Хоту улуустарга таһаҕаһы тиэйии иккис түһүмэх саҕаланна

Куулламмыт тоҥ балык Дьокуускайдааҕы өрүс пуордугар кэлэн сүөккэнэ турар. Үлэһиттэр хара сарсыардаттан саҕалаан, бу соторутааҕыта эрэ кэлбит уу аалларыттан сибиэһэй хоту дойду балыктарын наардыыллар.

Сибиэһэйдии тутатына тоҥоруллубут балык амтанын, битэмиинин сүтэрбэт. Ол эрэн, Россельхознадзор Саха сиринээҕи инспектордара таһаҕаһы тутатына ыскылааттарга барыахтарын иннинэ көрөн, докумуоннарын бэрэбиэркэлээн, анализтары ылаллар. Балыктар киэҥ атыыга тахсыахтарын иннинэн күүстээх чинчийиини  ааһаллар.

Уопсайа быйыл инспектордар балыктартан 66 аналиһы ылыахтаахтар уонна 305 лабораторнай чинчийии оҥоһуллуохтаах. Балыгы чааһынай дьонтон ылбыт буоланнар араастаһаллар. Сүрүннээн, Аллайыаххаттан уонна Булун улуустарыттан кэллиллэр, итинтэн улахан аҥара Чокурдаах балыга. Балык арааһа баар, ол эрэн 90 быраһыана уомул. Бу балыктар чинчийиини ааһан, тустаах сертификаты ыллахтарына эрэ, атыыга бараллар.

"Бүгүҥҥү күҥҥэ, 100 туоннаттан тахса балык кэллэ. Хас биирдии балык көрүҥүнэн арахсар, ону кытта сөптөөх ветеринарнай атаарар дөкүмүөн оҥоһуллар. Уонна лабороторияҕа чинчийиини ааспыт буолуохтаах. Билиҥҥи үлэбит диэн, ахсаанынан уонна ыйааһынынан көрөбүт", - диир Россельхознадзор Саха сиринээҕи салаатын судаарыстыбыннай кыраныыссаҕа уонна транспортка ветеринарнай кэтээн көрөр сулууспа инспиэктэрэ Айсан Афанасьев.

Онтон хортуоппуйдары хоту ыытарга бэлэмнииллэр. Аҕыйах хонуктааҕыта сиртэн хостонон, билигин "Якутоптторг" ыскылаатыгар кэлэн наардана сылдьаллар. Манна сүрүннээн, Дьокуускай куорат таһыгар баар хаһаайыстыбалар кэлэн туттараллар. Тулагыттан, Хатастан, Жатайтан оҕуруот аһын арааһын хомуйан, Хоту улуустары бэйэ аһынан хааччыйыахтара.

Хоту улуустарга таһаҕаһы тиэйии бастакы түһүмэҕэ түмүктэнэн, билигин иккис түһүмэххэ бэлэмнэнэллэр. Балаҕан ыйын 12 күнүгэр диэри астарын барытын тиэйэн, "Макдебург" уонна "Мальчиков" таһаҕаһы тиэйэр суудуналар айаҥҥа турунуохтара.

"Үксэ билигин Тулагы, Жатай, куорат фермердара туттара сылдьаллар. Иллэрээ сылтан фермердары кытта үлэлэһэ сылдьабыт. Уопсай былааммыт, бу иккис навигацияҕа 640 туоннаны ыытыахтаахпыт. Бастакыга 71 туонна барбыта. Оттон хоту уонна куорат нэһилиэнньэтин хааччыйарга уопсай былааммыт 1060 туонна”, - диэн  "Якутоптторг" АУо генеральнай дириэктэрин солбуйааччы Егор Ефимов иһитиннэрдэ.

Хоту уонна Арктика уһугар сытар улуустарга таһаҕаһы тиэйии тыын суолталаах. Билигин өрүс уута түһэн, уу ааллара сылдьалларыгар кэккэ ыарахаттар үөскүөхтэрин сөп. Ол эрэн, быйылгы былааны толорор сорук турар.