Саамай улахан бобордооххо хортуоппуй буһарыыта рекорд кинигэтигэр киирдэ

Икки аҥаар миэтэрэ усталаах, миэтирэ сүүрбэ биэс кэтиттээх улахан хобордооххо нэһилиэк 7 түөлбэтэ 10-нуу киилэ хортуоппуйу кыттыһан рекорд хамыыһыйатын иннигэр астаан көрдөрдүлэр. Киэҥник биллибит Булгунньахтаах хортуоппуйун өрөспүүбүлүкэ араас муннуктарыттан кэлэн атыылаһан бараллар. Ону туоһулуур бастакы хортуоппуй бэстибээлэ үрдүк таһымнаахтык ыытылынна.

Айталина Константинова, 1-кы Малдьаҕар нэһилиэгин олохтооҕо: «Биһиги түөлбэбититтэн 10 киилэ хортуоппуй. Уопсайа барыта 7 хамаанда баар, оччоҕо 70 киилэ буолара буолуо. Бу тэрээһин биһиги нэһилиэкпитин өрөспүүбүлүкэҕэ билиһиннэрии булгунньахтаах аатырбыт хортуоскатын бренд быһыытынан олохсутар сыаллаах тэрилиннэ».

Булгунньахтаах нэһилиэгэ 40-нуу киилэлээх 335 куул  сибиэһэй хортуоппуй атыыга таһаарбытыттан 190 атыыга барда. Бренд быһыытынан биллибит минньигэс хортуоскаттан 100 араас бүлүүдэни астаан кэлбит ыалдьыттары уонна нэһилиэк олохтоохторун күндүлээтилэр. Аҥаардас биир оҕуруот аһыттан бачча элбэх араас бүлүүдэ астаныан сөп эбит диэн ыалдьыттары сөхтөрдүлэр. Салаат арааһа, кэтилиэт, торт уонна да элбэх араас ас остуолга тардылынна.

Зоя Ким, 1-кы Малдьаҕар нэһилиэгин олохтооҕо: «Булгунньахтаах “Кэскил” диэн түөлэбэтиттэн хамаанда туруоран кыттабыт. Тапталлаах нэһилиэкпит күнүгэр сынньана, күүлэйдии сылдьабыт. Түөлбэттэн 15 киилэ хортуоппуйу биэрдибит уонна манна икки киһибит кытта сылдьар».

Улахан хобордооххо хортуоппуй бэрт түргэнник сырдьыгыныы буһа оҕуста. Бэрт аҕыйах мүнүүтэнэн 200-чэ киһиэхэ сылаас чэйи кытта сүрүн бүлүүдэни түҥэттилэр.

Булгунньахтаахтар Дьокуускай куорат олохтоохторугар кууллаах хортуоппуйу тиэрдэн биэрэллэр. Онон нэһилиэк дьоно сайыҥҥы үүнүүлэрин күһүн батаранннар, дьиэ кэргэннэригэр барыс киллэринэр кыахтаахтар. Тыа хаһаайыстыбатынан дьарыктанар нэһилиэккэ бу улахан суолталаах диэн баһылык бэлиэтиир.

Айталина Васильева, 1-кы Малдьаҕар нэһилиэгин баһылыга: «Өрөспүүбүлүкэ таһымыгар ыытыллбыт хортуоска бастакы бэстибээлэ биһиги нэһилиэкпитигэр ыытылынна. Бу биһиги нэһилиэкпит хортуоската киэҥник тарҕанарыгар, дьоммут – сэргэбит эбии дохуот аахсарыгар анаан ыытылылынна. Мантан тэтим ылан хортуоппуйбутун бренд оҥорон атыылыахпыт диэн баҕа санаалаахпыт».

Бу сыл нэһилиэккэ  күүтүүлээх уу ситимэ киирэн оҕуруот аһа уонна да атын үүнээйи арааһа быйаҥнаан үүннэ диэн олохтоохтор үөрүүлэрин үллэстэллэр.

Лидия Алексеева, 1-кы Малдьаҕар нэһилиэгин олохтооҕо: «Хортуоска бэстибээлэ манна ыытыллара тоҕоостоох. Тоҕо диэтэр Булгунньахтаахха бу оҕуруот аһа олус табыллан үүнэр. Дьоммут-сэргэбит даҕаны дьаныһан туран дьарыгыраллар».

Инникитин бу өрөспүүбүлүкэтээҕи бэстибээли сылын аайы ыытары былаанныыллар. Сылтан сыл саҥа рекордтары туруоран саха өрөспүүбүлүкэтигэр тыа хаһаайыстыбата сайдарыгар улахан төһүү булуохпут диэн бигэ эрэллээхтэр.