Тулагыга ыччакка аналлаах креативнай былаһаакка арыллыа.

“Норуот бүддьүөтэ” судаарыстыбаннай бырагыраама чэрчитинэн Тулагы-Киллэм Мария Обутова-Эверстова аатын сүгэр култуура киинигэр эдэр ыччакка туһуламмыт "Точка притяжения" диэн ааттаах эдэрдэри түмэр хос оҥоһулла турар. Оттон бу саҥа сүүрээни киллэриини култуура киинин уус-уран салайааччыта Лилия Илларионова толкуйдаан, биэбэйдээн таһаарбыт

Лилия Илларионова, М.Обутова-Эверстова аатынан Тулагытааҕы култуура киинин уус-уран салайааччыта, бырайыак ааптара: «Сыл анараа өттүгэр бырайыагы толкуйдаан саҕалаабытым. Былырыын күһүҥҥэттэн күүскэ үлэлэһэн барбыппыт. Бу бырайыакпын “Норуот бүддьүөтэ” бырагыраамаҕа сыһыаран олоххо киллэриэхпин баҕарбытым. Онтон кыайаммыт, үбүлээһин көрүллэн баҕа санаабыт олоххо киирэн эрэриттэн олуһун диэн үөрэбит».

Манна даҕатан эттэххэ, тустаах нэһилиэккэ 1500 кэриҥэ эдэр ыччат олорор. Онон бу норуот бүддьүөтүнэн көрүллүбүт саҥа былаһааккаҕа эдэр ыччат санаатын, толкуйдарын олоххо киллэриэҕэ. Ол сыалга араас техника ылыллыбыт. Былаһаакка үлэҕэ киирдэ эрэ манна ыччаттары үөрэтэр маастар кылаастар, трениннар, лекциялар ааһыахтара. Хаартыскаҕа түһэриигэ, видеоҕа устан, таҥыыга үөрэхтэр барыахтара. Холобура, эдэр ыччат баҕарда да манна кэлэн мустан, толкуйдарын олоххо киллэрэргэ усулуобуйа барыта олохтонуо.

Максим Игнатьев, М.Обутова-Эверстова аатынан Тулагытааҕы култуура киинин салайааччыта: «Өрөмүөн үгүс өттүн бэйэбит күүспүтүнэн оҥоро сылдьабыт. Өссө биир үөрүүлээх сонуннаахпыт. Быйыл өрөспүүбүлүкэҕэ көрүллүбүт 15 субсидияҕа хапсаммыт кинозал баар буолла. Онон дьоммут-сэргэбит олус үөрэн сылдьар. Саҥа сезоҥҥа киинэлэри көрдөрөн саҕалыахпыт».

Оттон билигин култуура киинигэр чахчы сана сезоҥҥа бэлэмнэнэн үлэ күөстүү оргуйар. Үлэһиттэр бары миэстэлэригэр ис-тас үлэҕэ сылдьаллар.

Оттон историяны сэгэтэн көрдөххө, култуура киинин дьиэтэ 80-с сыллардаахтан үлэлиир Дьокуускай уокуругар биир тарбахха баттанар, саамай бөдөҥ киининэн ааҕыллар. Күн бүгүн манна 20-тэн тахса түмсүү үлэлиир хамсыыр. Тулагылара суох киин куоракка  биир да улахан тэрээһин ааспат.

Лонгина Бережнёва, М.Обутова-Эверстова аатынан Тулагытааҕы култуура киинин үлэһитэ, СӨ култууратын туйгуна: «252 киһи кыттар. Ону таһынан 17 араас хайысхалаах түмсүү баар. Манна 285 киһи дьарыктанар. Ол иһигэр 9 вокал кэллэктиибэ, 4 үҥкүү уонна 2 драм куруһуок үлэлииллэр».

Бу курдук сана уус-уран сезоҥҥа Тулагылар өрө күүрүүлээхтик бэлэмнэнэ сылдьаллар. Оттон саҥа креативнай былаһаакка кэлэр ый 7 күнүгэр арыллара күүтүллэр.