Хотугу многоборьеҕа түөрт рекорд олохтонно

4-с төгүлүн ыытыллар чемпионат эрдэ өрөспүүбүлүкэ таһымыгар ыытыллар эбит буоллаҕына, быйыл Арассыыйа спордун халандаарнай былааныгар киирсэн, бастакытын дойду таһымыгар ыытылынна. Эр дьоҥҥо, дьахталларга уонна 16-17 саастаах оскуола оҕолоругар ыытыллар аһаҕас чемпионат хотугу многоборье спорт көрүҥүн быһыытынан сайдарыгар биир улахан төһүү буоларын тэрийэр бөлөх бэлиэтээтэ.

Семён Колодезников, турнир сүрүн судьуйата: «Кэнники сылларга хотугу многоборье иннин диэки хардыылаата, сайдан эрэр диэххэ сөп. Ол эбэтэр улуустарга тренер миэстэтин көрөннөр сайдыыга төһүү буолла. Чурапчы, Нерюнгри, Үөһээ Бүлүү, Анаабыр улуустара күүстээхтэр».

Хотугу многобрье 5 көрүҥүнэн ыытылынна: үс хотугу ыстаныы, сүгэ, маамыкта быраҕыыта, мэһэйдээх сиринэн сүүрүү уонна наартаны ойуу. Хотугу ыстаныыга уонна наартаны ойууга тэҥнээҕин булбатах Өймөкөөн улууһуттан сылдьар 19 саастаах Георгий Софронов 1020 наартаны ойон, бэйэтэ туруорбут рекордун ситэн саҥа Саха сирин рекордун олохтууру ситистэ.

Георгий Софронов, хотугу многоборьеҕа РФ спордун маастара: «Оҥорбут көрдөрүүбүн ыһыктыбакка тута сылдьыахпын наада. Оччоҕо өссө ситиһии кэлиэ. Ааспыт муҥутуур көрдөрүүбүн уон ахсаанынан тупсардым».

Хотугу норуоттар төрүт дьарыктарынан маамыкта быраҕан табаны тутуу буолар. Бу идэни хотугу многоборье биир көрүҥүн быһыытынан бөҕөргөтөн күн бүгүн саҥа рекорд олохтонно. Альберт Иванов иитиллээччитэ Валентина Борисова 111-дэ хабан утарылаһааччыларын ырааҕынан хаалларда. Иккис миэстэни ылбыт Амелия Алексеева 30 хапта, оттон үһүс миэстэлээх Юлия Молодых 22 хабан бочуоттаах миэстэҕэ тигистэ.

Валентина Борисова, хотугу многоборьеҕа СӨ спордун маастара: «111 маамыктаны хабан Саха сирин рекордун олохтоотум. Манна илии күүһэ уонна тулуурдаах буолуу ирдэнэр».

Хотугу норуоттар күннээҕи олоххо туттар маллара билигин спортивнай тэрилгэ кубулуйан туттулла сылдьар. Ыстаныыны, наартаны ойууну билигин оҕо аймахха кыра саастарыттан сайыннаран иитиэххэ наада диэн тренердэр бэлиэтииллэр.

Анатолий Сыромятников, Баһылай Манчаары аатынан "Модун" спорт киинин тренерэ: «1988 сыллаахха ыытыллыбыт маҥнайгы чемпионакка кыттыбытым. Онтон ыла сайдан, кэлин федерация тэрилиннэ, маастар нуормата олохтонно. Бу оҕолору хотугу многоборьеҕа сыһыарарга  олус улахан суолталаах».

Күрэхтэһии бирииһин  уопсай сууммата 1 мөлүйүөн солкуобай буолла. Наҕарааданы миэстэлэринэн арааран  сыаналаах бириистэринэн туттардылар. Эр дьоҥҥо уонна дьахталларга уопсай түмүгүнэн 1 миэстэни Ямало-Ненецкий автономнай уокуруктан сылдьар Юрий Лаптандер уонна Юлия Молодых ыллылар. Оҕолорго Нерюнгриттан сылдьар Вадим Туприн уонна Виктория Бондаренко кыайыылаах үрдүк аатын сүктүлэр.

Геннадий Васильев. Баһылай Манчаары аатынан "Модун" спорт киинин дириэктэрэ: «Быйылгы сезону арыйыыга хотугу многоборье чемпионата тирэх буолар күрэх. Бу күрэхтэһии баар буолан ааспыт сылга Россияҕа маҥнайгы миэстэни ситиспиппит. Эрдэ маннык улахан ситиһии суоҕа».

Уопсай түмүк кэннэ Ямало-Ненецкий автономнай уокурук эрэллээхтик бастакы миэстэни сурунна, иккис миэстэҕэ Саха сирин хомуур хамаандата уонна үһүс миэстэҕэ тилэх баттаһа Красноярскай кыраай хамаандата тигистэ.