Айар дьоҕуру сайынаннарар оскуола аһылынна

47 мөлүйүөн сууммалаах граҥҥа тиксэн Аграфена Макарова аатынан Дьокуускайдааҕы куултуура уонна искусство колледжын иһигэр саҥа тупсаҕай айар дьоҕуру сайыннарар оскуола арыллан үлэтин саҕалаата. Саха сиригэр бастакы айар дьоҕур оскуола тэриллэн, барыта саҥа тэрилинэн, тиэхиньикэнэн хааччылынна. Оскуола оҕолоро үөрэх кыһатыгар туттарсыахтарын иннинэ бастакы үктэл буолар сүрүн билиини  буор босхо ылар кыахтаныахтара.

Захар Никитин, Дьокуускайдааҕы култуура уонна ускуустуба колледжын дириэктэрэ: «Грант балаһыанньатын быһыытынан оскуола саастаах оҕолору икки сыл устата креативнай индустрияларга үөрэтиэхтээхпит. Ол эбэтэр хаартыскаҕа түһэриигэ, видео устуутугар, аныгы электроннай музыканы оҥорууга уонна тыаһы – ууһу таҥан таһаарар режиссер идэлэригэр үөрэтэбит».

Үөрэх 2 сыллаах буолуоҕа. Бастакы сылыгар оҕолор бу үс хайысханан үһүөннэринэн үөрэниэхтэрэ, оттон иккис сылыгар биир хайысханы талан дириҥэтэн баһылаан тахсыахтара. Билиҥҥи үйэҕэ наадалаах идэлэри ким баҕарар буор босхо ылан тахсар кыахтаныа. Сылын аайы оҕолору сүүмэрдээн колледж бастыҥ исписэлиистэрэ үөрэтиэхтэрэ

Вера Харитонова, креативнай индустрия оскуолатын методиһа: «Биһиги колледжпытыгар маннык салаа арыллыбыта олус үчүгэй. Манна үөрэннэхтэринэ оҕолорго инники олохторугар улахан төһүү буолар дии саныыбыт».

Аныгы электроннай ырыаны оҥорон таһаарар хайысхаҕа үрдүк хаачыстыбалаах аппаратура кэлэн, ырыаны кытта олохторун ситимниир оҕолорго улахан кыах үөскээтэ. Манна киирбит оҕолорго үөрэх саҥа анал бырагырааманан барыаҕа. 2 симиэнэнэн хайдыһан, нэдиэлэҕэ 3 үөрэнэллэр. Хаартыска уонна видео кылааһыгар саҥа уот-күөс, аппараат турда. Оскуола оҕолоро дьарыктаммат кэмнэригэр колледж устудьуоннара саҥа компьютерга анагылыы таҥан киинэни устан таһаарар кыахтаннылар.

Лиана Аллагузина, Дьокуускайдааҕы култуура уонна ускуустуба колледжын устудьуона: «Үөрэхпит олус интэриһинэй. Теория чааһа аҕыйах, үксүн практика, онон үчүгэй. Тута уоту-күөһү туруорарга, хаартыскаҕа түһэрэргэ, устарга холонобут. “Сахафильм” тэрилтэҕэ практикабытын барабыт, араас бырайыактарга кыттабыт».

Үөрэх бүтүүтэ оскуола таһымынан ситии-хотуу туоһу суруга туттарыллыаҕа. Маны бүтэрэн тахсалларыгар бастыҥ көрдөрүүлээх үөрэнээччилэр култуура уонна искусство колледжыгар ыарахан тургутуктары ааспакка куонкуруһа суох киириэхтэрэ. Быйылгы бастакы үөрэх дьылыгар Дьокуускай куорат оскуолаларын көмөтүнэн баара-суоҕа 2 нэдиэлэ устата 100 миэстэни толорбуттар. Оҕолор күн аайы үөрүүнү кытта кэлэр сирдэрэ барыта тупсаҕай саҥа тэрилинэн хааччыллыбыт буолан, үөрэнэргэ кытары сонун интэриэһинэй диэн үллэстэллэр.

Сайаана Неустроева, креативнай индустрия оскуолатын үөрэнээччитэ: «Аппаратура барыта сабыс саҥа, онон үөрэнэргэ табыгастаах. Үөрэҕим сөбүлүүр хайысхабынан сайдарбар кыаҕы биэрэр».

Василика Васильева, креативнай индустрия оскуолатын үөрэнээччитэ: «Олус үчүгэйдик үөрэтэллэр. Инники олохпун ырыаны кытары сибээстиэхпин баҕарабын. Онон бу үөрэҕим миэхэ олус туһалаах буолуоҕа».

Саҥа айар дьоҕуру сайыннарар оскуолаҕа хапсыбатах оҕолор саппаас миэстэҕэ тураллар. Өскөтүн ханнык эмэ оҕо оннугар миэстэ таҕыстаҕына, саппааска турар оҕо үөрэххэ киириэҕэ.