Саха сирин норуодунай учууталларын туһунан кэпсэнэр киинэ сүрэхтэннэ

Учуутал диэн тыл ханнык баҕарар киһиэхэ туох эрэ үрдүгү, ырааһы кытта дьүөрэлэһэр. Хас биирдии киһи олоҕор, билии киэҥ аартыгар үктэнэригэр сүҥкэн суолталаах. Россияҕа быйыл учуутал сылын биллэрбиттэрэ мээнэҕэ буолбатах. Кинилэр сыралаах, идэлэригэр бэриниилээх үлэлэригэр үрдүк суолтаны ууран, бу сыл кинилэргэ туһаайыллыаҕа. Бу бэлиэ дьылы көрсө, Саха сиригэр Россия норуодунай учуутала аатын Виктор Потапов ылан, Саха сирэ уопсайа 3 норуодунай учууталланан, "Учитель перед именем твоим" киинэ сүрэхтэннэ.

"Бу киинэ биһиги учууталбыт Михаил Андреевич Алексеевка, СССР норуодунай учууталыгар ананар. Бу Үөһээ Бүлүү сиригэр 3 норуот учуутала баар, Василий Софронович Долгунов уонна мин. Бары Михаил Андреевич санаатын толорого үлэлээн-хамнаан кэллибит", - диир РФ норуодунай учуутала Виктор Потапов.

Бу киинэни Михаил Андреевич Алексеевка, кини үөрэнээччилэригэр норуот учуутала буолбут Виктор Потаповка уонна Василий Долгуновка анаатылар. Киинэҕэ сүрүннээн, Саха сиригэр физико-математическай үөрэхтээһин хайдах саҕаламмытын, Үөһээ Бүлүү оскуолатыгар өрөспүүбүлүкэ араас муннуктарыттан оҕолор хайдах үөрэммиттэрин, туох ситиһиилэммиттэрин туһунан сиһилии кэпсэнэр.

"Михаил Андреевич Алексеев курдук киһилээхпитинэн сахалар киэн туттуохтаахпыт уонна ыччаттарбытыгар кэпсиэхтээхпит. Тоҕо диэтэр, нууччалыы эттэххэ, бу феномен. Үйэлэргэ биирдэ кэлэр киһи. Үс норуодунай учуутал биир үөрэх кыһатыттан тахсара диэн, кырдьык даҕаны, сэдэх көстүү. Ол иһин бу киинэни, мин санаабар, ханнык баҕарар дойдуга да, Россияҕа да көрдөрүөххэ наада", - диэн киинэ режиссёра Никита Аржаков иһитиннэрдэ.

Киинэни Михаил Алексеев үлэлээбит сирдэринэн Орто Халымаҕа, Горнайга уонна Үөһээ Бүлүүгэ уһулбуттар. Киинэ хронико-документальнай, ол эрэн манна уус-уран сыаналар эмиэ бааллар. Хас улуус ахсын кини үөрэнээччилэрэ баар буоланнар, киинэни устууга күүс-көмө, өйөбүл буоланнар, киинэ бэрт түргэн кэм иһигэр уһуллан, көрөөччү киэҥ араҥатыгар таҕыста.

"Аҕам аатын үйэтитэллэригэр, маннык киинэ оҥорбуттарыгар улахан махталбын тиэрдэбин. Киинэ боппуруоһун бастаан Васильев Николай Иванович диэн наука кандидата, Үөһээ Бүүлүүтээҕи гимназия учуутала саҕалаабыта. Кини былаана улахан этэ. Валериан Васильевич ийэтэ мин аҕабар үөрэммит эбит, кини Халымаҕа олуһун көмөлөспүтэ. Бэрдьигэстээххэ үөрэппит оҕолоро бааллар этэ, энергетик идэлэмиттэр бааллара. Барытыгар үөрэппит оҕолоро көмөлөһөн испиттэрэ", - диэн Михаил Алексеев төрөппүт уола Михаил Алексеев кэпсээтэ.

Киинэ сюжета испиктээкиллэргэ тура сылдьыбыт курдук буолбакка, Михаил Андреев эрэ үлэтин олоҕун сырдатыыннан муҥурдаммакка, ол саҕана үлэлии сылдьыбыт учууталлары, физико-математическай хамсааһыны төрүттээбит халыҥ хамаанданы барытын хабар.