Уус Алдан дьоҕурдаах дьонун баараҕай оҥоһуктара биир сиргэ түмүллүөҕэ

Ксенофонт Троев бэйэ оҥорбут вездеходун сүүрдэн көрдөрөр. Дьиэ саҕа баараҕай тиэхиникэ ис өттө кытта киэҥ-куоҥ, киһи сылайда да тутатына тохтоон, сытан-сынньаныан сөп.

Туохтан да иҥнибэт массыына кырдьык да булчуттарга анаммыт. Ууну уу диэбэт, хаары хаар диэбэт тиэхиникэни рационализатор тутатына кустуу барарыгар тургутан көрбүт.

«Булчуттарга анаан оҥоһуллубут, эрэйи көрбөккө тиийиэхтээх сиргэр тиийэргэр. Кэннитэ барыта орон буолар, түһэр, хомуллар. Олбоҕун туурдахха олорор сир баар буолар, бэйэтигэр үүтээн курдук, утуйа-утуйа айанныахха да сөп. Бу вездехоппун 2019 сыллаахха саҕалаабытым уонна 2020 сылга бүтэрэн кустуу барбытым. Уунан устар, барытынан сылдьар. Муостара УАЗиктан, рулевойа Т-40, бөлөрүүс дозатора олоро сылдьар уонна автомат коробка, мотора көрбүүрээтэрнэй ниссан”, - диэн кэпсээтэ рационализатор Ксенофонт Троев.

Уйгулаах Уус Алдан сирэ мындыр өйдөөх, олоххо туһалаах малы-салы бэйэ толкуйунан оҥорон таһаарар дьонунан баай. Ксенофонт Троев курдук өйдөөх-санаалаах, туох эрэ саҥаны, туһалааҕы оҥорон таһаарар маастар бары биир сиргэ түмүстүлэр. Бу олбуор иһигэр вездеходтан саҕалаан, чуолаан тыа хаһаайыстыбатыгар аналлаах тиэхиникэ арааһа кэчигирэспит.

«Чопчу хотоҥҥо саах таһаарыытыгар диэн оҥоһуллубута. Кээмэйэ ааҥҥа сөп түбэһэр гына оҥорон таһаарбыппыт. Бензин лефан мотора, жигули коробката, олбоҕо кэннигэр, уруула анныгар баар уонна 4 ускуорастаах», - диир   урбаанньыт, рационализатор Тимофей Крылов.

Тимофей Крылов аҕа кылынаан тимиртэн, мастан бары барытын оҥороллор. Бэйэлэрэ туспа мастарыскыай арынан тигинэччи үлэлииллэр. Оттон билигин аны бу быыстапкалыыр киини арыйдылар. Манна улуус маастардарын оҥоһуктара, тиэхиникэлэрэ көрдөрүүгэ туруоҕа. Урбаанньыт, рационализатор Тимофей Крылов:

«Уус Алдан дьоҕурдаах дьонун үлэлэрин быыстапка курдук туруораары уонна атын нэһилиэк да буоллун, улуус киинэ да буоллун, атын дьоҕурдаах маастардар үлэлэрин аҕалан манна түмээри. Туох баар итэҕэс-быһаҕас матырыйаалларыгар, кыһалҕаларыгар көмөлөһүөхпүт, сүбэлэһиэхпит диэн бу миэстэни оҥорон үлэҕэ киллэрээри сылдьабыт».

Онон сотору кэминэн, Чараҥ бөһүөлэгэр уустар кииннэрэ арыллыаҕа. Саҥа киин “Ай-Тал” диэн ааттанан, айар-тутар дьоҕурдаах дьон оҥоһуктарын, техникаларын киэн араҥаҕа тарҕатар сыаллаах үлэлиэҕэ.