Инникитин салайааччы буолуон сөптөөх 25 киһини таллылар

"Якутия Вперед" диэн кэскиллээх, талааннаах салайааччылары көрдөөһүҥҥэ анаммыт өрөспүүбүлүкэтээҕи күрэх от ыйын саҥатыттан саҕаланан ыытыллар. Бастаан баҕалаах дьонтон сайаапка хомуйбуттара, барыта биэс сүүстэн тахса сайаапка киирбитэ. Салгыы үс түһүмэҕинэн, ол курдук  муниципальнай уонна аһаҕас тургутуу ааһан барыта 104 эдэр эрчимнээх, номнуо салайааччы уопуттаах дьон талыллан күрэх финалыгар кыттар чиэскэ тигистэ. 

Ньургуйаана Егорова, күрэх кыттыылааҕа: "Маннык күрэх баарын истээт да кыттарга санаммытым. Бу күрэх миэхэ олус суолталаах, ол курдук бары өттүнэн сайдабын".

Куонкурус сүрүн сыалынан судаарыстыбыннай, муниципальнай былаас уорганнарыгар итиэннэ экономика, социальнай эйгэ салааларыгар бары өттүнэн сайдыылаах, аныгы көрүүлээх каадырдары талыы буолар. Онтон сиэттэрэн салгыы Саха сирин көдьүүстээхтик салайар хамаанданы таҥыы, бэлэмнэһин эмиэ биир сүрүн сыал-сорук быһыытынан киирэр. Владимир Захаров "Синергия" диэн үөрэх кыһатын куораттааҕы салаатын  салайар. Быйыл бу университет цифровой идэ коллеһын арыйбыта. 

Владимир Захаров, "Синергия" университет Дьокуускайдааҕы салаатын дириэктэрэ: "Бу куонкурустан элбэх билсиһиини күүтэбин уонна инникитин исписэлиис быһыытынан сайдыыбын  бэрэбиэркэлэнэбин. Күрэхтэһээччилэр бары олус интэриэһинэйдэр, олор истэригэр элбэх билэр дьонум бааллар".

Үс күн устата, балаҕан ыйын 21-23 күннэригэр  Хаҥалас улууһун Өктөм нэһилиэгэр баар Наука дьоҕус академиятыгар финалга киирбит күрэх кыттыылаахтара үөрэтэр, сайыннарар тэрээһиннэргэ кытыннылар, ону тэҥэ хамаанданан үлэлиир үөрүйэхтэргэ тургутууну аастылар. Дьүүллүүр хамыыһыйаҕа олохтоох уонна федеральнай исписэлиистэр киирдилэр. Кинилэр хас биирдии кыттыылааҕы хас да ирдэбилинэн сыаналаатылар. Манна салайар хаачыстыба, бэйэҥ санааҕын сөпкө тиэрдии, өрөспүүбүлүкэ олоҕун-дьаһаҕын толору өйдөөһүн курдук хайысхаларынан көрдүлэр.  

Елена Миронова, Үөһээ Бүлүү улууһун кылаабынай архитектора: "Үгүс дьону кытта билистим. Кинилэри кытары ыкса билсэн  өрөспүүбүлүкэбитигэр тугу эрэ тэҥҥэ оҥоруохпут диэн эрэллээхпин".

Тэрийээччилэринэн Ил Дархан администрацията, инновационнай менеджмент үрдүкү оскуолата уонна ыччат министиэристибэтэ буоллулар. Санатан эттэххэ, баһылык Айсен Николаев өссө кулун тутар ыйга Саха сирин каадырын резербэтин биир кэлим систиэмэтин тэрийэргэ ыйаах таһаарбыта. Манна түөрт таһым салалта оҥкула киирэр.

Пётр Шамаев, СӨ ыччат уонна социальнай коммуникация миниистирэ: "Тус бэйэм хас да куонкуруска кыттан турардаахпын. Аан бастаан “Министр” диэҥҥэ сылдьыбытым, онтон “Якутия Вперед” диэн күрэххэ. Баар куонкурустары барытын түмэн биир улахан тэрээһини оҥордубут. Туох баар итэҕэстэри, алҕастары барытын туораттыбыт. Саҥа бырабыыталыстыба оҥоһулларыгар бу куонкурус түмүгүнэн көрөн кими эмэ ылыахтара диэн эрэллээхпит. Ол иһин күрэх болдьохторун көһөрөммүт оруобуна өрөспүүбүлүкэ салалтата бигэргэнэр кэмигэр сөп түбэһиннэрдибит."

104  финалистан 25 эрэ киһи талыллан өрөспүүбүлүкэ салалтатын уорганнарыгар үлэлиир резербэҕэ киирэр кыахтанна. Онон кыайыылаах бэйэтин кыаҕын, билиитин, көрүүтүн дьиҥ олоххо көрдөрөн, өрөспүүбүлүкэ сайдар кэскилигэр кылаатын киллэриэҕэ.