Үтүө үгэскэ кубулуйбут оскуола дьаарбаҥката

Саҥа үөрэх дьыла саҕаланара икки нэдиэлэттэн эрэ ордук кэм хаалла. Төрөппүттэр оҕолорун үөрэххэ бэлэмниир түбүгэр сылдьаллар. Сыллата Хомсомуол болуоссатыгар оскуола табаардарын атыылыыр дьаарбаҥка атырдьах ыйыттан саҕалаан үлэлиир. Манна оскуолаҕа наадалаах таҥаһы-сабы, тэрили биир сиртэн атыылаһар кыах баара үгүс дьоҥҥо табыгастаах. Хаҥалас улууһун Булгунньахтаах нэһилиэгин олохтооҕо Айталина Алексеева дьиэ кэргэнин кытта дьаарбаҥкаҕа кэлбит. Быйыл орто кыыстара Айыллаана маҥнайгы кылааска киирэр.

"Канцеляриҕа 5 тыһыынча курдук барда, оскуола форматын сороҕун эрдэ ылбыт буоламмыт, эмиэ 5 тыһыынча курдук барда быһыылаах. 4 оҕолоохпут, үһэ оскуолаҕа сылдьар. Барыларыгар ылабыт. Курутуун маннык ылар буолан, уратытын билбэтим. Былырыыҥҥытааҕар эбиллибит курдук", - Хаҥалас улууһун Булгунньахтаах нэһилиэгин олохтооҕо диир Айталина Алексеева.

Уонунан балаакка кэчигирээн маҕаһыын элбэх, эгэлгэ табаар. Сырыы даҕаны аҕыйаҕа суох, ол эрээри өрөбүл күннэргэ киһи өссө элбиир. Улуустан кэлбит дьон анаан-минээн кэлэр. Онтон куорат олохтоохторо таарыйа киирэн, атыылаһан ааһаллар. Оскуола форматын кыыс, уол оҕоҕо арааһы талыахха сөп. Сорох сыанатынан, сорох хаачыстыбатын көрөн атыылаһар. Евдокия Пудова 1994 сыллаахтан оскуола табаарынан эргинэр атыыһыт, сүрүннээн улаатан эрэр оҕолор танастарынан дьарыктанар.

"Соҕурууттан атыылаһарга ыараабыт, биһиги син биир чэпчэки сыананы тута сатыыбыт. Чэпчэтии оҥоробут, элбэх оҕолоохторго, ким көрдөһөргүө барытыгар. Сүрүннээн наадалааҕы ылаллар, бүрүүкэ, юбка, спортивнай көстүүм, футболка", - диэн чааһынай эргиэмсик Евдокия Пудова кэпсээтэ.

Сыана оҕо үрдүгүттэн, сааһыттан тутулуктаах, кыра оҕо үрүҥ ырбаахыта биэс мөһөөхтөн, улаатан эрэр оҕоҕо биир тыһыынчаттан саҕаланар. Табаар үксэ Россия уонна Кыргызстан оҥорон таһаарааччыларын киэнэ. Сэлиэччик 2000 тыһ, бүрүүкэлэр икки тыһыынчаттан тахсалар, пиджак үс тыһыынчаттан саҕалаан турар. Оттон тэтэрээт, уруучука сыаната кэккэ маҕаһынарга тэҥинэн. Саамай боростуой уон икки илиистээх тэтэрээт чэчпчээбитэ уон солкуобай. Уруучука сыаната фирматыттан көрөн араастаһар. Рюкзагы икки аҥаар тыһыынчаттан саҕалаан, уонтан тахсаҕа диэри солкуобайга атыылаһыахха сөп.

"Уоппускабар сылдьабын уолбун кытта, 4 кылаас. Бу үөрэҕин тэрилин бэлэмнииргэ олус үчүгэйдик тэрилилбит эбит, барытын буллубут. Сыана үрдээбит эбит", – диэн Анаабыр улууһун Сааскылаах нэһилиэгин олохтооҕо Семён Алексеев үллэһиннэ.

Тэрээһиҥҥэ "Оҕоҕун оскуолаҕа бэлэмнээ" уонна "Домик добра" диэн аһымал  аахсыйалар ыытылаллар. Манна урбаанньыттар кыра дохуоттаах, кыаммат дьиэ кэргэн оҕолоругар атах таҥаһыттан саҕалаан көстүүмүгэр, үөрэх тээбиринигэр тиийэ көмөлөһөллөр. Оттон "Домик добра" диэн аахсыйаҕа ким баҕалаах кэлэн эмиэ үөрэх табаарын атыылаһан, бэйэтин кылаатын киллэриэн сөп.