Учуутал идэлээхтэргэ үлэ дьаарбаҥкатын тэрийдилэр

Педагог идэлээхтэргэ үлэ миэстэтин таһаарар дьаарбаҥка сыллата үөрэҕирии министиэристибэтин көҕүлээһининэн тэриллэр. Бу быйылгы сылга саҥа үөрэх дьылын көрсө иккис тэрээһин буолар, бастакы бу саас үөрэҕи бүтэрээччилэргэ анаан ыытыллыбыта. Онно биир тыһыынчаттан тахса вакансияны туруорбуттара, бу сырыыга эмиэ тыһыынчаттан тахса вакансияҕа үлэһиттэри күүтэллэр.

"Быйыл сүүрбэччэ вакансиялаахпыт уонна бу дьаарбанкаҕа кэлэн үлэһит көрдөнө олоробут. Үксэ математика, нуучча тылын учууталлара уонна анлийскай тылын", - диэн Таатта улууһун үөрэҕириигэ салалтатыгар салаа сэбиэдиссэйэ  Саина Сергеева этэр.

Хотуглуу илин федеральнай университет сүрүн корпуһугар сүүһүнэн киһи муһунна. Хас биирдии улуустан бүтүн делегациянан кэлэн, наадыйар исписэлиистэрин кытта дуогабар түһэрсэллэр. Оттон дьаарбаҥкаҕа кэлбит ыччат үксэ, киин сиртэн тэйбэккэ үлэ булар санаалаах. Анжелика Михайлова быйыл Мирнэйдээҕи политехническэй институту бүтэрэн, английскай тыл учууталын- филолог идэтин баһылаабыт:

"Манна куоракка көрдөнө сылдьабыт, ол эрэн элбэх улуус мустубут эбит. Вакансия үгүс. Биһиги Миирнэйгэ бүтэрбиппит үөрэхпитин, онно эмиэ биэрэн көрүөхпүт. Миирнэйи сөбүлээбиппит. Бастакы уочарат, куоракка көрдүү сатыыбыт".

Хас биирдии улуус уонунан исписэлиискэ наадыйарын дьаарбаҥкаттан сиһилии билсиэххэ сөп. Манна киин, илин эҥэр, Бүлүү бөлөх эрэ буолбакка, хотулартан элбэх бэрэстэбитэл кэлбит. Хоту улуустарга сыллата саамай сүрүн кыһалҕанан учуутал тиийбэтэ буолар. Холобура, аҥардас Өймөкөөн улууһугар бүтүн 47 учуутал наада. 

"Бу учууталлары хантан буларбыт биллибэт. 47 киһини көрдүүбүт. Сарсыардаттан олоробут даҕаны, 3-4 эрэ киһи кэлэн барда. Манна биһиги этиилээхпит, холобур, педагог идэлээх үөрэҕи бүтэрээччилэр бүддьүөтүнэн үөрэммит буоллахтарына, үллэрэн ыраах, тэйиччи сытар оскуолаларга үлэлииллэрэ наада этэ. Урут 3 сыл босхо үөрэммиттэрин боруостаһааччылар", - диэн Өймөкөөн улууһун Үчүгэй нэһилиэгин орто оскуолатын дириэктэрэ  Валентина Карпова санаатын үллэһиннэ.

Дьаарбаҥкаҕа үлэ биэрээччитээҕэр, көрдөнөөччүтэ кырдьык аҕыйах. Абый улууһугар учуутал эмиэ тиийбэт. Белай Гора бөһүөлэгин гимназиятыгар быйыл биология, нуучча тыла, информатика, физика учууталлара наадалар.

"Биһиэхэ гимназиябытыгар бэһистэн уон биирис кылааска диэри 125 оҕо үөрэнэр. Алын кылаас диэн суох, гимназиябыт 96 сыллаахха тэрилибитэ. Пезиденскэй сеть оскуолатыгар киирэр. Биология, информатика, физика, нуучча ытылын учууталлара наадалар. Кэлэр үлэһиттэргэ үрдүк хамнаһы уонна муниципальнай кыбартыыраны  биэрэбит", - диэн Абый улууһун Белай Гора гимназиятын дириэктэрэ Владислав Окороков кэпсээтэ.

Учуутал идэтэ уруккуттан билиҥҥэ диэри биир саамай наадалаах, ытыктанар идэлэртэн биирдэстэрэ. Оҕону, кэлэр көлүөнэни үөрэтиигэ-иитиигэ олоҕун аныан баҕалаахтар эрээттэрэ сыллата хаҥыыр. Маныаха эдэр үлэһиттэри өйүүр сыаллаах кэккэ бырыайыактар үлэлииллэр эрээри, баар кыһалҕа быһаарылла илик. Тэрээһин түмүгүнэн, улуустар кэлбит эдэр исписэлиистэри кытта дуогабар баттаһан, аны күһүн үлэҕэ күүтэллэр.