Саха сиригэр бэйэ бородууксуйатын оҥорон таһаарыы киэҥ эйгэҕэ тахсар

Чааһынай эргинээччи Степан Яковлев салайааччылаах хамаанда саҥа көлүөнэ кэнсиэрбэлэри оҥорон таһаарыынан ылсан дьарыктанар. Элбэх бириэмэни эрэйбэт, түргэн-тарҕан, ол эрэн үрдүк хаачыстыбалаах аһы-үөлү сиэн баҕалаах дьоҥҥо дьоһун, абыраллаах быһаарыы буолар. Сүрүннээн бу ас туристарга, ыраах айаннааччыларга, табаһыттарга, булчуттарга, офис үлэһиттэригэр улахан табыгастаах. Хараллыыта судургу, бэлэмнииргэ сылытыыны эрэ ирдиир, онтон састааба дьиэ иҥэмтиэлээх аһыттан уратыта суох диэххэ сөп.

"Биһиги Саюри сакааһын оҥоробут. Кини оҕурсуну аҕалар биһиэхэ. Бастаан ууга уган сууйан, кырбаан, ыйааһыннанан пакеттарга угабыт. Дьиэ аһылыгар майгыннатан оҥоробут, боростуой уонна минньигэс буоллун диэн. Уонна дьон тайах, таба этин туттараллар биһиэхэ", - диэн саха кэнсиэрбэлэрин оҥорор тэрилтэ менеджэрэ Айдар Соловьев кэпсиир.

Ас буһарыллан, бэлэм буолбутун кэннэ бэлэм бородууксуйаны реторт-пакекка суулууллар. Ураты технологияланан таҥыллыбыт пакет стерилизаицяны ааспыт аһылыгы икки сыл устата, туох да консервана суох харайыан сөп. Онон ас туһааннаах эбилигэ суох, бэйэтин саҥа астаммыт хаачыстыбатын сүтэрбэт. Бэлэм ынах, сибиинньэ этиттэн тушенкалары тэҥэ, хотуобай бастакы, иккис бүлүүдэлэри хото бэлэмнииллэр. Ол курдук, барыта 40 тахса көрүҥ ас оҥорон таһаараллар.

Интернет маҕаһыыннарын нөҥүө Саха сирин дьоно-сэргэтэ, итиэннэ Россия регионнара хамаҕатык сакаастыыллар. Күннэтэ бородууксуйаларын почтаҕа туттарарга бэлэмнииллэр. Хас күн аайы уонунан хоруопканы. Тэрилтэ саҥа үлэлээбит бастакы ыйдарыгар бүтүн аан дойдутааҕы ас-үөл, инновационнай бородуукта диэн быыстапка-күрэххэ кыттан, "Чөл олох бородууксуйата"  номинацияҕа кыайыыны ситиһэн, кыһыл көмүс мэтээлинэн наҕараадаламмыта.

"Беспламенный нагреватель - умайбакка эрэ аспытын сылытар. Тыаҕа сылдьар дьоҥҥо табыгастаах. Холобур, балыксыттар тыыга олорон эрэ, итии аһылыгы сиэхтэрин сөп", - диир  Айдар Соловьев.

Бүгүҥҥү күҥҥэ этиллибитин курдук, биир ый иһигэр уонча тонна бородууксуйаны оҥорон таһаарар эбит буоллахтарына, сотору кэминэн бу объемнарын үс төгүл эбэр уонна тас дойдуларга тахсар киэҥ былааннаахтар.

"Билигин урбаан министиэристибэтэ экспортка көмөлөһө сылдьар. Табылыннаҕына, Казахстаҥҥа тахсыахпыт. Олох табылыннаҕына, Кытайга. Сыл аҥаара инникилээн, сакаас бөҕөтө киирэн сытар, улахан тэрилтэлэртэн".

Байыаннай дьайыыга сылдьар биир дойдулаахтарбытыгар сакааһынан эмиэ кэнсиэрбэлэри оҥороллор. Бу саас бааһынай хаһаайыстыба сылгы этин  аҕалан, ол эттэн тыһыынчаттан тахса пакет аһылыгы бэлэмнээн ыыппыттара. Бырабыытылыстыба сакааһынан эмиэ үлэлэһэллэр. Онон үлэ күөстүү оргуйар.