Аан дойдутааҕы Дмитрий Коркин үбүлүөйдээх турнирыгар бэлэмнэнии
Улуу Куоркун үбүлүөйдээх 95 сыла, онон быйылгы буолар тустуу үөрүүлээх бырааһынньыга хаһааҥҥытааҕар даҕаны күүрээннэх, долгутуулаах буолара күүтүллэр. Саха сирин бастыҥ бөҕөстөрө быйыл сайын устата Манньыаттаах успуорт баазатыгар күүстээх бэлэмнэниини аастылар, оттон билигин 2 чаастан турар сборга киирдилэр. Күннээҕи режимнэрэ кытаатта. Спортсменнар күҥҥэ үс дьарыгы ааһан, бары биир сыалы ситэр суолларыгар дьаныардаахтык туруннулар.
"Үбүлүөйдээх турнир буолар. Эппиэтинэс улахан, уолаттар да, биһиги да иннибитигэр. Балаҕан ыйын 15-17 күннэригэр 23 диэри саастаахтар Россия чемпионатыгар бэлэмнэнэллэр. Ол иһин икки гына хайдыһаммыт, улахан састаап Коркиҥҥа уонна 23 диэри саастаахтар Россия чемпионатыгар бэлэмнэнэллэр", - диир СӨ көҥүл тустууга сүрүн тренер Александр Оконешников.
Уопсайа 60 кэриҥэ тустуук бэлэмнэниини ааһа сылдьар. Сүрүн тренер бэлиэтииринэн, баҕалаах уолаттары барыларын туһуннара сатыыллар. Уолаттар хас да эргииринэн ыйааһыннарынан арахсан, тренердэрин иннилэригэр тустан көрдөрөллөр. Бэйэбит сирбитигэр буолар улахан тэрээһиҥҥэ бэйэбитин туох баарбытынан ууран туран тустуохтаахпыт диэн үчүгэй туруктарын көрдөрөллөр.
"Универсиада Екатеринбурга буолар 24 чыыһылаҕа, үрдүк үөрэх кыһаларынан арахсан. Онно мин Владикавказка баар үөрэҕим, университетым аатыттан кыттабын. Туругум аргыыйдык тупсан эрэр", - диэн спортсмен Егор Вензель кэпсээтэ.
Легионер, көҥүл тустууга Македония хамаандатын чилиэнэ Владимир Егоров Аан дойду чемпионатыгар кыттаары бэлэмнэниини дойдутугар, Саха сиригэр ааһа сылдьар:
"Сайыҥҥы бэлэмнэниини барытын Саха сиригэр аастыбыт, Манньыаттаах диэн лааҕырга. Уонна оттон манна үчүгэйдик бэлэмнэнэммит Румынияҕа норуоттар икки ардыларынааҕы турнирга күрэхтэһэ барыахтаахпыт. Аан дойду чемпионатын иннинэ биир старт оҥорон баран, Олимпийскай путевка иһин кыттабыт. Ылыахтаахпыт".
Тустуу аҥардас эт-сиин эрэ үлэтэ буолбакка, өй үлэтин эмиэ эрэйэр. Ол иһин тренер күүстээх көрүүтэ, хайа баҕарар көрүҥҥэ буоларын курдук, спортсменнар ис туруктарыгар быһаччы улахан оруоллаах.
Бу буолаары турар турниры көрөөччүлэр буор босхо көрөр кыахтаныахтара. Сылтан сыл таһыма үрдээн, тустууну таптааччылары быйыл элбэх үөрүүлээх түгэн күүтэр, ол туһунан "Өрөгөй" успуорт уораҕайын дириэктэрэ Михаил Пахомов үллэстэр:
"Бу балаҕан ыйын 16 күнүгэр Олимпиада иннинээҕи Аан дойду чемпионат Сербияҕа Белград куоракка буолаары турар. Онно биһиги путевка оонньотуохпут. Биир ыалдьааччы путевка сүүйэн, Аан дойду чемпионатын көрөн кэлиэҕэ".
Саха тустуутун киэҥ түһүлгэҕэ ааттатар тустууктарбытыгар эрэл улахан. Сайыҥҥы бэлэмнэнии уолаттарга элбэх туһаны аҕалла. Бу күнтэн ыла туох баар сыраларын ууран туран, кыайыы иһин тустарга бэлэмнэниэхтэрэ.
