Бу ыйга Өрөспүүбүлүкэҕэ суолга-иискэ уон эбийиэк үлэҕэ киириэхтээх

Быйылгы сылтан саҕалаан Марха бөһүөлэгэр киирэр суолтан тахсыыга диэри, уопсайа 3 аҥаар километр усталаах суол өрөмүөннэниэхтээх. Манна ааспыт күһүҥҥүттэн бэлэмнэнии үлэлэрэ ыытыллыбыттара. Оҥоһуллар суол кэҥээн, улаатан 4 балаһалаах буолуоҕа. Ортотунан балаһалары араарар ограждениелаах, суол икки өттүттэн туһаанаах сырдатыылаах буолуоҕа, онон уот баҕаналарын туруоруохтара. Сатыы сылдьааччыларга эмиэ усулуобуйа оҥоһуллуоҕа, ол курдук тротуардар, светофордар, автобус тохтобуллара киириэхтэрэ.

«Эбийиэкпитин эһиил 2024 сылга туттарыахтаахпыт. Билигин улахан, сүрүн үлэлэри бүтэрдилэр кэриэтэ диэххэ сөп. Кэҥэтээһин үлэтин. 1,5 килэмиэтири аспааллаатыбыт. Суол олоҕун үөһээҥи дьапталҕата буолар», - диэн СӨ массыына суолларын салалтатын хапытаалынай тутуу салаатын сүрүн инженерэ Надежда Яковлева сырдатта.

Этиллибитин курдук, улахан үлэлэр үмүрүйэн тураллар, кэлэр сылга ситэрэн хаалбыт балтараа килэмиэтирин оҥоруохтара. Быйыл киин куоракка уопсайа 17 уулуссаны оннуттан саҥардан биэриэхтэрэ, ол эбэтэр уопсайа 22 килэмиэтири оҥоруохтара. 17 эбийиэктэн 10 бу сылга бүтэриэхтэрэ, онтон хаалбыт 7 кэлэр сылга көһөн, салгыы өрөмүөннэниэҕэ. Билигин Можайского уулуссаҕа үлэлэр, чуолаан аспаалы ууруу ыытылла турар. Манна суол кэҥээн, түөрт балаһалаах буолуоҕа. Өрөмүөн кэмигэр суолу бүтүүннүү саппакка, аҥарыгар үлэлэри уочаратынан тэрийэллэр.

Оттон Хатаска киириигэ ГАИ поһуттан Владимировка диэки хайысхаҕа, суол кэҥээн саҥардыллыбыта үгүс айаннааччыны үөрдэр. Бу Дьокуускайы Хаҥалас улууһун кытта ситимниир Умнас республикатааҕы суол баараҕай өрөмүөнэ бара турар. Суол 11 килэмиэтириттэн сүүрбэсиһигэр диэри уопсайа 8 килэмиэтирдээх суол учаастага саҥардыллан, кэҥээн түөрт балаһалаах буолара күүтүллэр. Бу хайысхаҕа сүрүн суолу тэҥэ, киирии суоллары өрөмүөннээһиҥҥэ эмиэ боҕомто уураллар. Ол курдук, Покровскайдыыр суол ахсыс килэмиэтиригэр баар оҕо сэллигин эмтиир санаторийга диэри суол оннуттан оҥоһуллан бүттэ. Маны тэҥэ, Каландаришвили уонна Лесовичок оҕо лааҕырдарыгар киирии суоллары эмиэ саҥартылар. Уопсайа 620 миэтирэ усталаах кэрчик суол аспаалланна.

«Бу эбийиэк анал казначейскай кирэдьиит баар буолан, 2024 сылга былааннаммыт эбийиэги эрдэ киллэрэбит. Үөрүүлээх түгэн дии чаныыбын. Уонна социальнай тэрилтэлэрбитигэр кэлэр-барар суол болҕомтону ирдиир. Ону биһиги куорат дьаһалтатын кытта бу үлэни салгыы өссө күүскэ ыытыахпыт», - диэн СӨ бырабыытылыстыбатын бэрэссэдээтэлин бастакы солбуйааччы Дмитрий Садовников иһитиннэрдэ.

Саха сиригэр 4 сыллааҕыта "Куттала суох хаачыстыбалаах массыына суоллара" национальнай бырайыак салгыы түһүмэҕэ олоххо киирэр. Ол чэрчитинэн региональнай   Нам, Умнас, Амма, Харбалаах, Бүлүү, Тиксии суоллара уонна киин куорат уулуссалара чөлүгэр түһэриллэн саҥардыллаллар.

Бу балаҕан ыйыгар Өрөспүүбүлүкэҕэ уопсайа суолга-иискэ уон эбийиэк үлэҕэ киириэхтээх. Маны тэҥэ, сорох суоллары алтынньыга оҥорон бүтэриэхтэрэ, ол иһигэр Дьокуускай сүрүн суола - Ленин проспега бүтүн үс сыллаах өрөмүөн кэнниттэн толору аһыллара күүтүллэр.