Саха сиригэр "Агротуризм" үлэтэ

Ынах-сүөһү иитиитигэр, тыа хаһаайыстыбатын дьарыгар аныгы үйэ ирдэбилин баттаһа саҥа сүүрээннэр киирэллэр. Саха норуотун төрүт үгэһэ, аны билигин "Агротуризм" диэн саҥа хайысханы тобулан, тыа сирин олохтоохторо туристары бэйэлэригэр тардан, эбии үп-харчы киллэринэн хаһаайыстыбаларыгар эбии дохуот аахсыахтара. Бу күннэргэ Саха сириттэн 2 дьиэ кэргэн дойдубут ыытар граныгар киирсэн, 7,5 мөлүйүөннүү солкуобайы ылан үлэлэрин саҕалыахтара.

"Быйылгыттан уларыйыыта диэн, хас биирдии бырайыак хайаан да оператордаах буолуохтаах. Бу өрөспүүбүлүкэҕэ баар туристическай хайысхаларга хас биирдии бырайыак, регион туур  хайысхаларыгар киирэн, атласка, каартаҕа баар буолуохтаахтар этэ. Ол өттүгэр  туризм агенствота үлэлэһэн, туур оператор булан, дуогабар оҥорсорго көмөлөһөн биэрдэ", - диир  АПК ресурснай киинин өҥөнү оҥорууга салаатын салайааччыыта  Майя Гуляева.

Быйыл Саха сириттэн 5 бырайыагы күрэххэ ыытан, 3 бастакы түһүмэҕи ааһан 2 кыайыылаах баар буолла. Манна сүрүннээн туристар кэлиилэрин-барыыларын, төһө элбэх киһи сылдьарын, хайаан да тыа хаһаайыстыбатын бородууксуйатын оҥорон таһаарар дохуота 70 быраһыана буолуохтаах уонна ыалдьыттартан киирэр дохуот уопсай барыстан 30 быраһыантан тахсыа суохтаах.

"Көмүскээһин от ыйыгар буолбута. Кыттааччыларбытын оттуу сырыттахтарына ходуһаттан ыҥыртаан ылан көмүскээбиппит. Нууччалыы буолан, биллэн турар уолуйаллар, долгуйаллар буоллаҕа дии", - диэн салгыы Майя Гуляева кэпсээтэ.

Екатерина Портнягина салайааччылаах "Полюс холода" хаһаайыстыба, Үөһээ Дьааҥы улууһугар эмиэ бэйэлэрэ "Агротуризм" хайысхатын сайыннараллар. Кинилэр манна тыа хаһаайыстыбатынан эрэ муҥурдаммакка, айылҕа кэрэ көстүүлэрин, хоту дойду айылҕатын, хайаларын уонна бэлиэ сирдэринэн ыалдьыттары күүлэйдэтэн, бэйэ оҥорон таһаарбыт үүт уонна эт астарынан ыалдьыттары аһаталлар.

"Билигин Агротуризм бырайыагар киирсэ сылдьабыт. Ол иһин ити билиҥҥи кэлбиттэргэ репетиция курдук оҥордубут. Өссө элбэх сиргэ сырытыннарыахпыт этэ да, эппиккэ дылы, араас биричиинэлэр баар буолан хаалбыттара. Инникитин кинилэри кытта сибээстээхпититтэн үөрэбит", - диэн "Полюс холода" тыа хаһаайыстыбатын кооперативын салайааччыта Екатерина Портнягина этэр.

Ыалдьыттар номнуо, Үөһээ Дьааҥылар оҥорбут туристическай маршруттарын сөбүлээн, дьон сайын ахсын тоҕуоруһа мустар, сөбүлээн сынньанар сирдэринэн буолла.

Хас сылын ахсын "Агротуризм" эйгэтигэр саҥаттан саҥа хаһаайыстыбалар киирэннэр, эбии үп киллэринэн олохтоох бэйэ бородууксуйаны оҥорон таһаараллара элбиир. Саҥа кэлбит сүүрээн аны аҕыйах сылынан, бүтүн өрөспүүбүлүкэни хабар чинчилээх.