Көрбөттөр бибилиотекалара "Росмолодежь" күрэҕэр кыайда

64

Сахаайа Данилова төрүөҕүттэн көрбөт. Бэйэтэ историк уонна тифлопедагог идэлээх. Бу өрөспүүлүлүкэтээҕи көрбөттөр уонна мөлтөхтүк көрөр дьон анал библиотекатыгар үлэлээбитэ икки сылтан орто. Сахаайа "Мин-брайлиспын" диэн бырайыак автора, кини кэлин көрбөт буолбут дьону тарбахтарын иминэн, ол эбэтэр брайль шрибинэн ааҕа-суруйа үөрэтэр судургу ньыманы таҥан бэлэмнээбит. Бырайыак бүтүн дойду таһымыгар биһирэнэн, Росмолодежь күрэҕэр доруобуйаларыгар хааччахтаах дьону кытта үлэҕэ туһуламмыт "Стирай границы" диэн номинациятыгар кыайыылааҕынан таҕыста.

 

Сахаайа Данилова, И.Н. Егоров-Горнай аатынан СӨ көрбөттөр уонна мөлтөхтүк көрөр дьон анал библиотекаларын үлэһитэ: «Брайль шрибин үөрэтиэн баҕалааҕы соҕотохтуу ааҕарга, суруйарга үөрэтэбит. Үөрэнээччи бэйэтин тэтиминэн аа-дьуобилиини биэрэбит. Араас көмө буолар ньымалары туһанабыт, холобура, тыас таһаарар аппарааты, анал учебниктары туттабыт».

 

Сахаайа этэринэн кэнники сылларга маннык куурустары кыһалҕалаах дьон интэриэһиргиир, ыйытар буолбут. Онон 2021 сылтан уопсайа уон киһини үөрэппиттэр. Салгыы тэнитэр, киэҥ эйгэҕэ таһаарар сыаллаах-соруктаах бырайыагы россиятааҕы күрэххэ таһааран, онно грант ылары ситиһэн үлэлиир киэҥ былааннаахтар. Ол курдук улуустары хабан, сайаапкалары хомуйан бу кууруһу дьоҥҥо ыытыахтара. Хас биирдии киһи үөрэнэригэр туһааннаах тэрилинэн хааччыллыы ирдэнэр, үптэрин ол сыалга ыытыахтара. Көрбөт киһи үөрэнэригэр туһааннаах тэрили, кинигэлэри Москваттан сакаастаан ылаллар.   

 

Герман Макаров, библиотека медиа уонна тифло технологияларга салаатын сэбиэдиссэйэ: "Сахабыт сирин 34 улууһун барытын хабан үлэлиибит. Көрбөт уонна мөлтөхтүк көрөр дьон эрэ буолбакка атын өттүнэн доруобуйатыгар хааччахтаах дьону кытары эмиэ үлэлиибит. Уопсайа икки тыһыынчаттан тахса ааҕааччылаахпыт. Онтон 300 тахсата оҕо. Саҥарар кинигэрэлэри устар устуудьуйалаахпыт. Мобильнай сыһыарыыбытыгар 1700 тахса кинигэ баар. Өссө биир улахан бырайыакпытыгар волонтердары ыҥырабыт. Саҥарар кинигэлэри ааҕар баҕалаах дьону күүтэбит".

 

Волонтер, ол эбэтэр саҥарар кинигэр тахсарыгар үлэлиэххин баҕарар буоллаххына библиотека сайтыгар сайаапка ыытыаххын сөп. Аудио кинигэлэр туһааннаах мобильнай сыһыарыыга киирэллэр. Маны тэҥэ библиотека тыйаатырдары, музейдары кытта ыкса ситимнэхтик үлэлэһэр.  Тифлокомментарий диэн көрбөт дьоҥҥо саҥата суох сыаналары тылынан хос быһаарыы буолар. Бу ньыманы исписктээкиллэргэ, киинэлэргэ, кэнсиэрдэргэ, хартыыналарга туттуохха сөп.

 

Гаврил Максимов, библиотека медиа уонна тифло технологияларга салаатын үлэһитэ: "Алтынньы ыйтан  Үүнэр көлүөнэ  уонна  Опера уонна Балет  тыйаатырдара көрбөт дьоҥҥо анаан бастакытын тифлокомментарийдаах испиктээкиллэри туруоруохтара. "

 

Көрбөттөр библиотекалара өрөспүүбүлүкэ үрдүнэн соҕотох, 1967 сыллаахтан тэриллэн үлэлиир. Быйылгыттан Саха сиригэр бастакы тифлопедагог, поэт, брайль шрибинэн сахалыы алфавит автора Иван Егоров- Горнай аатын сүгэр буолла. Библиотека 150 тыһыынчаттан тахса кинигэлээх фондалаах, улахан аҥара анал көрүҥнээх кинигэ буолар. Сыллата фонд хаҥыыр, улаатар. Оттон Брайль шрибинэн үөрэтэр бырайыактарын салгыы улуустарынан тарҕатыахтара.