Мобильнай быраастар Дьааҥы улууһугар

57

Бу күннэргэ элбэх хайысхалаах бөдөҥ мобильнай биригээдэ алта улууска тиийэн номнуо үлэлии сылдьар. Ол курдук быраастар бу ый саҕаланыаҕыттан Дьааҥыга, Анаабырга, Аллайыахаҕа, Булуҥҥа, Эдьигээҥҥэ уонна да атын ыраах сытар улуустарга көппүттэрэ. Быраастар чинчийиигэ наадалаах бары тэрилинэн толору хааччыллыылаахтар. Санатан эттэххэ, бу сыл олунньу ыйыттан “Мобильнай дуоктар” диэн олус көдьүүстээх бырайыак олоххо киирэн үлэлиир. Бырайыак чэрчитинэн, быраастар Арктика оройуоннарыгар миэстэтигэр тиийэн нэһилиэнньэ доруобуйатын көрөллөр-истэллэр. Бастакы түһүмэххэ 6 улууһу хабан, медиктар  барыта 5000 тыһыынча кэриҥэ киһи доруобуйатын  көрбүт буоллахтарына, сыл бүтүүтэ 21 тыһыынча киһини көрдүлэр, онтон 7 тыһыынчата оҕо.

 

Артём Ксенофонтов, мобильнай биригээдэлэр өрөспүүбүлүкэтээҕи кииннэрин салайааччы: «Биригээдэбитигэр ортотунан 12 киһи буолар. Хоту тиийбэт невролог, кардиолог, УЗИ бырааһа, эндокринолог, травматолог, пульмонолог курдук исписэлиистэр дьону көрөллөр. Быраастар бэйэлэрин кытта оборуудабанньаларын илдьэ сылдьаллар. 12 араас анализ ылабыт уонна Дьокуускайга кэлэн оҥоһуллубутун кэннэ балыыһаларыгар ыытабыт, дьоҥҥо бэйэлэригэр эрийэн сүбэ биэрэбит».

 

Мобильнай биригээдэ быйыл атырдьах ыйыгар Орто Халыма улууһугар үһүс сырыытын тиийэн үлэлээбитэ. Ол курдук терапевт, кардиолог, ортопед, гинеколог, невролог, харах бырааһа уонна да атын уустук быраастар буолан олохтоохтору көрбүттэрэ, суһал көмө оҥорбуттара. Орто Халыма олохтооҕо, аҕам саастаах Евдокия Семёнова быйыл киин куораттан эмчиттэр бөлөхтөрө кэлбитигэр ис туругун, доруобуйатын көрдөрбүт, итиэннэ үөһүн ыллаттарбыт. Онон уһук хоту оройуоннарга болҕомто улаатта диэн үөрэр, санаатын үллэстэр.

 

Евдокия Семёнова, Орто Халыма куоратын олохтооҕо: «Манна миэстэтигэр үөспүн ыллаттарбытым. Дьокуускайтан хирург кэлэн уоча киһини оҥорбута. Бу олус үчүгэй. Киин куоракка барбыппыт буоллар кырата ыйтан ордук сылдьыа этибит кэтэһиитигэр».

 

Биир бөдөҥ биригээдэ балаҕан ыйын 11 күнүттэн Дьааҥы улууһугар үлэлиир. Улуус 7 нэһилиэгэр сылдьан олохтоохтору көрбүттэр, билигин Арыылаахха бааллар. Быраастар олохтоохтору көрөллөрүн таһынан, гормоҥҥа, онкомаркерга, саахарга уонна да атын анализка хаан туталлар.

 

Саргылаана Сыромятникова, биригээдэ салайааччыта, терапевт быраас: «Исписэлиистэр көрүүлэрин түмүгэр үгүс дьон хаан баттааһына үрдүк, сүрэхтэрэ, харахтара ыалдьар буолан көрдөрүнэллэр эбит. Онно тута биһиги быраастарбыт эмп аныыллар, сүбэ биэрэллэр».

 

Хоту улуустарга суол-иис уустуктардаах буолан, миэстэтигэр эмчиттэр кэлэллэрэ нэһилиэнньэҕэ табыгастаах. Мобильнай быраастар хас сырыыларын аайы исписэлиистэрин, хайысхаларын элбэтэн иһэллэр.  Ол курдук оҕону көрөр элбэх хайысхалаах биригээдэ, тиис быраастара эмиэ үлэлиэхтэрэ.

 

Учуокка ылыллыбыт ыарыһахтар салгыы Дьокуускай куораттан телемедиссиинэ көмөтүнэн эмтэниэхтэрэ, оттон суһал көмөҕө наадыйааччылары  киин куорат балыыһаларыгар ыытыахтара.