Араак ыарыы - бүтэһик диагноз буолбатах
Санааны бөҕөргөтөр, куту көтөҕөр ураты күн. Кыра, эрээри санааларынан күүстээх, оҕолор уонна кинилэр төрөппүттэрэ мустан 4 көрүҥтэн турар спортивнай күрэххэ кытыннылар. Дуобакка, саахымакка, буулдьанан ытыыга уонна сүүрүүгэ. Оҕолорго анаан бу күн айар дьоҕурдарын сайыннарарга аналлаах маастар-кылаастар ыытылыннылар. Биир кыһалҕаҕа түбэспит төрөппүттэр санааларын үллэстэн, атын ийэлэргэ-аҕаларга сүбэ-ама, күүс-көмө тылларын эттилэр.
"Манна 2021 сыллаахха бу диагноспытын билэммит кэлбиппит, билигин дьэ үтүөрдүбүт, икки сыл эмтэннибит. Номнуо, кыайыылахтар кэриэтэбит. Сүрүнэ диэн тулуур уонна чугас дьон өйөбүлэ олус наадалаах", - диэн төрөппүт Яна Старкова үллэстэр.
Бу бэстибээл сүрүн сыалынан бэйэлэрин диагнозтарын бастакытын билбит дьоҥҥо күүстээх бөҕө санааны киллэрии буолар. Өрөспүүбүлүкэ үрдүнэн саамай тарҕаммыт араак көрүҥүнэн хаан уонна эмбриональнай искэҥ буолар. Үйэбит сайдыыта тэтимирэн билигин медицинэ өҥөтө күүһүрдэ. Араак ыарыы - бүтэһик диагноз буолбатах.
"Бу киин онкологическай салаата 25 сыл иһигэр элбэх оҕону эмтээн атаҕар туруорда. Уонна билигин даҕаны үрдүк таһымнаах медициинэ өҥөтүн оҥоро олорор. Технология сайдан, эмп-томп кэлэн, эмтэнэр оҕолорго инникигэ эрэл уонна көмө баар", - диир М.Е. Николаев аатынан Национальнай медицинскай киин сүрүн дириэктэрэ Станислав Жирков.
Оҕолор үөрүүлээх күннэригэр артыыстар, аатырбыт спортсменнар кэлэн ыалдьыттаатылар. Кыайыы былааҕа күөрэйдэ, кыайыы ырыата ылланна. Чурапчыттан сылдьар 17 саастаах Алёша Кривошапкин онкология ыарыылааҕын Москуба куоракка 2013 сыллаахха 4, бүтэһик, стадияҕа тиийбитин билбитэ. Ол кэнниттэн национальнай медицинскэй кииҥҥэ кэлэн, 4 сыл устата эмтэнэн, билигин үтүөрэн номнуо бэстибээл кыайыылаҕынан буолла.
"2013 сыллаахха мин лимфома ходжкина диэн ыарахан онкологическай ыарыынан ыалдьыбытым. Ону Праздник жизни фонд олохпун быыһаабыта, мин кинилэргэ олуһун махтанабын", - диэн бэстэбээл кыайыылааҕа Алёша Кривошапкин кэпсиир.
"Маннык тэрээһин эмтэнэ сылдьар уонна үтүөрбүт оҕолорго наһаа наада. Үтүөрбүттэрин да кэнниттэн маннык тэрээһиҥҥэ кыттаннар, кыайаннар бэйэлэригэр көҕүлүүр күүһү ылаллар", - диэн Алёша Кривошапкин ийэтэ Лена Кривошапкина этэр.
Маннык тэрээһиннэр аны сыллата ыытыллыахтара. Оҕолорго эрэ буолбакка, бастатан туран бу ыарыыга бэриммэккэ тэҥҥэ охсуспут төрөппүттэргэ чуолаан ананна.
"Оҕолорбут ыалдьан баран эмтэнэн, киһи-хара буолларыгар элбэх киһи көмөлөспүтүгэр махталым муҥура суох", - диир "Праздник жизни" аһымал пуонда төрүттээччитэ Алёна Атласова.
Тэрийээччилэр онкология салаатын кытта хардарыта үлэлэспиттэрэ быйыл 15 сылыгар барда. Маннык күүстээх өйөбүл баар буолан, оҕолор кыра да, улахан үөрүүлэрин өр кэмҥэ үйэтитиигэ улахан төһүү күүс буолар.
"Көрөргүт курдук, манна көтөҕүллүбүт санаа, этэргэ дылы, олох бары кырааската. Киһи көрөн олуһун долгуйар, доруобай оҕолор бу сүүрэкэлии, үөрэ-көтө үнкүүлүү, ыллыы, күрэхтэһэ сылдьаллара. Мантан үчүгэй туох буолуоҕай ", - диэн бэстибээл тэрийээччитэ Людмила Николаева иһитиннэрэр.
Өлүүнү тулуурунан, күүстээх санаанан кыайбыт оҕолор элбэх дьоҥҥо үтүө холобур буолаллар. Араак ыарыы - бүтэһик диагноз буолбатах.
