Тулагы иһинээҕи суоллары оҥороллор

Улахан техника хайыр тааһы уонна кыһыл кумаҕы бииргэ холбоон булкуйар.  Быйыл  тустаах нэһилиэккэ хаһааҥҥытааҕар да көдьүүстээх үлэ барар.  Ол курдук Тулагы-Киллэм нэһилиэгин 3 уулуссатыгар  Первомайскай, Совхознай уонна Строительнай уулуссаларга суолу өрөмүөннээһин үлэлэрэ ыытыллаллар.

Любовь Баишева, Тулагы-Киллэм нэһилиэгин дьаһалтатын сүрүннүүр исписэлииһэ: "Быйыл биһиги суолларбыт бырагыраамаҕа киирэннэр оҥоһулла сылдьаллар. Уопсайа балтараа тыһыынча миэтэрэ суол саҥардыллыаҕа. Маны сэргэ Первомайская уулуссаҕа 600 миэтэрэ аспаал уурулунна. Эһиил өрөмүөн үлэтэ салҕаныа".

Чахчы, саамай киин Первомайскай уулуссаҕа аспаал тэлгэнэн бөһүөлэк иһэ биллэ тубуста. Ону кытары саҥа суол бэлиэлэрэ, сатыы сылдьааччыларга туһуламмыт бэлиэлэр, уот остуолбалара турдулар. Оттон суолу өрөмүөннээһин үлэлэрин "Якутдорстрой" тэрилтэ  сайынтан саҕалаан, билигин номнуо бүтэрэр түһүмэххэ чугаһаан эрэр.

Кыһыл кумаҕынан көрөн сыппыт уулуусса таас кутулубут. Совхознай уулуссаҕа эмиэ маннык хабааннаах үлэлэр аастылар. Онон икки уулуссаны холбоон, уопсай ыытыллыбыт үлэ 900 миэтэрэҕэ тэҥнэстэ. Билигин манна хайыр таас кутуллан, саас, күһүн күн-дьыл уларыйар кэмигэр олохтоохтор туох да күчүмэҕэйи көрсүөхтэрэ суоҕа. Онон манна саамай үөрбут дьон олохтоохтор, суоппардар. Улахан үөрүү, биллэн туран, киин уулусса аспаалынан тэлгэммитигэр сытар.

Максим Игнатьев, Тулагы-Киллэм нэһилиэгин олохтооҕо: "Тулагы- Киллэм олохтоохторо махтанабыт уонна үөрэбит суолбут оҥоһулларыттан. Аспаал суолбут 90-с сыллар саҥаларыгар оҥоһуллубутунан сыппыта, дэлби алдьанан, кээһэнэн айанныырга табыгаһа суох этэ. Онтон билигин саҥа аспаал ууруллан үөрүүбүт улахан".

"Хаачыстыбаннай уонна куттала суох суоллар" судаарыстыбыннай бырагыраама чэрчитинэн үлэлэр өссө да барыахтара. Ол курдук, Тулагы  Сыырдааҕын Скрябин аатынан уулуссатыгар, маныаха 5 кыра уулуссаҕа өрөмүөн үлэлэрэ барыахтара. Итиэннэ Тулагы-Киллэмҥэ киирэр Капитоновка сэлиэнньэтигэр эһиил Заречнай уулусса суолун өрөмүөннүөхтэрэ.  Онтон салгыы 2025 сылга элбэх оҕолоохторго бэриллибит учаастактарга киирэр суолу оҥорор сорук турар.