Гражданскай сааҕа-саадахха сокуон уларыйар

Тулагы-Киллэм олохтооҕо, булт диэн баран муннукка ытаабыт Виталий Григорьев, ыра оҥостубут санаата олоххо киирдэ. Карабин сааланан үөрүүтэ муҥура суох. Бу күн Росгвардия Саха сиринээҕи салалтатын сааҕа көҥүл-лицензия биэрэр киинигэр докүмүөнүн барытын туттаран, саа хаһаайынынан буолла. Булдунан үлүһүйэр киһиэхэ, кэлиҥҥи кэмҥэ бу эйгэҕэ, сааһыттарга дөкүмүөннэһиигэ уларыйыы-тэлэрийии киирбиттитэн үөрэр.

"Саа Вепрь 308 Win диэн ааттанар, нарез. Дьэ, баҕа санаам туолла диэххэ сөп. Биэс сылы быһа боростуой саалаах сылдьан баран нарез ылынаҕын. 2013 сыллаахха ылбытым бастаан уонна бу 2023 сыллаахха нарез ыллым. Дөкүмүөнү барытын госуслуганан биэрэллэр, онон түргэн соҕус. Ааспыт нэдиэлэ субуотатыгар сайаапкабын ыыппытым, бэнидиэлниккэ эбиэт кэнниттэн эрийэн, оптуорунньукка бачча чааска кэлэҕин диэн эппиттэрэ . Бу кэлэн дөкүмүөммүн туттардым, икки нэдиэлэнэн саа анал дөкүмүөннээх буолар", - диир Тулагы-Киллэм нэһилиэгин олохтооҕо Виталий Григорьев.

Росгвардия Саха сиринээҕи салалтатын лицензиялыыр-көҥүл биэрэр киинигэр чахчы кэлиҥҥи кэмҥэ үгүс уларыйыылар таҕыстылар. Ону кытары тэҥҥэ олохтоох нэһилиэнньэҕэ саа биэриитигэр эмиэ кэккэ  хамсааһыннар бараннар, уларыйыы үксээтэ. Ол курдук, чуолаан 150 нүөмэрдээх федеральнай сокуоҥҥа саҥа ыстатыйа эбилиннэ.

"Бу сыл от ыйын 15 күнүгэр федеральнай сокуоҥҥа уларыйыылар киирбиттэрэ. Чопчу, ыстатыйа эбиллэн биэрбитэ. Мин саабын бултуур киһиэхэ уларсыахпын сөп диэн. Ол бултуурбутугар кини миигин кытта хайаан да сылдьыахтаах, мин кинини кытта баар буолуохтаахпын диэн. Оннук дөкүмүөн ыларга, кини бултуур билиэттээх буолуохтаах уонна саа хаһаайына буолуохтаах", - диэн Росгвардия Саха сиринээҕи управлениятын лицензияны, көҥүлү биэрэр киин саа эргиирин хонтуроллуур салаа судаарыстыбыннай инспиэктэрэ Пётр Брызгалов иһитиннэрдэ.

Уларыйыылары кытта тэҥҥэ, саа ыларга лицензия биэрии бэрэбиэркэтэ күүһүрдэ. Ону кыттта риэйдэбэй тэрээһиннэргэ. Аҥардас сыл саҕаланыаҕыттан, Республика үрдүнэн 600 тахса саа хаһаайыттарыттан ылыллынна. Манна даҕатан эттэххэ, 13 гражданскай саа-саадах баҕа өттүнэн туттарыллынна. Оттон сүрүн сокуону кэһии - булчуттар болдьохторун уһаппаттарыгар сытар диэн үлэһиттэр чопчулууллар.

"Сокуону билбэттэриттэн буолар. Былырыын федеральнай сокуон киирбитэ, онно 6 ый баарына уонна хойуутаабыта биир ый баарына дөкүмүөннэрин биэриэхтээхтэр. Өссө уларыйыы киирбитэ диэн, медкомиссияларын уһатыахтаахтар. Биир сыл болдьохтоох. Саалаах киһи 5 сыл анараа өттүгэр барбыт буоллаҕына, онтон саатын срога өссө да баар буоллаҕына, кини медкомиссиятын барбыт болдьоҕор барыахтаах", - диэн Росгвардия Саха сиринээҕи управлениятын лицензияны, көҥүлү биэрэр киин саа эргиирин хонтуроллуур Дьокуускай куорат уонна Жатай уокуруктарын салаатын салайааччытын эбээһинэһин толорооччу Сергей Никитин кэпсээтэ.

Билигин сааҕа-саадахха сокуон олус кытаатта, онон тустаах салаа үлэһиттэрэ сааһыттары сокуону кытаатан кэспэттэригэр ыҥыраллар.