"Арктическай десант" Аллараа Халымаҕа

"Айыы тойон абыраа" - диэн көрдөһөн Александр уонна Ольга бэргэһэлэниилэрин сиэрэ-туома толоруллар. Тихон Иеромонах Черскэйдээҕи Рождество Христово  таҥара дьиэтигэр өр сыллар тухары ыытыллыбатах бэлиэ сүдү суолталаах сулууспаны толордо. Манна бөһүөлэк олохтоохторо уонна бэргэһэлэнээччилэр чугас доҕотторо, аймахтара кэлэн кыттыыны ыллылар.

Бэргэһэлэнээччилэр таҥара иннигэр андаҕар тылын этэн, үйэлээх тапталга угуттанан, бэйэ-бэйэҕэ истиҥ сыһыаны, олох суолун устун бииргэ буолуохпут диэн туран таҥара бэргэһэтин кэтэллэр. 

Александр уонна Ольга 34 сыл устата бииргэ олорон, 6 оҕону төрөтөн-иитэн таһаардылар. Кинилэр иккиэн  Черскэйдээҕи оҕо искусствотын оскуолатын учууталлара, устудьуоннуу сылдьан билсэн, үөрэхтэрин бүтэрэн Черскэйгэ көһөн кэлбиттэрэ, онтон ыла бииргэ олороллор.

Ольга Дмитриева, бэргэһэлэнээччи:  "Бу үрдүк суолталаах күҥҥэ биһиги өр сыл бииргэ олорон баран быһаарынныбыт. Ыал буолбуппут быйыл 34 сыла. Оҕолор номнуо улааттылар. Атын улахан куоракка бэргэһэлэнээри гыммыппытын эһиги епархияҕыт атын диэн аккаастаабыттара. Онон дьиэбитигэр бэргэһэлэнэрбитин үрдүкү таҥара бэйэтэ анаабыт эбит".

Александр Дмитриев, бэргэһэлэнээччи: "Таҥара аан дойду үрдүнэн дьон-аймах ортотугар биир. Ону итэҕэйиэххэ наада уонна сүгүрүйүөххэ наада дии саныыбын. Ол иһин биһиги кэргэммин кытта таҥара дьиэтигэр бэргэһэлэннибит".

Бэргэһэлэнээччилэри аҕабыыт сиэтэ сылдьан Аналой тула 3 төгүл эргийэр, бу олох устун бииргэ буолуу бэлиэтэ уонна кэргэнниилэр үөрүүнү-хомолтону бииргэ үллэстэллэрин туоһутунан биир иһиттэн кыһылы иһии буолар. Бу кырдьык даҕаны Черскэй бөһүөлэгэр олоххо биирдэ буолар эриэккэс көстүү.

Иеромонах Тихон (Воробьёв): "Бэргэһэлэниигэ эдэрдэри тэҥэ өр сыл бииргэ олорбут дьон сырыттылар. Бу олус хайҕаллаах. Кинилэр бэйэлэрин кэмигэр араас төрүөтүнэн таҥара алгыһын ылбатахтар, ол эрэн бу наадалааҕын өйдөөн туран билигин бэргэһэлэннилэр. Кинилэр бииргэ олорбут уонна инникитин бииргэ буолар кэмнэрин таҥара көмөтүнэн иллээхтик-эйэлээхтик, уйгулаахтык олороллорун көрдөһөллөр".

Кэргэнниилэргэ анаан таҥара дьиэтигэр сиэр-туом толоруллар кэмигэр хор ырыаһыттара таҥараҕа сүгүрүйүү ырыатын ыллыыллар. Таҥара алгыһын ылыммыт ыалга инники олорон кэлбит олохторун уонна олоруохтаах кэмнэрин алҕаан, кинилэри уруйдуур ырыа ананар.

Антонина Анисимова, таҥара дьиэтин хорун ырыаһыта: "Таҥараны уруйдуур, таҥара бэргэһэлээбит дьонун этэҥҥэ олороллрун туһугар ырыалары ыллаатыбыт".

Бэргэһэлэммит ыалга Иеромонах Тихон туоһу суругу туттарда, мантан ыла кинилэр таҥара алгыһынан олоруохтара, сирдээҕи олох бүппүтүн да кэннэ кинилэр үйэлээх олохторо салҕаныаҕа.