыытыгар үлэлэстэ. Онон Петр Михайловиһы  мээнэҕэ Саха сирин онкологтара бары учууталбыт диэн ааттаабаттар.

Елена Александрова, Дьокуускайдааҕы онкология диспансерын химиятерапия салаатын сэбиэдиссэйэ: "Биһиги профессорбыт Петр Михайлович 85 сааһын туолбутунан бу улахан кэмпириэнсийэ оҥорорго сананныбыт. Үгүс быраас түмсэн ыарыыны быһаарар уонна эмтиир тула кэмпириэнсийэ. Өрөспүүбүлүкэттэн араас хайысхалаах быраастар кэллилэр".  

Каадыры бэлэмнээһиҥҥэ улахан болҕомто уурулларын кэмпириэнсийэҕэ эттилэр. Аҕыйах сыллааҕыта арыллыбыт онкология кафедрата саҥа диспансер дьиэтэ үлэҕэ киириитигэр туһулаан быраастары бэлэмниир. Маны сэргэ  исписэлиистэри билигин медицинэ институтугар эрэ буолбакка техническэй хайысхалаах үөрэх кыһаларыгар эмиэ уһуйуллаллар.    

Феодосия Иванова, СӨ доруобуйа харыстабылын министиэристибэтин сүрүн онколога: "Ол курдук биһиги каадырдарбыт Москваҕа улахан онкология кииннэригэр, тас дойду улахан күүстээх окология институттарыгар бараннар хирургтарбыт үөрэннилэр. Инньэ гынан хирургия өттүгэр сайдыы барда. Үрдүкү технологиялаах эпэрээссийэлэри оҥорор кыахтанныбыт. Онкология ыарыытын утары охсуһуу бырагырааматынан араас оборудованиелар ылылынна, онон урукку сыллары кытары тэҥнээтэххэ биллэ тубустубут диэххэ сөп".  

Үрдүкү кылаастаах эпэрээссийэлэри оҥорууга быраас билиитин, сатабылын таһынан медицинскэй сиэстэрэ түргэн тарҕан туттуута, саҥа оборуодованиелары хируру кытта тэҥҥэ баһылааһына ирдэнэр. Онон онкология курдук ыарахан ыарыыны кытары охсуһууга медицинскэй сиэстэрэ оруола улахан. Кэмпириэнсийэҕэ Лена Дьячковская үрдүкү технологиялаах эндохиругическай эпэрээссийэ кэмигэр сиэстэрэ көмөтүн туүунан дакылааты аахта.

Лена Дьячковская, Дьокуускайдааҕы онкология диспансерын эпэрээссийэлиир салаатын сиэстирэтэ: "Медицинэ иннин диэки хардыылыыр да хирургтарбыт онно үөрэнэн иһэллэр, онтон биһиги эмиэ тэҥҥэ барсан иһиэхтээхпит. Эпэрээссийэ сиэстэрэтэ ол технологияларга хайдах бэлэм буолуохтааҕын, киниттэн туох ирдэнэрин туһунан анал брошюра оҥорбуппут ону билиһиннэрэ кэллим".

Рак курдук ыарахан ыарыыны эрдэ быһаарар уонна эмтиир ньымалар тустарынан үгүс дакылааты кэмпириэнсийэ кыттыылаахтара иһиттилэр. Ол курдук сардаҥанан эмтээһин, суһал көмөнү оҥоруу уонна "Онпоиск” бырагырааманы сайыннарыы тула кэпсэтии таҕыста. Итиэннэ бу кыһын үлэҕэ киириэхтээх онкология диспансера арылыннаҕына өссө киэҥ далааһыннаах үлэ күүтэрин эттилэр.