Саҥа кэм технологиятынан оҥоһуллубут Аал Луук мас

Кэлэр кэнчээри ыччаты бииргэ түмэр саҥа кэм технологиятынан оҥоһуллубут Аал луук мас. Үлэ кыбаарталын киириитигэр ураты оҥоһук кэлэр дьону көрсөр буолуоҕа. Оҥоһук ааптара айар талааннаах саха уола, биллэр косплеер Айаал Федоров.  Кини үлэлэрин билбэт киһи диэн суох. Бастакы үлэтин икки сыллааҕыта «Звездный воин» сериалга баар Мандалорец хараабыл копиятын оҥорон, элбэх киһи биһирэбилин ылбыта. Онтон ыла Айаал хамаандатын кытта өссө элбэх үлэни айан, оҥорон олоххо киллэрдэ. Биһиги устар бөлөхпүт Үлэ кыбаарталыгар тиийэн өссө биир ураты үлэтин кытта билистэ. Саҥа үлэтэ уотунан сандаарар, бэйэтэ анал бырагыраамманан саҥарар кыахтаах.

«Ыччат им бэлиэтин оҥордубут. Креативнайдык Аал Луук маһы уонна киһи мэйиитин холбоон оҥордубут. Биһиги Аал Луук маспыт туһалаах буоларын курдук, Үлэ кыбаарталын туһунан кэпсииригэр модифкациялаабыппыт. Бу идея хамаандаҕа барытыгар кэлбитэ. Барыта илиинэн оҥоһук, икки нэдиэлэ курдук оҥоһуллубута. Ол иһин уустук соҕус. Саамай сүрүнэ, судуругу көстүүтэ уонна идеята», - диэн айар бөлөх салайааччыта, косплеер Айаал Фёдоров кэпсээтэ.

Косплеер Айаал Федоров хамаандатыгар күн бүгүн 15 киһи баар. Бары айар талааннах саха эдэр ыччата. Худуоһунньуктар, программистар, инженердар, дизайнердар, уус харахтаах маастардар бары биир санаанан, хас биирдии үлэлэрин ымпыгар-чымпыгар диэри быһааран, айан-тутан таһаараллар.  

Хамаанда биир улахан үлэтэ Москва куоракка ВДНХ быыстапкалыыр саалатыгар турар.  "Ыраах, ыраах Галактикаҕа" диэн киэҥ куйаар эйгэтин кэпсиир, биллэр киинэ геройдарын ураты оҥоһуктар быыстапкалара, номнуо сэҥээриини ылла. Хамаанда барыта 200 тахса экспонаты сыл устата чочуйан таһаарбыт. Маныаха саха уолаттара дойду киин куоратыгар олорон эрэ үлэлээбиттэр. 

«ВДНХаҕа биһиги сыл анараа өттүгэр бырайыак ылбыппыт. “Ротекс” хампаанньалыын тэҥҥэ толкуйдаан баран оҥоруохха диэн буолбута. Бастакы соругунан концепт-былаан оҥорбуппут уонна 250 кэриҥэ экспонат туруорбуппут. Билигин да үлэлии турар. Ыам ыйыгар диэри хайаан да үлэлиир, онтон көһүөхтээх. Кинилэри кытта билигин да ыкса сибээстээхтик үлэлии сылдьабыт», - диир Айаал Фёдоров.

Хамаанда билигин дойду таһымнаах элбэх бырайыакка үлэлиир. Оттон сүрүн уонна улахан бырайыак эһиил ыытыллыахтаах Аан дойдутааҕы VIII Азия оҕолорун оонньууларыгар ананар. Бу оонньууларга анаан хамаанда саҥа персонажтары, арт-обьектары айан таһаарыахтаах. Бу ый бүтүүтэ бырайыагы көмүскүөхтээхтэр, ол кэннэ күүстээх үлэ саҕаланар диэн этэр. 

«Билигин концепт-былаан оҥоро сылдьабын, ону көмүскүөхтээхпин. Ил Дархан өйөөбүтэ, бу ыйга көмүскээһин буолуохтаах. Ону көрдөрөр кыаҕым суох, ситэрэн баран биирдэ саҕалаары гынабыт», - диэн айар бөлөх салайааччыта,  косплеер Айаал Фёдоров иһитиннэрдэ.

Сотору кэминэн айар бөлөх билиитин, сатабылын бар дьоҥҥо тарҕатар, уопут атыстаһар сыаллаах үөрэтэр маастар-кылаастары ыытар былааннаах. Билигин үөрэтэр бырагырааммаларын ситэрэ, оҥоро сылдьаллар.