Айсен Николаев Ил Дархан дуоһунаһыгар иккис төгүлүн киирдэ

Саха сирин Судаарыстыбаннаһын күнүгэр, иккис болдьоххо талыллыбыт Ил Дархан Айсен Николаев дуоһунаьыгар киирэр үөрүүлээх тэрээһинэ буолла. Бу күн Суорун Омоллоон аатынан Опера уонна балет тыйаатарыгар элбэх киһи муһунна. Манна өрөспүүбүлүкэ салалтата, депутаттар, улуус баһылыктара, Ытык Сүбэ, уопсастыбаннас, бэтэрээннэр, эдэр ыччат араас эйгэҕэ улэлиир дьон кыттыыны ылла.  Үгэс быһыытынан саҥа талыллыбыт Ил Дархан икки тылынан андаҕайда.

Айсен Николаев, Ил Дархан: "Саха өрөспүүбүлүкэтин Ил Дарханын эбээһинэһин үтүө суобастаахтык толоруом. Россия Федерациятын Контитуциятын уонна федеральнай сокуоннары, Саха өрөспүүбүлүкэтин төрүт сокуонун тутуһуом. Өрөспүүбүлүкэ омук, суудаарыстыба быһыытынан анал туругун уонна элбэх омуктаах бар дьонуну туһун көмүскүөм".

Ил Дархан Айсен Николаев биэс сыл иһигэр үрдүк таһаарыылахтык үлэлээтэ. Бары хайысхаҕа уһулуччу таһым олохтонно. Саҥа баараҕай тутуулар, эбийиэктэр үлэҕэ киирдилэр. өрөспүүбүлүкэ үрдүнэн социальнай эбийиэктэргэ улахан болҕомто уурулунна. Аныгы кэм ирдэбилигэр эппиэттиир, оҕо сайдарыгар толору хааччылыллыбыт  51 оскуола, 70 оҕо уһуйаана тутулунна. Сыл бүтүүтэ өссө 16 үөрэх кыһата уонна 6 оҕо уһуйаана киирэрэ былааннанар. Маны тэҥэ нэһилиэнньэ чөл туруктаах, уһун үйэлэнэрин туһугар доруобуйа харыстабылын эйгэтигэр үгүс тутуу барда. Онуоха "Доруобуйа харыстабыла" национальнай бырайыак күүс-көмө буолла. Бу сылы баттаһа аны онкология диспансера үлэҕэ киириэҕэ.

Светлана Давыдова, СӨ норуодунай дьокутаата, Дьокуускайдааҕы 3№ - дээх балыыһа кылаабынай бырааһа: “2021 сыллаахха Айсен Сергеевич “Доруобуйа харыстабылын 10 сыла” диэн уураах ылбыта маны сэргэ  “Доруобуйа харыстабылын сайдыыта” диэн улахан дьаһал ылыллан турар. Бу дьоһуннаах быһаарыылар ылылыннаннар билигин нэһилиэнньэ ахсаана мөлүйүөҥҥэ тиийдэ, онтон салгыы да демография сайдан, нэһилиэнньэ доруобуйата тупсан өссө үрдүк көрдөрүүлэргэ тахсыахпыт дии саныыбын”.

Кэнники сылларга тыа хаһаайыстыбата лаппа тубуста. Бэйэ оҥорон таһаарыыны сайыннарыыга, олохтоох бородууксуйанан хааччыйыыга оҥкул уурулунна. Саха сирин бородууксуйата, сибиэһэй иҥэмтиэлээх аһа атын регионнарга тиийэ тарҕанна. Инникитин тыа хаһаайыстыбатын саҥа үрдэлгэ таһаарарга, өссө киэҥник биллэрэргэ, бу эйгэҕэ үлэлиир дьоҥҥо улахан болҕомто ууруллуоҕа.

Никита Андреев, Горнай улууһун баһылыга: “Биһиги оҥорон таһаарар хаһаайыстыбаларбыт таһымнара үрдээтэ, атыттары кытары күрэстэһэр кыахтаннылар”.

Айсен Николаев үлэлиирин тухары өрөспүүбүлүкэни сатабыллаахтык салайан кэллэ. Култуура, үөрэх, доруобуйа, спорт, тутуу уонна да атын эйгэлэргэ саҥа сүүрээннэр киирдилэр, тутуулар тэтимирдилэр. Билиҥҥи соругунан саха норуота бэйэтин култууратын, үгэһин, тылын-өһүн харыстаан хаалара, атын дойдулартан хаалсыбакка сайдара буолар.

Наталья Харлампьева, Саха норуодунай суруйааччыта: «Саха эр киһитэ саадаҕын үстэ курданар диэн саха өһүн хоһооно баар. Ону биһиги этиэхпитин сөп, Айсен Сергеевич саадаҕын иккистээн курданна. Бу сылларга Россия үрдүкү салалтатыгар суолу тэлэн, тылын ылыннаран Өлүөнэ нөҥүө муоста тутуллар боппуруоһун быһаарбыттан мин өрөспүүбүлүкэ олохтооҕун быһыытынан олус үөрэбин».

Саха сирэ  саҥа таһымҥа тахсар. Бу кэм устата үрдүк таһаарыылаах социальнай-экономическай өрүтүнэн дойдуга биир бастыҥнарга киирэри ситистэ.  Айсен Николаев Ил Дарханныыр кэмигэр биһиги региоммут нэһилиэнньэтин ахсаана мөлүйүөҥҥэ тэҥнэстэ. Аны өр күүтүүлээх муоста тутуллар буолла. Инники соруктары Саха сирин дьоно уруйдуур!