Дьокуускай оскуолатыгар “Движение первых” түмэлэ арыллыа

"Прожектор" креативнай лабаратория бүтүн дойду үрдүнэн 30 региоҥҥа оскуолаларга саҥа түмэллэри арыйар. Россия 30 куоратыгар Дьокуускай эмиэ хапсан 38 нүөмэрдээх оскуолаҕа саҥа түмэл арыллар буолан, оскуола оҕолоро, учууталлара бу хайысхаҕа үлэлэһэн саҕалаатылар.

Ирина Бурцева, Дьокуускай куорат 38 №-дээх оскуолатын дириэктэрин үөрэх чааһыгар солбуйааччы: «Бырайыакка кыттан кыайдыбыт. Бу музейбытыгар барыта 27 араас хамсааһын киирэр. Ол курдук үөрэнээччилэр, учууталлар уонна төрөппүттэр хамсааһыннара биир түмэл буолар. Музей үлэтин оҕолорго көрдөрүөхтээхпит, ол кудук манна үөрэнээччи музейы кытта тэҥҥэ үлэлэһэн,  историяны билэн дойдутун туһугар үлэлэһэрин курдук».

Оскуола оҕолоро, учууталлара, "Волонтеры культуры" салайааччытын солбуйааччы Милена Богданованы кытары көрсөн саҥа түмэл хайдах буолуохтааҕын, оҕолор ханнык хайысханы тобулан үлэлиэхтэрин сөбүн ырытыстылар, итиэннэ саҥа бырайыак туһунан сиһилии кэпсэттилэр.

Милена Богданова, "Волонтёры культуры" бүтүн Россиятааҕы хамсааһын салайааччытын солбуйааччы: «Музей тутула уонна хайысхалара араас буолар. Хас биирдии оскуола бэйэтэ тус туһунан сэҥээрэр хайысхатын талар, онтон оҕолор түмэли хайдах бэйэлэрэ баҕаралларынан таҥан таһаараллар. Холобура, арт эбийиэктэри туһаныахтарын сөп, эбэтэр быстах кэмнээх экспозициялары туруоруохтарын сөп. Манна барытыгар үөрэнээччилэр баҕалара учуоттанар».

Саҥа түмэли Емельян Ярославскай аатынан Саха музейа сүрүннүөҕэ. Кинилэр оҕолорго сүбэ-ама, күүс-көмө, өйөбүл буолуохтара. Араас быыстапкалары, экскурсиялары тэҥҥэ ыытыахтара уонна оскуола оҕолоро эмиэ музей ыытар тэрээһиннэригэр кыттыһыахтара.

Айталина Решетникова, Е. Ярославскай аатынан Саха судаарыстыбаннай түмэлин дириэктэрин билимҥэ солбуйааччы: «Саҥа арыллар музейдар атахтарыгар туралларыгар улахан музейдарга сыһыарыллаллар. Манна анаан үгүс үбүлээһин көрүллэр, киин сиртэн исписэлиистэр кэлэннэр үөрэх ыытыллар сүрдээх үчүгэй бырайыак эбит. Уопсайа 30 бырайыакка үбүлээһин көрүллүбүт».

Оҕолор номнуо саҥа арыллыахтаах түмэллэрэ хайдах буолуохтааҕын, ханнык экспонаттар туруохтаахтарын, түмэл үлэлиир сүрүн хайысхатын толкуйдаан саҕалаатылар. Уопсайа түмэли хааччыйыыга 100 тыһыынча солкуобай көрүллэн, бу күнтэн саҕалаан үлэлэрин саҕалаатылар.   Оҕолор бырайыактара олоххо киирэр буолбутуттан сургэлэрэ көтөҕүллэн сылдьар.

Евгений Прокопьев, Дьокуускай куорат 38 №-дээх оскуолатын 11 "Б" кылааһын үөрэнээччитэ: «Биһиги оскуолабытыгар “Движение первых” музейа арыллар буолла. Ити арылларыгар оскуола үөрэнээччилэрэ, учууталлар элбэх үлэни көрүстүбүт. Маннык түмэл арылларыттан биһиги олус диэн үөрэбит».

Оҕоҕо төрөөбүт дойдуга тапталы, бэриниилээх буолууну оскуола саҕаттан иҥэриэххэ наадатын тэрийээччилэр бэлиэтииллэр. Хас биирдии киһи улууһун, нэһилиэгин историятын, оскуолатын олоҕун-дьаһаҕын үөрэтэригэр туһуламмыт бырайыак сылын ахсын саҥаттан саҥа оскуолаларга киирэн, оҕолор патриотическай тыыннаналларыгар, дойдуларыгар тапталы иҥэринэллэригэр туһуланыаҕа.