“Юнармия” сүлүөтүгэр бастыҥнары тургуттулар

Дойдуга тапталы, бэриниилээх буолууну оҕоҕо, ыччакка иҥэрии Саха сиригэр көхтөөхтүк барар. Маныаха кэлэр көлүөнэҕэ патриотическай өйү-санааны  кыра эрдэҕиттэн иитии уонна иҥэрии оскуолаттан, дьиэттэн ону тэҥэ тулалыыр эйгэттэн тутулуктаах.  Эдэр хорсун ыччаты түмэр сүлүөт быйыл 200-чэкэ оҕону түмтэ.

Александр Кузьмин, Бүтүн дойдутааҕы "Юнармия" хамсааһын Саха сиринээҕи салаатын салайааччы: "Маннык тэрээһиннэр нөҥүө оҕолор бэйэ бэйэлэрин кытары билсэллэр. Күрэхтэһэннэр эттэрин-хааннарын чэбдигирдэллэр. Ону таһынан култуурунай тэрээһиннэри эмиэ ыытабыт".

Хамаандаҕа уон оҕо киирэр. Икки кыыс, аҕыс уол. Хас биирдии кыттааччы,  бэйэтин хайысхатыгар күүстээх бэлэмнээх. Ньурба улууһун хамаандатыттан кыттар Александр Тогонохов патриотическай хамсааһыҥҥа киирбитэ иккис сыла.

Александр Тогонохов, Ньурба улууһун "Искра" патриотическай кулуубун хамаандатын кыттыылааҕа: "Кулуупка сылдьарым инникитин армия кэккэтигэр сулууспалыырбытыгар наадалаах буолуо. Табаарысмтарым улахан аҥардара бары манна сылдьаллар. Күрэххэ хаһыс да кыттыым".

«Юнармия" саамай элбэх ыччаты хабар улахан хамсааһын буолар. Бу кэккэҕэ киириэн баҕалаах оҕо сылтан сыл аайы элбээн иһэр диэн кулууб салайааччылара этэллэр. Уус Алдан улууһун "Мүрү" патриотическэй кулууб хамаандата 6 көрүҥҥэ барытыгар ситиһилээхтик  кытынна. Бу сүлүөккэ эрдэттэн бэлэмнэммиппит, долгуйа күүпүппүт диэн салайааччы кэпсиир.

Александр Николаев, Уус Алдан улууһун Мүрү 1 №-дээх оскуолатын ОБЖ учуутала: “Кыра кылаастарбын, 7-8 кылаастары,  илдьэттии кэллим. Кинилэр былырыын эрчиллэн саҕалаабыттара. Маннык күрэхтэр оҕону дойдуга бэриниилээх буолууга иитэргэ, эт-хаан өттүнэн сайыннарыыга олус туһалаахтар”.

Амма улууһун бөлөҕүн хамандыыра Артем Марков Юнармия хамсааһыныгар киирбитэ ыраатта. Нэдиэлэҕэ хас да дьарыктаналлар. Аптамааты ыһарга, түргэнник хомуйарга үөрүйэхтэрин эрчийэллэр. Байыаннай хаамыы уонна ырыа күрэҕэр улууска куруук бастыыллар.

Артём Марков, Амма улууһун "Звезда"  патриотическай кулуубун хамаандатын хапытаана: “Күн аайы иккилии чаас дьарыктанабыт. Биир күн барыта аптамааты ыһыы, хогмуйуу, онтон биир күн хамыыга ананар. Ити курдук аттаран дьарыктанабыт. Хамандыыр буоларым быһыытынан сүрүн сыалым байыаннай хамыы уонна ырыа күрэҕэр ситиһиилээхтик кыттыы буолар”.

Төрөөбүт дойдуга, норуокка тапталы үүнэр көлүөнэҕэ иҥэрии - дойду сүрүн соруга. Онон Саха сирин улуустарыгар, нэһилиэктэригэр итиэннэ киин куоракка дойдуга бэриниилээх буолуу тэрээһиннэрин элбэтиэхтэрэ. Оҕолорго өрөспүүбүлүкэтээҕи үлүөтү инникитин  өссө кэҥэтэр былааннаахтар.