"Хаарбах туруктаах дьиэттэн көһөрүү" бырагыраамма Орто Халыма улууһугар

Устудьуоннар этэрээттэрэ урукку тутуу омооннорун көтүрэллэр. Аҕыйах сыллааҕыта бу сиргэ элбэх кыбартыыралаах дьиэлэр дьэндэһэн турбуттара. Ааспыт үйэ 60 сылларыгар тутуллубут дьиэлэр эргэрэннэр, 2019 сыллаахтан 4,5 тыһыынча кэриҥэ иэннээх хаарбах туруктаах дьиэни көтүрэн, 200 киһини көһөрдүлэр. Ирбэт тоҥноох арктикаҕа сытар улуустарга дьиэ акылаатын, сыбаайатын көтүрүү уустук дьыала буолар. Ол эрэн, устудьуоннар ити үлэни биир ый устата үмүрүтэ туттулар. 

Күүстээх үлэ саҕаламмытын олохтоохтор эмиэ бэлиэтии көрөллөр. Өр сыллар тухары быһаарыллыбыкка турбут тыын кыһалҕалара аны 2025 сылга диэри быһаарыллан, хоту дойдуга эриэккэс 8 саҥа элбэх кыбартыыралаах таас  дьиэлэр дьэндэйиэхтэрэ. Оччоҕуна Орто Халымаҕа хаарбах туруктаах дьиэлэр кыһалаҕалара быһаарыллар. Билиҥҥи туругунан, 4 дьиэ тутуута саҕаланан, аны эһиил саҥа дьылы көрсө киириэхтээхтэр. Онтон өссө 4 дьиэни кэлэр сайын тутан саҕалыахтара.

"Дьиэ тутааччыларбыт уопуттаахтар, биһиги улууска биир тутааччы элбэх дьиэни, эбийиэги туппута.  Иккис тэрилтэбит Өрөспүүбүлүкэҕэ ити бырагыраамманан үгүс дьиэни туппут хампаанньа. Быйыл тутуу матырыйаалларын барытын аҕаллылар, ол иһин бу сылга оҥорор сабардамнарыгар үлэлиир матырыйааллара барыта баар. Эрэнэбит, быйылгы кыһыҥҥа диэри барытын оҥороннор, аныгыскы сылга саас саҕалааннар, дьон сылаас, саҥа дьиэҕэ киириэхтэрэ диэн", - диир Орто Халыма куорат баһылыга Николай Чукров.

Билигин олохтоохтор алдьаммыт истиэнэлээх, күөрэ-лаҥкы барбыт муосталаах дьиэлэргэ олороллор. 2025 сылы эрэнэ күүтэллэр. Бүтэһик сылларга күүстээх үлэлэр бараннар, саҥа сүүрээннэр киирэннэр, кыракый куорат олоҕо сэргэхсийэ түстэ.

"Быйыл хаарбах дьиэлэри көтүрүү саҕаланан, улахан хамсааһын барда. Уонна  үөрэрбит диэн биһиги оҕолорбут, устудьуоннар этэрээттэрэ кэлэн үчүгэйдик үлэлээн, бэйэлэрин төрөөбүт куораттарын ыраастаатылар. Оскуола оҕолоро кыттыспыттара. Оннук хамсааһын хаһан даҕаны манна буолбатаҕа диэххэ сөп. Билигин саҥа көлүөнэ улаатан иһэр, бу маннык хамсааһын тахсыбытыгар биһиги олохтоохтор үөрэбит эрэ. Кинилэр үөрэнэн төрөөбүт дойдуларыгар үлэлиэхтэрэ, сайыннарыахтара", - диэн Орто Халыма куорат олохтооҕо Мария Колесова санаатын үллэһиннэ.

Уопсайа быйыл 9 арктика улууһугар 15 дьиэ тутулла турар, аны эһиил өссө 11 хоту сытар улууска 15 дьиэ тутуута саҕаланыахтаах, онон 2025 сылга диэри уһук хоту баар нэһилиэнньэлээх пууннарга 36 тыһыынчаттан тахса квадратнай миэтирэ иэннээх дьиэлэр киирэннэр, 794 квартира күлүүһүн олохтоохтор тутуохтара.