Дмитрий Коркин турнирыгар Саха хомуур хамаандата 3 үрүҥ көмүс мэтээли ылла

Турнир арыллыытыгар Дмитрий Коркин аймах билэ дьоно, үөрэнээччилэрэ уонна саха спордун таптааччылар "Өрөгөй" спорт уораҕайыгар тоҕуоруһа муһуннулар. Турнир үөрүүлээх арыллыытыгар Улуу тренер олоҕун аргыһыгар Александра Коркинаҕа Дмитрий Коркин аатынан Судаарыстыбаннай бириэмийэ туттарылынна. Бииргэ олорбут кэмин устата күүс-көмө, өйөбүл буолбут кэргэнигэр Куоркун иитиллээччилэрэ муҥура суох махталларын биллэрдилэр.

"Сыл ахсын биһиги улуу учууталбыт Дмитрий Петрович Коркин турнира үрдүк таһымнаахтык барар. Ол курдук, элбэх дойдуттан кэлэн туста сылдьаллар. Күүстээх тустууктар Россия иһиттэн эмиэ кэлбиттэрэ. Улуу учууталбар “Мой учитель Дмитрий Коркин. Путь к триумфу” диэн кинигэ таһаарбытым. Ол мин учууталбар бэлэҕим буолар", - диэн Дмитрий Коркин иитиллээччитэ, Олимпийскай чемпион Павел Пинигин кэпсээтэ.

Турнир түмүк киирсиитигэр уопсайа 10 ыйааһынынан 20 спортсмен кытынна. 57 киилэҕэ Дагестан өрөспүүбүлүкэтиттэн сылдьар Рамиз Гамзатов утарылаһааччытын тушенан кыайан, күрэхтэһии бастакы кыайыылааҕынан буолла. Бу турнирга кини бастакы кыттыыта буоларын бэлиэтээтэ.

«Сегодняшний турнир на высшем уровне. Я первый раз сюда приехал и очень приятно, обрадовали», - диэн 57 киилэҕэ Д.П. Коркин турнирын кыайыылааҕа Рамиз Гамгатов эттэ.

61 киилэҕэ Кежик Монгуш тэҥнээҕин булбата. 10-3 ахсааҥҥа эрэллээх кыайыыны аҕалан, уруулуу саха көрөөччүлэрин олус үөртэ. 79 киилэҕэ саха уола Роман Николаев эчэйии ылан көбүөргэ тахсыбата, онон Гаджимурад Алихмаев быһаччы кыайыыны сурунна. Өр сылларга Саха хомуур хамаандатын хапытаанынан анана сылдьыбыт Ньургун Сергин 92 киилэҕэ Иран утарылаһааччытыгар кыайтаран, үрүҥ көмүс мэтээли аҕалла.

Күрэхтэһии саамай күүтүүлээх финалынан 70 киилэҕэ Константин Капрынов уонна Виктор Рассадин хапсыһыылара буолла. Трибуна барыта икки гына хайдан, уолаттарга ыалдьалларын күүстээх хаһыынан-ыһыынан көрдөрдүлэр.

Таджикистан хамаандатыттан кыттар Виктор Рассадин Дмитрий Коркин туринирын 6 төгүллээх кыайыылааҕынан буолла. Уһун тохтобул кэнниттэн эрэллээх кыайыыны аҕалан, көбүөргэ үчүгэй туруктаах  төҥнүбүтүн көрдөрдө.

Виктор Рассадин Чурапчыттан сылдьар эдэр кэскиллээх Константин Капрынов олус үчүгэй утарылаһыыны көрдөрдө диэн хайҕаата. Хайдах дьарыктанарын көрөбүн, сырдык инникилээх уол диэн бэлиэтиир. Рассадин инники былаана 74 киилэҕэ Олимпиада чыпчаалын дабайыы буолар.

"Очень рад, что сегодня удалось победить. Честно сказать, волновался очень. Потому что был большой перерыв, травма, смена гражданства. Не выходил на такую арену уже больше года. И конечно же, многие болельщики ждали от меня победы, хорошей борьбы. Думаю своей хорошей подготовкой мне сегодня удалось выиграть золотую медаль", - диир 70 киилэҕэ Д.П. Коркин турнирын кыайыылааҕа Виктор Рассадин.

Саха тустуута инникилээҕин, кэскиллээҕин саха бөҕөстөрө көбүөргэ көрдөрдүлэр. Инникитин даҕаны Улуу Куоркун иитиллээччилэрин суолун хатылыыр чулуу спортсменнар үүнэн тахсыахтара диэн норуот бигэ эрэллээх.