"Улахан ыалга дьоҕус урбаан" бырайыак үлэлээтэ

Саха сиригэр бэйэ оҥорон таһаарыы, урбаан эйгэтэ хас улуус, нэһилиэк ахсын тэтимнээхтик киирэн, эргиэмсиктэр сыллата араас көрсүһүүлэри тэрийэллэр. "Дьоҕус урбаан улахан ыалга" диэн бырайыак чэрчитинэн 23 дьиэ кэргэн 5 күн устата араас маастар-кылаастарга сылдьыахтара, өрөспүүбүлүкэ бастык эргиэмсиктэрин лекциялыарын истиэхтэрэ. Саамай сүрүнэ судаарыстыбаннай өйөбүлү уонна араас бырагыраамаларга хайдах хапсыахха сөбүн билиэхтэрэ.

Анна Филиппова, "Мой бизнес" киин үөрэтии уонна өйөбүл салаатын салайааччы: «Бу бырайыак элбэх оҕолоох ыалга ананар. Кинилэр биэс күн устата бэйэлэрин бизнес былааннарын чочуйан, итэҕэстэрин ситэрэн, исписэлиистэртэн туһалаах сүбэни – аманы ылан баран бүтэһик күҥҥэ көмүскээннэр 100 тыһыынчалаах грант ылыахтара».

Үөһээ Бүлүү улууһуттан төрүттээх 5 оҕолоох ыал аҕата Дмитрий Син 2020 сыллаахха Москваҕа анал малярдар куурустарыгар үөрэммитэ. Ол кэннэ кэлэн хамаанда тэринэн, Дьокуускай куоракка чааһынай дьиэлэри уонна квартиралары өрөмүөннүүр тэрилтэ арыммыта. Билигин кини бэйэ дьыалатын сайыннараары, тэрилтэтин улаатыннараары, саҥа дьону үөрэтээри бу бырайыакка кэлэн кытта сылдьар.

Дмитрий Син, бэйэ дьыалатын тэрийээччи: «Бэйэм үлэлии сылдьар дьыалабын кэҥэтиэхпин баҕарабын. Уонна биир улахан былааным диэн малярдар оскуолалырын тэрийии буолар. Маны сэргэ инникитин өрөмүөҥҥэ туһаныллар туттар тэриллэри атыылыыр маҕаһыын арыныахпын баҕарабын».

Онтон Екатерина Дьячковская Горнай улууһуттан сылдьар. Горнайга саҥардыы күөх төлөн кэлэн, чааһынай дьиэлэри, тэрилтэлэри, социальнай эбийиэктэри гаазтааһын тэтимнээхтик саҕаланан эрэр. Кэм уларыйыытын баттаһа, гааз турбатын оҥорор эриэккэс сыаҕы тутан үлэҕэ киллэрэр баҕалаах. Екатерина санаабыт санаата туоллаҕына, улууһун дьонун-сэргэтин күөх төлөнү  тардарга наадалаах малынан хааччыйар кыахтаныаҕа.

Екатерина Дьячковская, бэйэ дьыалатын саҕалааччы: «Биһиги үс оҕолоохпут. Дьиэ кэргэҥҥэ мин соҕотох үлэһиппин. Аҕабыт инбэлиит. Онон салгыы сайдаары бэйэ дьыалатын арынаары бу манна кэллибит».

Тэрээһин балаҕан ыйын 22 күнүгэр кыттааччылар бизнес бырайыактарын көмүскээһининэн түмүктэниэҕэ. Кыайыылаах дьиэ кэргэн "Дьоҕус урбааны сайыннарыы" фондатыттан 100 тыһыынча солкуобайы ылыаҕа. Онтон атын кыттааччыларга өссө салгыы атын бырагыраамаларга, субсидияларга хапсарга кыах бэриллиэҕэ