Бааһынай ырыынагар атыы-тутуу үгэнэ салаҕанан бара турар

Бааһынай ырыынагар Саха сиригэр үүнэр оҕуруот аһа ситэн, олохтоохтору олус үөртэ. Сибиэһэй оҕурсу, хортуоска, помидор бары арааһа, мииньигэс пиэрэс, кабачок уонна да атын олохтоох үүннэрии аһын манна булуохха сөп. Сыаналары тэҥнээн көрөр эбит буоллахха, кэлии Азербайджан дойду хортуоскатын киилэтэ 90 солкуобай, оттон маннааҕы сибиэһэй хортуоска кииилэтэ 230-280 солкуобайга диэри атыыланар. Сыаната төһө да 3 төгүл үрдүк буоллар, олохтоохтор бэйэ киэнэ минньигэс, ыарахаҥҥа да ылабыт диэн санааларын үллэстэллэр.

Бэйэ үүннэрии үксүн Тулагы сириттэн кэлбит ас буолар. Помидор сыаната суордуттан көрөн 250-350 диэри, хаппыыста 130, пекинскай 200, оҕурсу 80-100, кабачок киилэтэ 75-80, минньигэс пиэрэс сыаната 200. Сайынын бары ордорон сиир соҕуруу дойду аһа билигин силигилии ситэн, киилэтэ 75-80 солкуобайга диэри буолан турар. Маны таһынан, сайынын буоларын курдук, сир аһын атыыта ырыынакка дэлэйэн эрэр. Билигин атыыга Алдан сугуна тахсан турар.

"Нэдиэлэҕэ биирдэ аҕалабыт. Дьоннор атыылаһаллар син биир. Сорохтор бэйэлэрэ үргүүллэр, сорохтор кэлэн атыылаһаллар. Быйыл сугун арыый хойуутаата быһылаах, урут бэс ыйын бүтүүтүгэр аҕалар этибит, билигин атырдьах ыйыгар кэллэ. Дьон кыра-кыралаан атыылаһар, биһиги биэдирэнэн атыылыыбыт, сыаната 5 тыһыынча", - диир атыыһыт Матрёна Старостина.

Сугун сыаната урукку сыллартан туох да уларыйыыта суоҕун атыыһыттар бэлиэтииллэр. 1 лиитэрэтэ 500, лиитир аҥаара 250 солкуобайга тэҥнэһэр. Быйыл сугун үүнүүтэ өлгөм буолан, тыа дьоно үксүн бэйэтэ үргүүр. Оттон куорат олохтоохторо Бааһынай ырыынагыттан сыллата атыылаһар үгэстээхтэр.

Кылгас саха сайыныгар үүнэ охсор оҕуруот аһын, олохтоохтор долгуйа күүтэллэр. Сотору кэминэн атыыга малина, хаптаҕас, моонньоҕон уонна отон тахсыахтара. Ыраах баран үргэнэрэ, атыыһыт киһи тус бириэмэтэ - барыта атыыланар сыанатыгар толору эппиэттэһэр диир атыылаһааччы санаата элбэх.