Саха төрүт көрүҥэ мас тардыһыы, Аан дойду таһымыгар тахсан, киэҥник биллэн эрэр

«Модун» спорт төрүт көрүҥнэригэр киинин тренерэ Дмитрий Саввин  мас тардыһыы көрүҥүн өрө тутан үрдүк ситиһиилэрдээх.  Бэйэтэ 2007 сыллаахтан ыла бу көрүҥҥэ утумнаахтык дьарыктанар. Онтон ыла тиһигин быспакка, 2014 сыллаахха оҕолортон улахан дьоҥҥо тахсан, дьарыгын өссө күүһүрдүбүтэ. Бастаан дойдутугар Хаандыгаҕа, оттон Дьокуускайга көһөн кэлэн Модуҥҥа тренердээбитэ 4 сылыгар барда. Бэйэтин өйдүөҕүттэн дьарыктанар спордун билигин идэ оҥостон, оҕолору иитэ сылдьарыттан олус үөрэр.

«Оҕолого аан дойду киирдэ. Бу оҕолорго улахан мотивация. Урут өйгө суох этэ, оҕолорго аан дойдуга кыттыам диэн. Билигин ити киирбитэ үчүгэй, дьарыктыыр оҕолорбун атыннык мтивациялыыбын. Тренерым хайдах дьарыктаабытын курдук, оҕолорбун оннук дьарыктыы сатыыбын», - диэн мас тардыһыыга Аан дойду икки төгүллээх чемпиона Дмитрий Саввин этэр.

Буолан ааспыт Аан дойду чемпионатыгар Дмитрий 65 киилэҕэ тэҥнээҕин булбакка, холкутук чемпион аатын суруммутун дьон сөҕөр. Утарылаһааччытыгар биир даҕаны очкуону биэрбэккэ, барыларын 2-0 ахсааҥҥа кыайталаата. Долгуйуу баара, ол эрээри улахан эппиэтинэһи ылынан туран бэйэбиттэн кыайыыны эрэ кэтэспитим диэн үллэстэр.

Дмитрий уопсайа бөлөҕөр 50 тахсан оҕону дьарыктыыр. Бастаан кэлэллэригэр спортан олох тэйиччи, бэлэмэ суох оҕолор кэлэллэр диэн үллэстэр. Ол кэнниттэн саҥа кэлбиттэргэ барыларыгар уопсай  физическэй туругу тупсарыыттан саҕалыыллар. Оҕо аайы нагрузкатын сөпкө талан, хас биирдиилэригэр наадалаах тус сыһыаны тренер киһи биэриэхтээх диэн санаалаах. Оттон спортсмен кыра сааһыттан саҕалаан эрчиллэрэ, бу киһи буолан үүнэн тахсарыгар улахан туһалаах диэн арассыыйа сүүмэрдэммит хамаандатын тренера бэлиэтиир.

«Анаапаҕа сыл ахсын бүтүн Россиятааҕы турнир буолар. Онно сыльдар саха оҕолоруттан ыйыппытым, мас тадыһыыны бэйэбит өрөспүүбүлүкэбитигэр хаалларарбыт ордук дуу, эбэтэр аан дойдуга таһаарарбыт ордук дуу диэн. Бары таһаарарбыт ордук диэбиттэрэ, ону тоҕо диэтэҕим дии. Ону сири-дойдуну көрөбүт, билиибит-көрүүбүт сайдар, элбэх доҕоттордонобут, олус интириэһинэй маннык күрэхтэһэр диэн эппиттэрэ», - диир Арассыыйа сүүмэрдэммит хамаандатын сүрүн тренерэ Николай Константинов.

Мас тардыһыытынан иккис сылын дьарыктанар 8 кылаас  үөрэнээччитэ Рома Тарабукин, тренерин курдук чемпион буолар баҕа санаалаах. Спортсмен киһи тулуурдаах уонна этэ-сиинэ имигэс буоллаҕына эрэ, бу көрүҥҥэ ситиһиилэнэр диэн кэпсиир.

«Бэйэм 85 киилэлээхпин. Инники сыалларым, онно-манна күрэхтэһии, бастааһын. Кумирым Таас Боотур, Дыгыҥҥа кыттар уол. Кинини холобур оҥостон дьарыктанабын», - диэн спортсмен Рома Тарабукин кэпсээтэ.

Саха кэскиллээх мадьынылара дьарыктаналларыгар билигин бары услуобуйа баар. Оҕолорго күрэхтэһии аан дойду таһымыгар тиийэ баар. Онон сайдар кыах улахан. Оттон Дьокуукайга алтынныьы 6-8 күннэригэр оҕолорго өрөспүүбүлүкэҕэ бастыыр иһин киирсии буолаары турар. Манна тренер Дмитрий Саввин бэйэтин  иитиллээччилэрин үчүгэйдик эрчийэн бэлэмнииргэ бары күүһү уурар.