"Кросс нации" сүүрүүнү таптааччылары түмтэ

Күһүҥҥү тыаллаах, тымныы куну аахсыбакка “Юность” стадион иннигэр маассабай сүүрүү кыттыылаахтара муһуннулар. “Кросс нации” тэрээһин 2002 сыллаахтан саҕалаан Бүтүн Россия үрдүнэн ыытыллар. Дьокуускай куоракка сылтан сыл аайы кыттааччы ахсаана эбиллэн иһэр, быйыл уопсайа 4 тыһыынчаттан тахса киһи сүүрэ таҕыста.

Эдуард Ефимов, Дьокуускай куорат дьаһалтатын физическэй култуураҕа уонна спортка салалтатын салайааччыта: “Быйылгы сүүрүү Саха сиригэр физкульттурнай хамсааһын 100 сылыгар ананна. Эт-хаан өттүнэн эрчиллээччи ахсаана Дьокуускайга сыллата элбиир. Доруобуйатын көрүнэр киһи элбээтэ. Онтон эти-хааны чэбдигирдиигэ сүүрүү олук буолар”.

Сүүрүү саамай элбэх ахсааннаах бөлөҕүнэн оскуола оҕолоро уонна устудьуоннар буоллулар. Салгыы оскуола оҕолорун кэннэ салайааччылар сүүрдүлэр. Киин куорат  тэрилтэлэрин, оскуолаларын, уокуруктарын салайааччылара уонунан киһи кэлэн кытынна. Дьокуускайдаҕы 2 №-дээх орто оскуола сылын аайы бу акцияҕа кыттар, быйыл да туора турбакка 100-чэкэ буолан сүүрэ кэлбиттэр.

Николай Тарскай, Дьокуускайдааҕы 2 №-дээх орто оскуола физкультураҕа учуутала: «Биһиги 10 кылаастары таһаардыбыт. Халлаан төһө да тымныы буоллар 100-чэкэ оҕо кэллэ. Биһиги оскуолабыт спорду олус диэн сэҥээрэр. Онон маннык хабааннаах тэрээһиннэри көтүппэппит».

Бастакынан кросска чэпчэки атлетика спортсменнара стартыыллар. Сүүрэ үөрүйэх спортсменнар бу да сырыыга  холку көрүҥнээхтэр.

Сүүрүү хайысхата “Юность” стадионтан, АГАТУ-га диэри буолла. Дистанцията 2 килэмиэтир кэриҥэ. Маныаха улахан булгуччулаах ирдэбил суох, ким хайдах сатыырынан, үөрэммитинэн сүүрэр.

Сыыйа хас биирдии бөлөх дистанциятын түмүктээн биэтэккэ кэллэ. Тутатына 1,2,3 миэстэни ылбыттарга наҕараада туттардылар. Георгий Софронов быйыл иккиһин кыттар. Былырыын миэстэлэспэтэх, быйыл анаан-минээн эрдэттэн бэлэмнэнэн, бэйэтин бөлөҕөр бастакы миэстэни ылла.

Георгий Софронов, сүүрүү кыттылааҕа: «Бастакы кууруска миэстэлэспэтэҕим. Онтон быйыл эрдэттэн бэлэмнэнэн кытынным. Биир килэмиэтири 3 мүнүүтэ 20 сөкүүндэнэн аастым. Уопсайынан спорт мин олохпор улахан суолталаах. Оҕо эрдэхпиттэн үлүһүйэн дьарыктанабын».

Сүүрүү күнэ бэрт көхтөөхтүк тэриллэн барда. Саха сиригэр спорду сэҥээрээччи, дьарыктанааччы ахсаана сыллата эбиллэн иһэр диэн тэрийээччилэр этэллэр. Хас биирдиибит доруобуйатын көрүнэн, чэгиэн чөл туруктаах буоллаҕына эрэ сайдыы баар.