Баһаарынайдар “Оттук кэмэ” аахсыйаны саҕалаатылар

Жатайдааҕы “Үрүйэчээн” уһуйааҥҥа уот турбутун туһунан иһитиннэрии киирэн, түргэн-тарҕан хамсаныы саҕаланар. Иитээччилэр сымсатык туттан хаптан оҕолору таһырдьа таһаараллар.

 Хас биирдии үлэһит бу үөрэтиигэ эппиэтинэстээхтик  сыһыаннаһан, уһуйаан оҕолоро бары бэриллибит бириэмэҕэ эбийиэктэн чопчу  таҕыстылар. Бу уһуйаан уонна баһаарынайдар биир сомоҕо буолан үлэлэһиилэрин түмүгэ.

Пётр Устинов, "Үрүйэчээн" №1-дээх оҕо уһуйаанын үлэһитэ: «Баһаарынайдары кытары хас сыл аайы үлэлэһэбит. Сылга 3 хайаан да маннык тэрээһини оҥоробут. Оҕору уонна үлэһиттэри үөрэтэр сыалтан тэриллэр. Оҕолору эрдэттэн дьарыктааммыт барытын сөпкө оҥордулар».

Таһырдьа күн- дьыл туруга тымныйан, оттук кэмэ саҕаланан, Өрөспүүбүлүкэтээҕи баһаары утары сулууспа "Оттук кэмэ" диэн ааттаах сэрэтэр-профилактическай аахсыйатын бу нэдиэлэттэн саҕалаата. Биир бастакынан бу тэрээһини киэҥ далааһыннаахтык Жатайдааҕы баһаарынай чаас ыытта. Бу күн үлэһиттэр оҕо уһуйааныгар, итиэннэ нэһилиэк иһинэн баһаары утары үөрэхтэри ыыттылар.

Манна даҕатан эттэххэ,  тустаах уокурукка сыл саҕаланыаҕыттан 13 баһаар бэлиэтэммит, онтон 4 чааһынай дьиэҕэ, ааспыт сылы кытары тэҥнээтэххэ бу көрдөрүү кыччаабыт. Онон профилактика үлэтэ көдьүүстээҕин көрдөрбүт.

Эдуард Устинов, СӨ баһаары утары сулууспа салайааччытын солбуйааччытын эбээһинэһин толорооччу: “Баһаар учуотун статистиката көрдөрөрүнэн халлаан тымныйда эрэ баһаар ахсаана элбиир, баһаартан тахсар хоромньу улаатар. Бу кэмҥэ тасхар баһаардар оһоҕу сыыһа туттууттан уонна ититэр тэриллэртэн тахсаллар”.

Бу кэмнэргэ чахчы ититэр оборуудабанньаны дьиэҕэ холбоон иэдээн тахсыан сөп. Холобура, бу төрүөттэн сылтаан, статистика чахчыта көрдөрөрүнэн, өрөспүүүлүкэҕэ 28 баһаар тахсыбыт. Маннык түбэлтэлэр тахсыбаттарын туһугар Саха сиринээҕи баһаары утары сулууспа үлэһиттэрэ түүннэри-күнүстэри үлэлииллэр.

Александр Трофимов, СӨ баһаары утары сулууспа салайааччытын солбуйааччы: “Биһиэхэ 2716 киһи үлэлиир. Онон Саха сиригэр биир улахан тэрилтэ буолабыт. 153 баһаарынай чаастаахпыт. Ол курдук 233 нэһилиэги баһаартан харыстыыбыт”.

Маны кытары тэҥҥэ баһаарынайдар улахан болҕомтолорун үөрэх тэрилтэлэригэр, оҕолор тоҕуоруһар сирдэригэр уураллар. Профилактическай тэрээһиннэри ыыталлар.