Уйгулаах Уус Алдан сирэ-уота сайдыы суолун тобулар

Күн бүгүн, улууска араас социальнай эбийиэктэр, олорор дьиэ-уот тутуута ыытыллар. Итиэннэ сотору кэминэн Чараҥ бөһүөлэгэр олохтоох уустар оҥоһуктарын биир сиргэ түмэр саҥа экспо киин арыллаары турар. Уопсайынан, кэнники 5 сыл иһигэр улууска хаһааҥҥытааҕар да элбэх тутуу олоххо киирдэ диэн улуус баһылыга Алексей Федотов кэпсиир:

"Бу көрүллэр боппуруостар иннин диэки баран иһиэхтэрэ. Биллэн турар, 5 сыл устата 60 тутуу киирдэ. Ону таһынан элбэх социальнай эбийиэктэр, ол иһигэр 11 тиэргэни тупсарыы диэн бырагыраамманан оҥоһулулбут эйгэлэр. Саамай сүрүнэ, социальнай эбийиэктэр тутуллан истэхтэринэ, кыраһыабай көстүүлээх, урукку киһи санаата да тиийбэт өттүгэр, киэҥ-куоҥ уораҕайдар тутуллубуттарын тастарыгар, дьон-сэргэ сынньанарыгар, олороругар, эдэр дьон көрсүһэригэр, оҕолор оонньуулларыгар болуоссаттар, анал сатыы хаамар сирдэр баар буолуулара ураты наадалаах суол диибин. Ол хайысхатынан үлэни ыытан иһэбит, салҕыы да баран иһиэҕэ. Чуолаан, Бороҕоҥҥо болуоссаттар, хаамар бульвардар, дьоруойдарбыт аллеятын саҥардан биэрии, Мүрү кытыла улахан бырайыак салҕыы үлэҕэ киирэн иһиитэ, барыта Өрөспүүбүлүкэбит дьоҥҥо-сэргэҕэ туһаайар болҕомтото дии саныыбыт".