Дьокуускайга Нуучча дуобатыгар бүтүн Россиятааҕы күрэхтэһии түмүктэннэ

Саха сиригэр дуобакка Ил Дархан Кубога түмүктэннэ. Маннык үрдүк таһымнаах тэрээһин Саха сиригэр бастакытын ыытыллынна. Мындыр өйү, түргэн толкуйу ирдиир көрүҥҥэ дойду араас муннугуттан тиийэ күрэхтэһээччи, барыта 250 тахса киһи кыттыыны ылла. Ол курдук, күрэххэ Россия ааттаах-суоллаах маастардара, биллэр гроссмейстердара уонна да атын ыалдьыттар кыттыыны ыллылар. 

"4 күн устата тыҥааһыннаах киирсиилэр буоллулар. 15 гроссмейстер, 12 аан дойду чемпионнара кииристилэр. Ону кытта 4 норуоттар икки ардыларынааҕы кылаастаах маастар, 30 Россия маастара. Хаһан даҕаны буолбатах күрэхтэһии буолла. Саамай уратыта, финалга 8 киһи таҕыста. Атын күрэххэ 9 туурунан бүтэллэр, биһиги 8 киһини финалга таһаардыбыт", - диэн  күрэх сүрүн суудьуйата Владимир Иванов сырдатта.

Дуобакка маннык күүстээх састааптаах, киэн далааһыннаах күрэх Саха Сиригэр өссө буола илик. Гранд-финалга 8 күүстэх аатырбыт гроссмейстердар күөн көрүстүлэр. Муҥутуур кыайыылаах Крым Республикатыттан аан дойдутааҕы гроссмейстера Сергей Белошеев буолла. Оттон бочуоттаах иккис миэстэни биир дойдулаахпыт, аан дойду гроссмейстера Гаврил Колесов ылла.

Саха сиригэр кэнники сылларга дуобат көрүҥэ күүскэ сайынна. Күн бүгүн дуобаччыттар Россия, Аан дойду таһымнаах күрэхтэргэ улахан ситиһиилэнэллэр. Маны тэҥэ кэнники, оҕолор истэригэр элбэх таһымнаах дуобаччыт эмиэ баар буолла. Александр Большеков 9 саастаах, кини дуобатынан сөбүлээн дьарыктаммыта түөрт сыл буолла. Кини бу кубокка бэйэтин сааһыгар ордук бэлэмнээҕин, үрдүк таһымнааҕын көрдөрөн, бочуоттаах үһүс миэстэни ылла. 

"Шаашка киһини үчүгэйдик толкуйдуурга үөрэтэр. Элбэхтэ дьарыктанаҕын, элбэхтэ харчы ылаҕын", - диир  күрэх кыттааччыта Алескандр Большеков.

Дайаана Алексеева дуобатынан дьарыктаммыта 9 сыл буолла. Кини Россияҕа, аан дойдуга бэйэтин сааһыгар хас да төгүллээх чемпион буолар. Саахымат киһи өйүн сайыннарар, толкуйдатар,  тулууру, дьоҕуру эрчийэр көрүҥ диэн этэр.

"Математикаҕа, физикаҕа, суоттуурга олус көмөлөһөр. Тэрээһини наһаа астынным, хаһан да маннык үчүгэй күрэхтэһиини көрө илик этим. Арыллыыта, буолар сирэ барыта астыннарар. Элбэх күрэхтэһиигэ сылдьыбытым, хаһан да маннык үчүгэйдик оҥорботохто", - диэн күрэх кыттааччыта Дайаана Алескеева санаатын үллэһиннэ.

Маны таһынан, кубок кэмигэр блицтурнирдар, семинаардар, маастар-кылаастар ыытыллыннылар. Күрэх кэмигэр бу көрүҥүнэн дьарыктаныан баҕалаах киһи элбэҕин көрдөрдө. Инникитин тэрийээччилэр күрэҕи өссө киэҥ далааһыннаах, элбэх кыттааччылаах ыытар былааннаахтар.