Дьокуускай 17 кыбаарталыгар баар хаарбах дьиэттэн олохтоохтору көһөрүү

Өрөспүүбүлүкэҕэ хаарбах дьиэттэн олохтоохтору көһөрүү бырагырааммата тэтимнээхтик барар. Бу бырагыраамманан Саха Сиригэр 600 тыһыынча кэриҥэ кв.м. аварийнай пуонда суох оҥоһуллунна, 25 тыһыынча киһи саҥа дьиэҕэ көстө.

"Бу бырагыраамманан Россия үрдүнэн Саха сирэ сабардама саамай үрдүк. Онтон хаччытынан ылан көрдөххө, 20 быраһыан, бу Дойду үрдүттэн үбүлээһинэ барыта Саха сиригэр кэлэн олорор. Күн бүгүн биһиэхэ 1 млн. 153 тыһ. кв. миэтирэ иэннээх хаарбах дьиэҕэ 61 тыһыынча киһи олорор буоллаҕына, 525 тыһыынча кв. миэтирэ хаарбах дьиэттэн дьоннор көһөн, олорор услуоубйуаларын тупсарыннылар. Онтон Дьокуускай куорат быйыл бүтүннүү хаарбах дьиэлэртэн көһөрөн бүтэриэхтээх", - диэн СӨ тутуу миниистирин солбуйааччы Евгений Афанасьев иһитиннэрдэ.

Хаарбах дьиэттэн олохтоохтору көһөрүү Өрөспүүбүлүкэ биир сүрүн соруга буолар. Көһөрүү федерельнай уонна өрөспүүбүлүкэтээҕи бырагырааммаларынан уочарат быһыытынан барар. Ол курдук, быйыл 17  кыбаарталтан 16 хаарбах дьиэттэн олохтоохтору көһөрдүлэр. Өссө да үлэ бара турар. Онон аҕыйах кэминэн 17 кыбаарталтан хаарбах дьиэттэн олохтоохтору көһөрүөхтэрэ. Инникитин кыбаарталы Спортивнай дьоҕус оройуон диэн оҥоруохтара. Манна саҥа оскуола, оҕо уһуйаана, спортзал тутуллан үлэҕэ киириэхтэрэ.

"17 кыбаарталга быйылгыттан үлэни күүскэ саҕалаан эрэбит. Уһуннук бэлэмнэммиппит, элбэх федеральнай уонна өрөспбүүлүкэтээҕи бырагырааммалары холбоотубут. Мин президиэҥҥэ ити боппуруоска анал сурук суруйбутум. Бырабыытылыстыба өттүттэн өйөбүл кэлэн эрэр. Ол түмүгэр, быйыл кыбаарталтан 16 хаарбах дьиэттэн дьону номнуо көһөрөммүт, саҥа дьиэлэргэ олордобут. Уонна билигин иннэ детсад, спортзал тутуута саҕаланыахтаах. Ити бырагыраамманы күүскэ үлэлэтэн, кэлэр сылларга  кыбаартал олохтоохторун көһөрөммүт,  саҥа Спортивнай диэн ааттаах дьоҕус оройуон баар буолуо диэн эрэллээхпит", - диир Саха Өрөспүүбүлүкэтин Ил Дархана Айсен Николаев.

Людмила Никоновна 17 кыбаарталга олорбута ыраатта. 1986 сыллаахха бу кыбаарталга көһөн кэлбитэ. Кыбаартал кырдьаҕас олохтооҕо,  билигин хаарбах дьиэттэн көһөрүү бырагырааммаҕа киирэн, үөрүүтэ муҥура суох. Инникитин кыбаартал тупсарын, саҥардылларын истэн үөрэн, ис сүрэҕиттэн долгуйа  күүтэр.

"Айсен Сергеевич миигин өйдүүр эбит. Уонна барытын көннөрүөхпүт, барыгытын көһөрүөхпүт, кыбаартал олоҕун уларытыыга сүрэҕим ыарыйда диэтэ. Тутуу бырагыраамматыгар киирбиппититтэн биһиги бары үөрэн, санаабыт өрө көтөҕүллэн турар. Өссө үчүгэй олоххо тиийэхпит диэн эрэнэ хаалабыт", - диэн 17-с кыбаартал олохтооҕо Людмила Хань үллэһиннэ.

Дьокуускай куоракка билигин хаарбах дьиэттэн олохтоохтору көһөрүү үлэтэ салҕанан барар. Олохтоохтор Звезднай саҥа кыбаарталга күлүүстэри туппуттара, оттон сорох олохтоохтор Кузьмин аатынан уулуссаҕа, сотору кэминэн элбэх кыбартыыралаах саҥа дьиэ үлэҕэ киириэҕэ, онно көһүөхтэрэ.